កំពុងតែដាច់លុយផង Zheng Shuang ឈ្នះបណ្ដឹងសង្សារចាស់ចំនួន ៣លានដុល្លារ
- 2021-04-02 01:40:00
- ចំនួនមតិ 0 | ចំនួនចែករំលែក 0
កំពុងតែដាច់លុយផង Zheng Shuang ឈ្នះបណ្ដឹងសង្សារចាស់ចំនួន ៣លានដុល្លារ
បណ្ដឹងដែលបានប្ដឹងតាំងពីឆ្នាំ ២០១៩នោះ នៅពេលនេះ តារាសម្ដែងស្រីចិន Zheng Shuang បានយកឈ្នះបានហើយ។
កាលពីព្រឹកថ្ងៃទី ១ ខែមេសាកន្លងទៅនេះ បណ្ដាញព័ត៌មាន Sina បានរាយការណ៍ថា តុលាការក្រុងសៀងហៃបានកាត់ក្ដីបណ្ដឹងដែលបានប្ដឹងរវាង តារាសម្ដែងស្រី Zheng Shuang និងអតីតមិត្តប្រុស Zhang Heng រួចរាល់ហើយ។
ប្រភពដដែលបានឲ្យដឹងថា នៅក្នុងការកាត់ក្ដីនេះ ភាគីដែលឈ្នះនោះ គឺខាងតួរឿង F4។ តុលាការមិនទទួលការបដិសេធរបស់ខាងប្រុស ហើយតម្រូវឲ្យលោកត្រូវសងលុយដែលបានខ្ចីចំនួន ៣លានដុល្លារ បូករួមទាំងការប្រាក់ឲ្យអតីតមិត្តស្រីរបស់ខ្លួន។
តាមនោះដែរ ស្រីស្អាត៣០ឆ្នាំ មានភស្តុតាងគ្រប់គ្រាន់បង្ហាញថា លុយដែលនាងឲ្យខ្ចីនោះ គឺពិតជាស្របច្បាប់ពិតមែន ហើយខាងប្រុសវិញ មិនមានអ្វីមកសំអាងឡើយ។
គួរបញ្ជាក់ផងដែរថា កាលពីខែវិច្ឆិកា ឆ្នាំ២០១៩ តារាសម្ដែងស្រីកើតឆ្នាំ ១៩៩០ បានដាក់ពាក្យបណ្ដឹងដល់មិត្តប្រុស ព្រោះសងលុយមិនទៀងទាត់ និងតម្រូវឲ្យលោកសងទាំងការ និងដើម។ តែក្រោយមកខាងប្រុសមកចេញមុខបដិសេធដោយបានលើកឡើងថា លុយ៣លានដុល្លារនេះ គឺប្រើប្រាស់រួម មិនមែនលោកប្រើម្នាក់ឯងនោះឡើយ។
ការឈ្នះបណ្ដឹងចំនួន ៣លានដុល្លារនេះ គឺជាការរំដោះដ៏ធំគួរសមមួយសម្រាប់តួរឿង F4 ត្បិតខណៈពេលនេះនាងមិនមានការងារថ្មី និងត្រូវសងបំណុលច្រើន៕