៤ យ៉ាងគួរលុបចេញពីខួរក្បាល ដើម្បីកុំឲ្យកើតទុក្ខឥតប្រយោជន៍
- 2020-04-09 05:50:00
- ចំនួនមតិ 0 | ចំនួនចែករំលែក 0
៤ យ៉ាងគួរលុបចេញពីខួរក្បាល ដើម្បីកុំឲ្យកើតទុក្ខឥតប្រយោជន៍
រឿងរ៉ាវពិតក្នុងជីវិត ពេលខ្លះមានបញ្ហាសៅម៉ងជំពាក់ជំពិនពិបាកស្រាយ។ កាន់តែធំដឹងក្តី អ្វីៗមានការប្រែប្រួលខុសពីមុន សម្ពាធផ្លូវចិត្តក៏កាន់តែធ្ងន់។ ហេតុនេះហើយ មានរបស់មួយចំនួនដែលអ្នកគួរបំភ្លេចចោលខ្លះ ដើម្បីជួយឲ្យខួរក្បាលបានធូរស្រាល មិនខ្ជះខ្ជាយពេលវេលាគិតប្រយោជន៍ ហើយសន្សំកម្លាំងគិតពីរឿងល្អៗវិញ។
១. មិត្តទ្រុស្តមិត្ត
មិត្តភ័ក្តដែលធ្លាប់រាប់អានគ្នាយូរឆ្នាំយ៉ាងណាក៏ដោយ ប្រសិនបើអ្នកសង្កេតឃើញថា ពួកគេគ្មានភាពស្មោះត្រង់ បញ្ចេញទង្វើមិនគប្បី មានគំនិតទុទ្ទិដ្ឋិនិយម ដល់ពេលគួរផ្តាច់ទំនាក់ទំនងត្រឹមហ្នឹងហើយ។ មនុស្សប្រភេទមានតែឈ្មោះថាជា "មិត្ត” ប៉ុន្តែធាតុពិត ពួកគេគឺជា "សត្រូវសម្ងាត់" ដ៏គ្រោះថ្នាក់បំផុត។ ហានិភ័យអាចកើតឡើងចំពោះអ្នកគ្រប់ពេលវេលា ប្រសិនបើអ្នកធ្វេសប្រហែសតែបន្តិច ដូច្នេះមិនបាច់ស្ទាក់ស្ទើរទេ គួរបន្តមិត្តភាពជាមួយនរណាដែលអាចទុកចិត្តបានគឺគ្រប់គ្រាន់ហើយ។
២. ស្នេហាមិនច្បាស់លាស់
ឈានចូលដល់វ័យចាស់ទុំល្មម ដែលអ្នកអាចបែងចែករវាងស្នេហាច្បាស់លាស់ឬស្រពិចស្រពិល។ បើយល់ថាបុរសណាម្នាក់ យកអ្នកត្រឹមលេងសើច ខ្វះភាពជាក់លាក់ តើនៅបន្តមានន័យអ្វីទៀត។ មានតែការខាតបង់ ឈឺចាប់ ស្តាយក្រោយដែលខំស្មោះស្ម័គ្រ ជាមួយមនុស្សដែលមិនឲ្យតម្លៃលើការលះបង់របស់អ្នក។
៣. សម្តីផ្អែមបង្កប់ដោយជាតិពុល
មនុស្សដែលប៉ិនប្រើពាក្យផ្អែមល្ហែមជាងស្ករ មើលមួយភ្លែត ហាក់ដូចជាល្អរម្យទមគួរឲ្យចង់រាប់អានខ្លាំងណាស់។ មិនអាចទាយដឹងបានទេ ព្រោះសម្តីផ្អែមរបស់មនុស្សមួយចំនួន គឺបង្កប់ដោយភាពពិសពុលនៅខាងក្នុង។ ទាល់តែត្រូវចំណាយពេលយូរបន្តិច ដើម្បីវាយតម្លៃទៅលើទង្វើ ទើបអាចមើលឃើញពីផ្នែកខ្មៅងងឹត។ អាចជៀសបានគួរជៀសឲ្យហើយ ការពារកុំឲ្យជីវិតអាប់អួ ដោយសារមនុស្សបែបនេះ។
៤. ភាពស្មោះត្រង់ដែលអ្នកបានផ្តល់ទៅកាន់មនុស្សខុស
អារម្មណ៍ល្អ ភាពស្មោះត្រង់ ដែលអ្នកបានប្រគល់ឲ្យទៅនរណាម្នាក់ហើយគឺពិបាកទាមទារយកមកវិញខ្លាំងណាស់។ វាកាន់តែឈឺចាប់នៅពេលដែលអ្នកផ្តល់ឲ្យមនុស្សខុស។ យ៉ាងណាក៏មិនត្រូវអង្គុយបន្ទោស ទម្លាក់កំហុសឲ្យខ្លួនឯងដែរ។ ទោះយកមកវិញមិនបាន គួរចាត់ទុកជាវាជាមេរៀន ដើម្បីឲ្យអ្នកប្រុងប្រយ័ត្ន មុននឹងប្រគល់ក្តីស្រលាញ់ទៅកាន់នរណាម្នាក់នាពេលអនាគត៕
ចុចអានបន្ត៖ អានហើយមានកម្លាំងចិត្ត! រឿងល្អ ៦យ៉ាងដែលអ្នកអាចទទួលបានពេលជួបរឿងអាក្រក់ៗ