តារាចម្រៀងស្រីកូរ៉េត្រូវប្ដីវាយជាំភ្នែក ហើមមុខ គំរាមសម្លាប់

2022-09-27 02:35:00
ចំនួនមតិ 0 | ចំនួនចែករំលែក 0

តារាចម្រៀងស្រីកូរ៉េ Seo Sa Rang បង្ហោះរូបមុខរបស់នាងត្រូវហើម និងជាំដោយលើកឡើងថាស្វាមីនាងគឺជាអ្នកវាយនាង។

កាលពីថ្ងៃទី ២០ ខែកញ្ញាមុននេះ បណ្ដាញព័ត៌មាន Xports News បានរាយការណ៍ថា តារាចម្រៀងស្រីកូរ៉េ Seo Sa Rang បានចោទប្ដី ដែលអ្នកជំនួញ Lee Jung Hwan បានប្រើអំពើហិង្សារលើនាងជារឿយៗ។

នៅលើបណ្ដាញសង្គម តារាចម្រៀងស្រីកើតឆ្នាំ ១៩៩៤ បានបង្ហោះរូបភ្នែកត្រូវជាំ និងហើមមុខ ហើយបកស្រាយថា នេះគឺជាលទ្ធផលដោយសារប្ដីនាងវាយធ្វើបាប។ ដើមហេតុនោះគឺ នាងបានមកដល់កម្មវិធីមួយដែលមានប្ដីជាភ្ញៀវយឺតពេល ដូចនេះ ពេលមកដល់ផ្ទះ ប្ដីនាងក៏ដាល់នាងចំមុខ។

“នៅចំពោះមុខកូនខ្ញុំ គាត់បានគំរាមសម្លាប់ខ្ញុំ ហើយដកកាំបិតមកដេញតាមខ្ញុំក្នុងផ្ទះបាយ។ ទោះបីជាខ្ញុំក្លាយទៅជាបែបនេះហើយក្ដី តែប៉ូលិសនៅតែមិនដោះស្រាយដោយពួកគេថា នេះគ្រាន់តែជាជម្លោះប្ដីប្រពន្ធធម្មតា” សិល្បការិនីអាយុ ២៨ឆ្នាំបន្ថែម។

បច្ចុប្បន្ន តារាស្រីនេះបានរើទៅនៅផ្ទះជួលខាងក្រៅជាមួយកូនស្រីអាយុ ៤ឆ្នាំហើយ ដោយសារខ្លាចប្ដីវាយធ្វើបាបបន្តទៀត។ ឆ្លើយតបនឹងការចោទប្រកាន់ខាងលើ លោក Lee Jung Hwan បានចេញមុខបដិសេធ និងប្រាប់មហាជនថា សង្ឃឹមថាអ្នកទាំងអស់គ្នាមិនស្ដាប់រឿងអ្វីតែពីម្ខាង។ តារាចម្រៀងស្រី Seo Sa Rang បង្ហាញមុខក្នុងក្រុមចម្រៀង O My Jewel កាលពីឆ្នាំ២០១៥ តែដោយសារមិនជោគជ័យក៏រំសាយក្រុម បន្ទាប់មកនាងរៀបការនឹងអ្នកជំនួញ Lee Jung Hwan៕