កុំរៀបការដោយសារតែដល់អាយុ ចាំដល់រកមនុស្សដែលខ្លួនពេញចិត្តឃើញសិនទៅ

2019-01-20 00:26:00
ចំនួនមតិ 0 | ចំនួនចែករំលែក 0

អាយុក្បែរ ៣០ទៅហើយនៅមិនទាន់រៀបការ ក្នុងជីវិតជាក់ស្ដែងគឺមិនងាយស្រួលដូចដែលមាត់និយាយថា «គ្មានបញ្ហាទេ ម្នាក់ឯងក៏បានដែរ»។ គំនាបសម្រាប់មនុស្សស្រីអាយុប៉ុណ្ណេះពិតជាលំបាកណាស់ ព្រោះត្រូវគិតថាគួររៀបការតាមចាស់ទុំ ឬរង់ចាំជួបមនុស្សដែលខ្លួនពេញចិត្តបន្តទៀត។

វ័យមួយដែលគេមានកូន ២ ៣ទៅហើយ ខ្ញុំវិញនៅតែរកមិនឃើញមនុស្សដែលត្រូវចិត្តម្នាក់។ ជួបមុខប៉ាម៉ាក់ខ្ញុំត្រូវបង្ខំចិត្តបិទភ្នែក បិទត្រចៀក ព្រោះគាត់តែងសួរខ្ញុំថា អាយុច្រើនហើយនៅធ្វើអីទៀត? គិតចង់ឲ្យពូកគាត់ជរាដើរលែងរួចទើបយកប្ដីមែនទេ?

ឮប្រយោគទាំងនេះហើយធ្វើឲ្យខ្ញុំពិបាកចិត្តណាស់ ព្រោះក៏មានអារម្មណ៍ថាប៉ាម៉ាក់និយាយត្រូវម្យ៉ាងដែរ។ អាយុក្បែរ ៣០ទៅហើយ ពិសេសខ្ញុំជាមនុស្សស្រីទៀតគឺសឹងតែជ្រេវ័យរៀបការទៅហើយ។ ការពិតខ្ញុំក៏ចង់រៀបការដែរ តែមិនដឹងថារៀបការជាមួយអ្នកណា? បើខ្ញុំមិនទាន់រកឃើញមនុស្សដែលខ្ញុំចង់រៀបការជាមួយផង។

ខ្ញុំពិបាកនឹងស្រមៃថាខ្លួនឯងរៀបការជាមួយមនុស្សដែលមិនស្រឡាញ់ណាស់ណាស់។ តើខ្ញុំត្រូវធ្វើមុខបែបណាពេលឃើញមុខគ្នា? តើត្រូវធ្វើចរិតបែបណាពេលនៅជាមួយគ្នា? ហើយតើខ្ញុំអាចគេងឱបគេយ៉ាងម៉េចបាន បើមិនបានស្រឡាញ់គ្នាផង។

អារម្មណ៍នេះដូចឲ្យខ្ញុំចុះនរកអីចឹង ព្រោះទោះរៀបការហើយក៏ខ្ញុំគ្មានជំនឿចិត្តនឹងមានសុភមង្គលដែរ។ សម្ពាធនេះគ្មានអ្នកណាយល់ក្រៅពីមនុស្សស្រីដែលស្ថិតក្នុងសភាពបែបនេះទេ។

ខ្ញុំសុខចិត្តនៅម្នាក់ឯង ក៏មិនរៀបការដែរបើខ្ញុំមិនទាន់រកមនុស្សពេញចិត្តឃើញ ព្រោះខ្ញុំខ្លាច ខ្លាចនឹងប្រឈមរឿងរកាំរកូស មិនអាចរួមរស់ជាមួយគ្នាបាន ហើយចុងក្រោយសល់ឈ្មោះត្រឹមជា «មេម៉ាយ»។