បើមិនស្រលាញ់ កុំធ្វើល្អដាក់អ្នកឯកាខ្លាំងពេក ព្រោះពួកគេងាយទន់ចិត្តណាស់

2019-10-11 02:45:00
ចំនួនមតិ 0 | ចំនួនចែករំលែក 0

សម្រាប់មនុស្សឯកា គ្រាន់តែគេបង្ហាញសកម្មភាពកក់ក្ដៅបន្តិច សម្ដីលួងលោមបន្តិច នឹងមានអារម្មណ៍ថាមានសុភមង្គលភ្លាម។ ដូចនេះបើមិនមានចិត្តលើទេ សូមកុំធ្វើឲ្យគេយល់ខុសអី។

នៅលើលោកនេះ សួរថាអ្នកណាដែលមិនចង់បានមនុស្សដែលស្រលាញ់ខ្លួនពិតប្រាកដ តែជាក់ស្ដែងទៅ តើមានមនុស្សប៉ុន្មាននាក់ ដែលអាចរកឃើញស្នេហាពិតរបស់ខ្លួននោះ? ពេលនៅលីវយូរទៅ មនុស្សមួយចំនួនស៊ាំនឹងអារម្មណ៍ដែលធ្វើអ្វីម្នាក់ឯង ទោះបីជាវាអាចពិបាកនៅពេលដំបូងបន្តិចក៏ដោយ។

តែរយៈពេលឆ្លងផុតទៅ អារម្មណ៍មួយនេះក៏នឹងមិនធ្ងន់ធ្ងរដូចដែលយើងបានគិតនោះទេ។ យ៉ាងណាក្ដី អ្វីដែលមិនអាចជៀសផុតនោះគឺ អារម្មណ៍ឯកា។ ទៅណាមកណាក៏ម្នាក់ឯង ធ្វើអ្វីក៏ម្នាក់ឯង សូម្បីតែមនុស្សម្នាក់ដែលអាចចែករំលែករឿងជាមួយក៏អត់មាន។ ទាំងនេះនឹងជម្រុញឲ្យភាពឯកាឡើងដល់កំពូល។

សម្រាប់មនុស្សទាំងនេះ នឹងឆាប់ទន់ចិត្ត ចំពោះទឹកចិត្តរបស់អ្នកដទៃណាស់ ទោះបីជាវាគ្រាន់តែជាសកម្មភាពតូចតាចក៏ដោយ។ ជាក់ស្ដែង នៅចំណតយានយន្តមួយ បើគេឃើញមនុស្សស្រីហើយជួយបណ្ដើរម៉ូតូឲ្យនោះ បេះដូងយើងក៏លោតញាប់ដែរ ដ្បិតរឿងទាំងនេះកម្រកើតឡើងចំពោះយើង។

នៅកន្លែងធ្វើការ ឬនៅក្នុងថ្នាក់រៀនមួយ យើងមិនស្រួលខ្លួន ហើយមានអ្នកសួរសុខទុក្ខបែបកក់ក្ដៅបន្តិច យើងក៏នឹងចាប់ផ្ដើមសួរខ្លួនឯងភ្លាមថា តើគេមានចិត្តលើយើង ឬក៏យ៉ាងម៉េចបានសួរនាំបែបនេះ ទាំងដែលគេសួរក្នុងនាមជាមិត្តរួមថ្នាក់ ឬមិត្តរួមការងារសោះ។

ភាពឯកាខ្លាំង ធ្វើឲ្យការស្រមើស្រមៃរបស់មនុស្សហោះបានឆ្ងាយ និងងាយទន់ចិត្តចំពោះមនោសញ្ចេតនារបស់អ្នកដទៃ ដោយនៅក្នុងកាលៈទេសៈជាច្រើន ពួកគេជាអ្នកយល់ច្រឡំដោយខ្លួនឯង ហើយឈឺតែម្នាក់ឯង។

ព្រោះទោះបីជាទង្វើដែលគេសម្ដែងចេញមកគឺមានស្មើគ្នា ចំពោះមនុស្សគ្រប់គ្នាក៏ដោយ តែអ្នកឯកាតែងតែមានទំនោរគិតលើសពីនោះ ហើយស្មានថានេះគឺជាមនោសញ្ចេតនាស្នេហា ដែលចុងបញ្ចប់ត្រូវខកចិត្ត ព្រោះត្រូវគេបដិសេធ។ ដូចនេះ បើមិនមានមនោសញ្ចេតនាទេ សូមកុំទន់ភ្លន់ដាក់អ្នកឯកាពេក ព្រោះអាចធ្វើឲ្យគេគិតច្រឡំ៕

ចុចអាន៖ កំហុសឆ្គងដ៏ធំរបស់មនុស្សស្រីពេលដាក់ចិត្តស្រលាញ់នរណាម្នាក់ ខ្លាំងពេក

ប្រភព៖ Guu ប្រែសម្រួល៖ Caramel