ការសិក្សារកឃើញថាស្រ្តីវ័យលើស៥០ឆ្នាំញ៉ាំភេសជ្ជៈផ្អែមរាល់ថ្ងៃប្រឈមជំងឺថ្លើមខ្ពស់

2023-08-09 04:41:01
ចំនួនមតិ 0 | ចំនួនចែករំលែក 0

ការសិក្សាមួយបានរកឃើញថាស្រ្តីវ័យលើសពី៥០ឆ្នាំដែលបានញុាំភេសជ្ជៈមានជាតិផ្អែមជាប្រចាំមានហានិភ័យខ្ពស់កើតជំងឺមហារីកថ្លើម ឬស្លាប់ដោយសារជំងឺថ្លើមរ៉ាំរ៉ៃ។ នេះបើតាមការចុះផ្សាយរបស់ CNN នៅថ្ងៃទី៨ ខែសីហា ឆ្នាំ២០២៣។

បើតាម CNNនៅសហរដ្ឋអាមេរិកមនុស្សពេញវ័យប្រាំមួយនាក់ក្នុងចំណោម១០នាក់បានផឹកភេសជ្ជៈផ្អែមជាប្រចាំថ្ងៃ។ សម្រាប់ស្រ្តីវ័យចំណាស់វិញ ការសិក្សារកឃើញថាទំនងជាអាចបង្កជាហានិភ័យខ្ពស់កើតជំងឺមហារីកថ្លើម ឬស្លាប់ដោយសារជំងឺថ្លើមរ៉ាំរ៉ៃ។

របាយការណ៍មួយចុះផ្សាយកាលពីថ្ងៃអង្គារក្នុងព្រឹត្តិបត្រវេជ្ជសាស្រ្តឈ្មោះថាJAMA បានតាមដានលើស្រ្តីជិត១០០ ០០០នាក់អាយុចន្លោះពី៥០ទៅ៧៩ឆ្នាំនៅសហរដ្ឋអាមេរិក និងតាមដានសុខភាពអ្នកទាំងនោះរយៈពេលជាង២០ឆ្នាំ។ បើប្រៀបធៀបទៅនឹងស្រ្តីវ័យចំណាស់ដែលមិនសូវញុាំភេសជ្ជៈផ្អែម (sugar-sweetened beverage) គេរកឃើញថាអ្នកដែលចូលចិត្តញុាំភេសជ្ជៈផ្អែមជាប្រចាំមានអត្រាខ្ពស់កើតជំងឺមហារីកថ្លើម និងស្លាប់ដោយសារជំងឺថ្លើមរ៉ាំរ៉ៃ។

បើតាមCNN អ្នកចូលរួមក្នុងការសិក្សានេះបានរាយការណ៍ចំនួនដងនៃការញុាំភេសជ្ជៈផ្អែម ឬទឹកផ្លែឈើថាតើប៉ុន្មានដងក្នុងមួយថ្ងៃ ឬចាប់ពីប្រាំមួយដង ឬច្រើនជាងនេះក្នុងមួយថ្ងៃ។ ការសិក្សាក៏បានពិនិត្យលើចំនួនស្រ្តីដែលបានធ្វើរោគវិនិច្ឆ័យឃើញថាមានជំងឺថ្លើម ឬស្លាប់ដោយជំងឺថ្លើមររុាំរ៉ៃក្នុងរយៈពេលនៃការសិក្សាគិតជាមធ្យមជិត២១ឆ្នាំ។

ការសិក្សាបានរកឃើញថាស្រ្តីដែលបានញុាំភេសជ្ជៈផ្អែមយ៉ាងតិចម្ដងក្នុងមួយថ្ងៃមានអត្រាកើតជំងឺមហារីកថ្លើម១,៧៥ដងខ្ពស់ជាងស្រ្តីដែលញុាំភេសជ្ជៈប្រភេទនេះត្រឹមបីដង ឬតិចជាងនេះក្នុងមួយខែ។ សម្រាប់អ្នកញុាំភេសជ្ជៈផ្អែមទាំងនេះជាប្រចាំក៏មានហានិភ័យស្លាប់ដោយសារជំងឺថ្លើមរុាំរ៉ៃ២,៥ដង ខ្ពស់ជាងអ្នកមិនសូវញ៉ាំភេសជ្ជៈប្រភេទនេះផងដែរ។ បើតាមអ្នកជំនាញផ្នែកសុខភាពបានណែនាំថាបើសិនជាយើងចូលចិត្តញ៉ាំភេសជ្ជៈផ្អែមគួរកាត់បន្ថយការញ៉ាំ ហើយកុំញុាំញឹកញាប់ពេក។

ប្រភព៖ CNN អត្ថបទ៖ ទូច សុខា