ហេតុអ្វីព្រហ្មលិខិត ធ្វើបាបស្នេហាមួយនេះម្ល៉េះ?
- 2021-05-13 07:05:00
- ចំនួនមតិ 0 | ចំនួនចែករំលែក 0
ហេតុអ្វីព្រហ្មលិខិត ធ្វើបាបស្នេហាមួយនេះម្ល៉េះ?
កំហុសរបស់ខ្ញុំ ពិតជាពិបាកលើកលែងឲ្យណាស់ ព្រោះជាកំហុសធំពេក ហើយមានតែពាក្យថាហួសហើយ ….. ប៉ុណ្ណោះ។ តែចិត្តដែលនៅស្រលាញ់ ទោះជាខ្ញុំដឹងថាពេលនេះ អ្នកលែងមានខ្ញុំក្នុងចិត្តទៀតក៏ដោយ ក៏ខ្ញុំពិតជាពិបាកប្រាប់ខ្លួនឯង ឲ្យដើរចេញពីជីវិតរបស់អ្នកណាស់។
អំពើល្អរបស់អ្នកកន្លងមក ខ្ញុំមើលរំលងរហូត រហូតទាល់តែអ្នកអស់ចិត្ត ហើយពួកយើងបែកគ្នាដោយស្ងៀមស្ងាត់បំផុត។ ហេតុអ្វីក៏ព្រហ្មលិខិតធ្វើបាបស្នេហាមួយនេះម្ល៉េះ ហេតុអ្វីក៏ឲ្យខ្ញុំទាំងពីរត្រូវរងចុកចាប់ម្តងម្នាក់យ៉ាងខ្លោចផ្សារបំផុតបែបនេះ??? នៅពេលគេមានចិត្តលើខ្ញុំ ខ្ញុំបែរជាមិនអើពើ ដល់ពេលគេអស់ចិត្តទៅហើយបែរជាបណ្តាលចិត្តខ្ញុំឲ្យនឹកគេស្ទើរឆ្កួត ស្ទើរឡប់បែបនេះ? ទឹកភ្នែកខ្ញុំស្រក់ស្ទើរតែក្លាយជាទម្លាប់ទៅហើយ ឲ្យតែនឹកឃើញគេ នឹកដល់រឿងពីមុន ខ្ញុំទប់ចិត្តមិនជាប់ មិនដឹងថានេះជាវេនកម្មដែលខ្ញុំធ្លាប់សាងដាក់គេពីមុន ហើយត្រូវមកទទួលកម្មពៀរក៏ថាបាន។
ពេលឃើញគេមិនសប្បាយចិត្ត ខ្ញុំពិតជាចង់ឆាតទៅសួរនាំគេណាស់ តែខ្ញុំមិនហ៊ាន ព្រោះវាហួសព្រំដែនពេកសម្រាប់យើងទាំងពីរ ព្រោះគេមានគូដណ្តឹងទៅហើយ នៅចាំតែថ្ងៃចូលរោងការទេ។ ខ្ញុំម៉េចនឹងហ៊ានបង្ហាញអារម្មណ៍ខ្វល់ខ្វាយពីគេទៅ តែចិត្តរបស់ខ្ញុំវិញ ស្ទើរតែបែកប្រេះទៅហើយ នៅពេលឃើញមនុស្សដែលខ្លួនឯងស្រលាញ់ មិនសប្បាយចិត្ត រងទុក្ខបែបនេះ។ ពេលឃើញគេធ្វើការងារហត់ ក្រោមកម្តៅថ្ងៃខ្លាំង ខ្ញុំចង់ទៅបាំងឆ័ត្រឲ្យគេ ជួយជូតញើសឲ្យគេ ប្រាប់គេឲ្យផឹកទឹកបានច្រើន និងត្រូវថែទាំសុខភាព ខ្ញុំចង់មើលថែគេណាស់ ចង់ធ្វើម្ហូបឆ្ងាញ់ៗឲ្យគេញ៉ាំ និយាយទៅគឺចង់មើលថែគេគ្រប់ពេលវេលា ។ តែអ្វីៗបានត្រឹមជាការស្រមៃ ព្រោះគ្រប់យ៉ាង ខ្ញុំលែងមានសិទ្ធទៀតហើយ ទោះចង់ធ្វើល្អដាក់គេ ក៏គ្មានឱកាសទៀតដែរ។
ដោយសារតែខ្ញុំដឹងថា ការស្រលាញ់មួយនេះវាមិនអាចទៅរួច ទើបខ្ញុំសម្រេចចិត្តបង្ខំខ្លួនឯងម្តងទៀត ឲ្យដើរចេញពីជីវិតគេទៅ ។ ខ្ញុំមានតែប្រឹងកាត់ចិត្តទាំងអាល័យ ព្រោះបើខ្ញុំនៅតែធ្វើបែបនេះ មិនខុសពីកំពុងបំផ្លាញសុភមង្គលមនុស្សដែលខ្ញុំស្រលាញ់ទេ ខ្ញុំមិនអាចធ្វើជាអ្នកទី៣ ទៅជ្រៀតជ្រែកជីវិតស្នេហារបស់គេបានឡើយ ព្រោះគេមានគូហើយ។
ខ្ញុំបង្ខំខ្លួនឯងឲ្យរវល់កាន់តែខ្លាំង ដើម្បីឆាប់បំភ្លេចគេបាន តែពេលយប់ចូលមកដល់ ខ្ញុំនៅតែនឹកគេមិនបាត់។ ពេលខ្លះ ខ្ញុំចង់ចូលមើល profile គេណាស់ តែខ្ញុំខ្លាចពេលចូលមើលហើយ ឃើញរូបថតដែលខ្ញុំមិនគួរឃើញ ។ ពេលឃើញមានតែអត់សប្បាយចិត្ត ហើយក៏អន់ចិត្ត តែសួរថាអន់ចិត្តធ្វើអី? យើងមានសិទ្ធដែរអី.....?
ចុងក្រោយមានតែជូនពរខ្លួនឯងឲ្យឆាប់បានធូរស្បើយពីជំងឺស្នេហា មួយនេះ៕