ស្រីៗ​យើង​មួយចំនួនប្រហែលជាធ្លាប់បានដឹង និងឮអំពីដុំសាច់នៅភ្នាសក្នុងនៃស្បូន ដែលជាដុំសាច់កើតឡើងនៅក្នុងស្រទាប់សាច់ដុំស្បូន ហើយដុះចូលទៅក្នុងប្រហោងស្បូន ដែលវាបណ្តាលមកពីកត្តាជាច្រើនយ៉ាង​។ ថ្ងៃនេះកញ្ញានឹងបកស្រាយអំពីប្រភេទនីមួយៗនៃដុំសាច់នៅភ្នាសក្នុងស្បូន មូលហេតុ និងរោគសញ្ញានៃជំងឺនេះមកចែករំលែកអ្នកទាំងអស់គ្នា ដើម្បីបានដឹង និងអាចធ្វើការតាមដានជំងឺនេះបាន។

តើដុំសាច់នៅភ្នាសក្នុងនៃស្បូនត្រូវបានគេចែកចេញជាប៉ុន្មានកម្រិត?

ដុំសាច់នៅភ្នាសក្នុងនៃស្បូនត្រូវបានចែកចេញជា ៣កម្រិត៖

កម្រិតទី១(Grade 0): ដុំសាច់ដែលដុះនៅភ្នាសក្នុងនៃស្បូនមានទងច្បាស់លាស់ មានទំហំមិនលើសពី ៣សង់ទីម៉ែត្រ

ទី២(Grade 1): ដុំសាច់ដែលដុះនៅភ្នាសក្នុងនៃស្បូន មានទងធំ ហើយស៊ីចូលទៅដល់សាច់ដុំស្បូន

ទី៣(Grade 2): ដុំសាច់ដែលដុះនៅភ្នាសក្នុងនៃស្បូន មានទំហំធំស៊ីចូលទាំងភ្នាសក្នុង និងសាច់ដុំនៃស្បូន មិនមានទងច្បាស់លាស់ ហើយមានទំហំធំលើសពី ៥សង់ទីម៉ែត្រ។

តើដុំសាច់នៅភ្នាសក្នុងនៃស្បូនបណ្តាលមកពីមូលហេតុអ្វី?

មូលហេតុដែលបណ្តាលឲ្យមានដុំសាច់នៅភ្នាសក្នុងនៃស្បូនរួមមាន៖

• ជំងឺនេះកើតមានតែលើស្រ្តីក្នុងវ័យបន្តពូជ
• ជំងឺនេះកើតលើស្ត្រីដែលលើសអ័រមូនអ៊ឺស្រ្តូហ្សែន
• ជំងឺនេះកើតលើស្ត្រីដែលមានវិបត្តិអ័រមូន
• ជំងឺនេះកើតលើស្ត្រីដែលមានវដ្តរដូវមិនទៀងទាត់
• កត្តាចំណីអាហារ បរិយាកាស និងកត្តាសង្គម

គួរបញ្ជាក់ថាជំងឺនេះមិនអាចកើតមានចំពោះស្រ្តីមិនទាន់ពេញវ័យ ហើយជំងឺនេះនឹងអាចបាត់ទៅវិញនៅពេលដែលស្រ្តីមានវ័យចំណាស់ (ស្ត្រីអត់រដូវ)។

តើដុំសាច់នៅភ្នាសក្នុងនៃស្បូនមានរោគសញ្ញាដូចម្តេចខ្លះ?

ស្រ្តីដែលមានជំងឺដុំសាច់នៅភ្នាសក្នុងនៃស្បូនមានរោគសញ្ញាដូចជា៖

• ធ្លាក់ឈាមរដូវច្រើន
• រយៈពេលមានរដូវអូសបន្លាយយូរខុសធម្មតា
• ធ្លាក់ឈាមតាមទ្វារមាសខុសធម្មតា ក្រៅពីពេលមានរដូវ
• មានការឈឺចុកចាប់ពេលមានរដូវ
• អាចបណ្តាលឲ្យធ្លាក់ឈាមពេលមានផ្ទៃពោះ
• អាចបណ្តាលឲ្យរលូតកូននៅត្រីមាសដំបូង
• បង្កឲ្យមានវិបត្តិអត់កូន

តើអ្នកជំងឺដុំសាច់នៅភ្នាសក្នុងនៃស្បូនគួរទទួលការព្យាបាលបែបណា?

ក្នុងករណីពុំបង្កឲ្យមានផលវិបាកធ្លាក់ឈាម ឬក៏មានវិបត្តិផ្សេងៗ គេពុំធ្វើការវះកាត់ទេ ដោយគ្រាន់តែធ្វើការតាមដានឲ្យបានទៀងទាត់ជាមួយគ្រូពេទ្យឯកទេសរោគស្ត្រីជាប្រចាំ។ ប៉ុន្តែក្នុងករណីមានធ្លាក់ឈាមច្រើនខុសធម្មតា និងបង្កឲ្យមានវិបត្តិអត់កូន យើងត្រូវធ្វើការវះកាត់ដុំសាច់នេះចេញ ដោយគ្រូពេទ្យឯកទេស។