ទឹកធ្លាក់ចុះមកពីលើភ្នំដែលមានប្រភពមកពីបឹងដ៏ធំមួយទំហំប្រមាណជាង២ហិចតា លើកំពូលភ្នំដែលអ្នកនៅតំបន់នោះហៅថាបឹងទន្លេផែន ហូរកាត់តាមផ្ទាំងថ្មធំៗជាច្រើនដំណាក់ ដែលបង្កើតអោយទឹកមានសភាពថ្លាឆ្វង់ និងត្រជាក់ដូចទឹកអម្រិត។

ទីតាំងដ៏អំនោយផលនេះ បានផ្តល់នូវបរិស្ថានដ៏ប្រសើរចំពោះការរស់នៅរបស់មច្ឆា បក្សាបក្សី ប្លែកៗគួរជាទីគយគន់។ សហគមន៍អេកូទេសចរណ៍ទឹកធ្លាក់អូរជាំ ស្ថិតនៅក្នុងភូមិអូរជាំលើ ឃុំកំពង់ល្ពៅ ស្រុកសំឡូត ខេត្តបាត់ដំបង មានចំងាយប្រមាណ៩៩គីឡូម៉ែត្រពីក្រុងបាត់ដំបង។ ទីភ្នំខ្ពស់ៗអមដោយរុក្ខជាតិ និងស្មៅដុះខៀវខ្ចី បានបង្កើននូវថាមពលដល់ភ្ញៀវទេសចរដែលទៅកម្សាន្តសប្បាយ។ ​

លោក​អ្នក​អាច ទស្សនា​កម្សាន្ត​តាម​លើ​ភ្នំ និង​ទឹក​ជ្រោះ​ដែល​មាន​ច្រើន​ដំណាក់ ​ងូត​ទឹក​ជ្រោះ​កម្សាន្ត ​បោះ​តង់ ទស្សនា​ហ្វូង​មេអំបៅ ​ស្វែង​យល់​ពី​សហគមន៍​ដើម្បី​ទទួល​បាន​បទពិសោធន៍​ថ្មី​ប្លែក​ៗ ​ជាមួយ​​ធម្មជាតិ​នៃ​បេះដូង​របស់​អ្នក​ស្រុក​សំឡូត៕