មនុស្សចូលចិត្តនៅម្នាក់ឯង មិនមែនពួកគេចង់ទេ តែមកពីគ្មានមនុស្សដែលអាចយល់ពីគេ

2019-01-14 08:00:00
ចំនួនមតិ 0 | ចំនួនចែករំលែក 0

ខ្ញុំតែងតែព្យាយាមលាក់របួស និងភាពសោកសៅរបស់ខ្ញុំដោយប្រឈមមុខនឹងសុភមង្គលដែលខ្ញុំប្រឹងធ្វើពុត ប៉ុន្តែវាពិបាកណាស់សម្រាប់ខ្ញុំដែលប្រឹងជម្នះនូវរឿងទាំងនេះ។ ខ្ញុំចង់ឱ្យមាននរណាម្នាក់ជួយសម្រាលការឈឺចាប់របស់ខ្ញុំ ប៉ុន្តែគ្មាននរណាម្នាក់យល់ពីខ្ញុំហើយអាច នៅក្បែរខ្ញុំបានឡើយ។

ក្រៅពីខ្លួនឯង គ្មានអ្នកណាអាចដឹង អាចយល់ឡើយ ពួកគេគិតថាខ្ញុំជាមនុស្សដែលគិតច្រើន ចូលចិត្តធ្វើឲ្យជីវិតខ្លួនឯងអាប់អួ ហើយពេលខ្លះពួកគេបានត្រឹមតែនិយាយថា «កុំគិតច្រើន» រួចហើយក៏ដើរចេញទៅ។

ត្រូវហើយគ្មាននរណាចង់ស្ដាប់រឿងទុក្ខសោករបស់អ្នកផ្សេងទេ ព្រោះអាចឲ្យគេខូចអារម្មណ៍ និងពិបាកចិត្តតាមយើង។ បែបនេះហើយទើបខ្ញុំចូលចិត្តនៅម្នាក់ឯង លួងខ្លួនឯង មិនចង់និយាយ មិនចង់ទៅរំខានអ្នកណាឡើយ។ ខ្ញុំចូលចិត្តនៅដាច់ឆ្ងាយពីគេ ព្រោះខ្ញុំគិតថាវត្តមានខ្ញុំធ្វើឲ្យគេគ្រប់គ្នាមិនសប្បាយចិត្តតាមខ្ញុំ។

ការពិតខ្ញុំឯកាណាស់ ខ្ញុំមិនចូលចិត្តអារម្មណ៍ឯកានោះទេ តែខ្ញុំបែរជាចង់នៅស្ងាត់តែឯង ព្រោះទោះមានគ្នាក៏ខ្ញុំនៅតែមានអារម្មណ៍ដាច់តែឯង។ ខ្ញុំចង់មានអ្នកអាចស្ដាប់ខ្ញុំថាខ្ញុំពេលនេះមានរឿងលំបាកចិត្តបែបណា ខ្ញុំចង់មានអ្នកដែលអាចឲ្យស្មាខ្ញុំផ្អែក ហើយអង្អែលក្បាលខ្ញុំថ្នមៗ ហើយនិយាយពាក្យពីរោះៗជាមួយខ្ញុំ ហើយអាចនៅក្បែរខ្ញុំពេលខ្ញុំដុនដាបបំផុត។

ប្រហែលជាពិបាកនឹងរកមនុស្សបែបនេះហើយ ទើបបានជាខ្ញុំចូលចិត្តនៅម្នាក់ឯង នៅស្ងាត់ស្ងៀម ព្រោះល្អជាងនៅជាមួយមនុស្សដែលចូលចិត្តឡកឡឺយឲ្យខ្ញុំ ថាខ្ញុំបែបនេះ ថាខ្ញុំបែបនោះ ទាំងមិនបានយល់អីសោះពីខ្ញុំ។

មនុស្សគ្រប់គ្នាគ្មាននរណាម្នាក់ចូលចិត្តនៅម្នាក់ឯង ដាច់ពីគេពីឯងទេ តែមកពីមនុស្សដែលគេនៅជាមួយសុទ្ធតែជាមនុស្សមិនសមឲ្យគេចង់នៅក្បែរ ដូច្នេះទើបបានជាមានមនុស្សជ្រើសរើសនៅម្នាក់ឯងដោយស្ងប់ស្ងាត់៕

ចុចអាន៖រៀនធ្វើខ្លួនឲ្យរឹងមាំ ពេលជួបឧបសគ្គក្នុងជីវិតតាមគន្លឹះសាមញ្ញៗ

អត្ថបទ៖ ផេង ផលធិតា