Justin Bieber ត្រូវចំណាយពេលកន្លះឆ្នាំដើម្បីព្យាបាលជំងឺខ្វិនមុខ

2022-06-16 06:50:00
ចំនួនមតិ 0 | ចំនួនចែករំលែក 0

វេជ្ជបណ្ឌិតបានឲ្យដឹងថា កំពូលតារាចម្រៀងប្រុសកាណាដា Justin Bieber ត្រូវចំណាយពេលច្រើនខែ ដើម្បីព្យាបាលជំងឺដ៏កាចសាហាវនេះ ដោយលោកត្រូវផ្អាកការងារទាំងអស់។

កាលពីថ្ងៃទី ១៤ ខែមិថុនាកន្លងទៅនេះ បណ្ដាញព័ត៌មាន Daily Mail បានរាយការណ៍ថា វេជ្ជបណ្ឌិត Nina Lu អ្នកជំនាញផ្នែកខ្វិនមុខនៃសកលវិទ្យាល័យវេជ្ជសាស្ត្រ Washington សហរដ្ឋអាមេរិកបានឲ្យដឹងថា តារាចម្រៀងប្រុសល្បីឈ្មោះ Justin Bieber ពិបាកនឹងជាធម្មតាវិញក្នុងរយៈពេលខ្លីខ្លាំងណាស់។ យ៉ាងណាក្ដី លោកស្រីក៏បានឲ្យដឹងថា ជំងឺនេះគឺអាចព្យាបាល ដោយ៧លើអ្នកជំងឺ១០នាក់គឺអាចជាដាច់បាន។

វេជ្ជបណ្ឌិតខាងលើបានបន្ថែមថា ចាប់ពីខែទី ៣ ដល់ខែទី៦ ទើបអ្នកជំងឺមានអារម្មណ៍ថាមុខរបស់ខ្លួនប្លែក ប្រែទៅជាធម្មតា។ ជំងឺខ្វិនមុខរបស់ ម្ចាស់បទ Peaches មានតែអ្នកកើត៥នាក់ លើមនុស្ស១០០០០០នាក់ប៉ុណ្ណោះ នៅសហរដ្ឋអាមេរិក ដោយជំងឺនេះមានឈ្មោះបច្ចេកទេសថា Ramsay Hunt។

“Justin Bieber នៅក្មេង ហើយរកឃើញជំងឺបានលឿន ដូចនេះ ការព្យាបាលក៏បានរហ័សជាងមុន។ ការជាសះស្បើយរបស់មនុស្សម្នាក់ៗ គឺមានល្បឿនខុសគ្នា។ តែជាមួយភាពជឿនលឿននៃវេជ្ជសាស្ត្របច្ចុប្បន្ន ជំងឺនេះមិនចោទជាបញ្ហាធំពេកឡើយ” វេជ្ជបណ្ឌិត Nina Lu ឲ្យដឹង៕