រៀនធ្វើចាហ៊ួយផ្លែឈើ Cute Cute ផ្សំពីទឹកដូង ញ៉ាំលេងជាមួយគ្រួសារ

2020-04-10 08:47:05
ចំនួនមតិ 0 | ចំនួនចែករំលែក 0

ក្នុងឱកាសថ្ងៃចូលឆ្នាំថ្មីប្រពៃណីខ្មែរខាងមុខ បងប្អូនប្រជាពលរដ្ឋ ជាពិសេសនារិៗដែលសម្រាកនៅផ្ទះអាចសាកធ្វើចាហ៊ួយផ្លែឈើសម្រាប់បរិភោគជួបជុំគ្រួសារក្នុងផ្ទះយ៉ាងរីករាយ។ ដែលរូបមន្តនៃការធ្វើចាហ៊ួយនេះ មានលក្ខណៈងាយស្រួល មិនសាំញ៉ាំ ចំណាយពេលខ្លី និង មានគ្រឿងផ្សំតែ៤ មុខប៉ុណ្ណោះ៖

ទឹកដូងចំនួន ៤ ពែងតូចៗ

ម្សៅចាហ៊ួយ ១ស្លាបព្រា
ស្ករស ៦ស្លាបព្រា
ផ្លែឈើជាជម្រើសអ្នក៖ ស្វាយទុំ ម្នាស់ ក្រូច មៀន និងស្ត្រ៊បឺរីជាដើម កាត់ជាចំណិតតូចៗប្រមាណប៉ុនមេដៃ
ប្រអប់ទន់ចាក់ចាហ៊ួយដែលអាចបត់បែនបាន

វិធីធ្វើ៖

ចាក់ទឹកដូងពាក់កណ្ដាល ចូលឆ្នាំង ហើយដាក់ម្សៅចាហ៊ួយចូល រួចកូរឲ្យសព្វ និងដាក់ដាំឲ្យពុះ ហើយពិនិត្យមើលម្សៅបានរលាយចូលទឹកដូងអស់ហើយ សឹមបិទភ្លើង
បន្ទាប់មកដាក់ស្ករ ហើយដាក់ទឹកដូងដែលនៅសល់ចូលដើម្បីឲ្យទឹកចាហ៊ួយក្ដៅឧណ្ហៗ(សូមកុំទុកឲ្យទឹកត្រជាក់) ហើយកូរវាម្ដងទៀត យកផ្លែឈើចិតរួចដាក់ក្នុងប្រអប់ រួចចាក់ទឹកចាហ៊ួយចូល (សូមព្យាយាមកុំឲ្យទឹកហៀរចូលគ្នា ព្រោះវានឹងធ្វើរូបរាងចាហ៊ួយមិនស្អាត ហើយពិនិត្យមើលផ្លែឈើដោយតម្រៀបឲ្យត្រូវទម្រង់គូបនៃប្រអប់ដាក់)
រក្សាទុកវាក្នុងទូទឹកកក (មិនមែនទុកផ្នែកកកនោះទេ) ទុកយ៉ាងតិច ២ម៉ោងឡើង ហើយបន្ទាប់មកយកវាចេញ ចាក់លើដោយប្រើដៃល្មមៗកុំឲ្យខូចរូបរាង ហើយរៀបលើចាន និងបរិភោគដោយរីករាយជាមួយសមាជិកគ្រួសារ។