មេរោគខ្លាំង! របស់១០យ៉ាងមិនត្រូវប្រើចូលគ្នាដាច់ខាត ទោះមនុស្សជិតស្និទ្ធយ៉ាងណាក៏ដោយ
- 2019-05-21 09:06:43
- ចំនួនមតិ 0 | ចំនួនចែករំលែក 0
មេរោគខ្លាំង! របស់១០យ៉ាងមិនត្រូវប្រើចូលគ្នាដាច់ខាត ទោះមនុស្សជិតស្និទ្ធយ៉ាងណាក៏ដោយ
ការសិក្សាជាច្រើនបានរកឃើញថា ការប្រើរបស់រួមគ្នាមួយចំនួនអាចបង្កជាមេរោគឆ្លង និងធ្វើឱ្យគ្រោះថ្នាក់បាន ទោះបីមនុស្សជិតស្និទ្ធជាមួយគ្នាកម្រិតណាក៏ដោយ។ ដូច្នេះគួរទុករបស់របរប្រើប្រាស់ប្រចាំថ្ងៃឱ្យបានស្រួល ហាមខ្ចីគ្នាប្រើ បើមិនចង់ឆ្លងរោគពីគ្នាទេនោះ។ តួយ៉ាងដូចរបស់ទាំង១០ខាងក្រោមនេះជាដើម៖
១. កន្ត្រៃកាត់ក្រចក
តើអ្នកដឹងទេ? ក្នុងក្រចកដៃក្រចកជើងមនុស្សយើងមានមេរោគនិងវីរុសច្រើនដែលអាចបង្កជាជំងឺផ្សិតដែលភ្នែកទទេមិនអាចមើលឃើញ។ ដូច្នេះហើយ កន្ត្រៃកាត់ក្រចកអាចជាអ្នកចម្លងមេរោគនិងជំងឺបានងាយ។
២. ក្រវិល
នៅក្នុងត្រចៀកមនុស្សយើងមានសរសៃឈាមជាច្រើន ហើយពេលពាក់ក្រវិលម្ដងៗអាចមុតឬរលាស់ឈាមដោយកន្ទុយដងក្រវិលដែលមិនល្អឡើយសម្រាប់ការយកមកប្រើរួមគ្នា។ ប៉ុន្តែបើជៀសមិនផុតត្រូវខ្ចីក្រវិលគ្នាពាក់ដោយករណីបន្ទាន់ណាមួយ គួរជូតសម្អាតគន្លឹះក្រវិលដោយអាល់កុលដើម្បីសម្លាប់មេរោគជាមុនសិន។
៣. ក្រែមលាបមាត់
មិនថាជាក្រែមលាបមាត់ប្រភេទណាទេ ដាច់ខាតមិនគួរយកទៅប្រើច្រើនគ្នាឡើយ។ មូលហេតុគឺថាអាចមានមេរោគច្រើនយ៉ាងដែលនៅជាប់បបូរមាត់មនុស្សម្នាក់ៗ ជាពិសេសពពួកវីរុសដែលនាំឱ្យបបូរមាត់ទៅជារមាស់ រយះ ឬរលាកជាដើម។ មិនមែនជាការរើសអើង ប៉ុន្តែយើងមិនដឹងឡើយថា ម្នាក់ដែលយើងត្រូវចែករំលែកក្រែមជាមួយនោះបានសម្អាតមាត់ស្អាតយ៉ាងណាឡើយ។
៤. ចន្ទាសដករោម
ការប្រើចន្ទាសដករោម មិនថារោមត្រង់ណានៃដងខ្លួនឡើយ វាអាចទៅជាដាច់សាច់ ឬដកខ្លាំងពេកចេញឈាមជាដើម។ ហេតុនេះបើយកទៅប្រើរួមគ្នា អាចចម្លងមេរោគដោយប្រការណាមួយមិនដឹងខ្លួន។
៥. រ៉ូលអនលាបក្លៀក
របស់មួយនេះ ទោះមិនបាច់ប្រាប់ក៏ប្រហែលគ្នាយើងភាគច្រើនដឹងដែរ។ ដោយសារការប៉ះពាល់ផ្ទាល់ជាមួយស្បែក វាអាចជាប់បាក់តេរីដែលមាននៅក្រោមក្លៀក។ ដូច្នេះបើប្រើរួមគ្នាច្រើននាក់អាចធ្វើឱ្យអ្នកមានអារម្មណ៍មិនស្រណុកចិត្ត ឬរអើម សូម្បីតែសមាជិកក្នុងគ្រួសារតែមួយក៏ដោយ។ ម្យ៉ាងទៀត ផលិតផលប្រភេទនេះត្រូវប្រើនៅពេលស្បែកស្ងួត តែអ្នកខ្លះមិនដឹងក៏ប្រើទាំងស្បែកនៅសើមជាអាចបង្កជាមេរោគដោយងាយ។
៦. សាប៊ូដុំដុសខ្លួន
មនុស្សភាគច្រើនគិតថាសាប៊ូដុសខ្លួនមានសមត្ថភាពសម្លាប់មេរោគ អ៊ីចឹងប្រើរួមគ្នាប្រហែលមិនអីទេ។ ការគិតបែបនេះគឺមិនត្រឹមត្រូវឡើយ ព្រោះមេរោគខ្លះមិនអាចសម្លាប់បានទាំងអស់នោះទេ ហើយវានឹងស្ថិតនៅជាប់សាប៊ូ ពេលមនុស្សម្នាក់ទៀតយកទៅដុសខ្លួន វានឹងតោងជាប់ស្បែកជាមិនខាន។
៧. ក្រាស់សិតសក់
កុំប្រើក្រាស់របស់អ្នកដទៃមកសិតលើសក់របស់អ្នកឡើយ ព្រោះវាអាចបង្កជាការចម្លងរបស់មិនស្អាត ដូចជាចៃ អង្គែ ឬកមដែលមាននៅលើស្បែកគេដោយមិនដឹងខ្លួន។
៨. កន្សែងជូតខ្លួន
ការពិតកន្សែងជូតខ្លួនគឺជាសម្បុកសម្រាប់មេរោគយ៉ាងងាយ ជាពិសេសកាលណាព្យួរកន្សែងក្នុងបន្ទប់ទឹកដែលមានសភាពសើមជាប់ វានឹងមានក្លិនផ្អួរ ឬដុះផ្សិតដែលបង្កជាមេរោគផ្សេងៗ។ ជាលទ្ធផល បើអ្នកប្រើកន្សែងរួមគ្នា ឬសូម្បីតែប្រើម្នាក់ឯងក៏ដោយតែមិនបានសម្អាតឱ្យស្អាត វានឹងធ្វើឱ្យអ្នកឡើងមុន កើតរមាស់ ឬកន្ទួលលើស្បែកជាដើម។
៩. កាសស្ដាប់ត្រចៀក
ដូចគ្នាដែរ ទោះមិនបាច់ប្រាប់ក៏មានអារម្មណ៍ថារអើម ពេលប្រើកាសរួមគ្នាដែរ។ ហេតុផលគឺថា ក្នុងត្រចៀកមនុស្សម្នាក់សុទ្ធតែមានរបស់មិនស្អាត ហើយបើយកពីត្រចៀកគេដែលពាក់ហើយមកដាក់ក្នុងត្រចៀកយើង គឺច្បាស់ជារបស់មិនស្អាតទាំងនោះចូលមកក្នុងត្រចៀកយើងដែរមិនខាន។
១០. ជក់ឬប៉ុងផាត់មុខ
បើអ្នកមិនចង់ដេកខូចចិត្តរឿងឡើងមុនលើមុខទេនោះ ដាច់ខាតមិនត្រូវខ្ចី ឬឱ្យអ្នកណាខ្ចីជក់ឬប៉ុងផាត់មុខឡើយ។ ធម្មតាស្បែកមនុស្សយើងមានសភាពខុសគ្នា អ្នកខ្លះក៏ស្បែកស្ងួត អ្នកខ្លះស្បែកឡើងប្រេង អ្នកខ្លះរន្ធញើសធំ-តូច ខុសគ្នាៗគ្នា។ ដូច្នេះបើយកជក់ ឬប៉ុងដែលប៉ះផ្ទាល់លើស្បែកមុខមកប្រើរួមគ្នា វានឹងបង្កជាមេរោគ ឬមុនលើស្បែកបាន។ វិធីល្អបំផុត គឺទិញជក់និងប៉ុងរៀងខ្លួន ហើយប្រើដោយឧស្សាហ៍សម្អាតទើបសុវត្ថិភាព។
ក្រៅពីរបស់ដូចបានរៀបរាប់ខាងលើនេះ ក៏នៅមានរបស់ផ្សេងទៀតដែលអ្នកមិនគួរប្រើរួមគ្នាឡើយដូចជា ច្រាសដុសធ្មេញ ប្រដាប់កោរពុកមាត់ជាដើម ព្រោះមេរោគមាននៅគ្រប់កន្លែង ហើយមនុស្សម្នាក់ៗក៏មានការសម្អាតខុសៗគ្នា ស្ថានភាពសុខភាពក៏ខុសគ្នាដែលគួរមានរបស់ផ្ទាល់ខ្លួន ជាជាងប្រើជាមួយគ្នា៕