Tang Yan ឆ្លើយតបរឿងត្រូវគេរិះគន់ថាខ្ជិលធ្វើការ ទោះតម្លៃខ្លួនជាង១០លានដុល្លារមួយរឿង

2022-10-17 09:55:00
ចំនួនមតិ 0 | ចំនួនចែករំលែក 0

តារាសម្ដែងស្រីជួរមុខចិន Tang Yan ឆ្លើយបកទៅអ្នកគាំទ្រវិញ នៅពេលនាងត្រូវគេថាខ្ជិល មួយខែធ្វើការតែពីរថ្ងៃ។

កាលពីថ្ងៃទី ១០ ខែតុលាមុននេះ បណ្ដាញព័ត៌មាន 163 បានរាយការណ៍ថា តារាសម្ដែងស្រីជួរមុខចិន Tang Yan គឺជាតារាគ្របមុខសម្រាប់ទស្សនាវដ្ដី Modern Weekly សម្រាប់ខែតុលា។ នៅក្នុងបទសម្ភាសន៍ជាមួយទស្សនាវដ្ដី ស្រីស្អាតអាយុ ៣៨ឆ្នាំ បានឆ្លើយតបនឹងមតិអ្នករិះគន់នាងថាខ្ជិល ដោយមួយថ្ងៃធ្វើការតែពីរ ទៅបីថ្ងៃមិនព្រមទទួលថតរឿងថ្មី។

“ឆ្លងកាត់រយៈពេលបីឆ្នាំនៃជំងឺឆ្លង ធ្វើឲ្យខ្ញុំស្រលាញ់ការរស់នៅច្រើនជាងមុន។ ទោះបីជាការងារសំខាន់ក៏ពិតមែន តែខ្ញុំចង់នៅក្បែរគ្រួសារឲ្យបានច្រើនជាង។ ខ្ញុំដឹងថាថ្ងៃណាមួយខ្ញុំនឹងរវល់គ្មានពេលសម្រាកដូចមុន តែមិនមែនជាពេលនេះឡើយ។ នេះគឺជាពេលដែលសំខាន់បំផុតសម្រាប់ការលូតលាស់របស់កូន ខ្ញុំមិនចង់បាត់បង់ឱកាសនេះឡើយ” អ្នកម្ដាយកូនមួយរៀបរាប់។

មុននោះដែរ ក្រុមអ្នកគាំទ្ររបស់ Tang Yan បានវាយតម្លៃនាងថា អន់ថយជាងតារារួមជំនាន់ដូចជា Yang Mi និង Angelababy ដោយនាងមិនព្រមទទួលរឿងថ្មីទាល់តែសោះ ទោះតម្លៃខ្លួនរបស់នាងពេលសម្ដែងរឿង The Legend of Xiao Chua ឡើងដល់ជាង១១លានដុល្លារ៕