ស្រីៗពេលនៅលីវ ចូលចិត្តធ្វើខ្លួន ចុះក្រោយមានប្ដីម៉េចវិញ?

2017-03-13 02:46:08
ចំនួនមតិ 0 | ចំនួនចែករំលែក 0

ការតុបតែងខ្លួនជារឿងដែលមនុស្សស្រីចូលចិត្តសឹងតែគ្រប់គ្នា ជាពិសេសមុនពេលមានគ្រួសារ(ប្ដី)។ ចុះមានឆ្ងល់ទេ ក្រោយពេលគ្រួសារ នារីៗនៅខ្វល់ពីរឿងនេះហ្នឹងទៀតអត់? អានមតិរបស់ស្ត្រីដែលមានប្ដី ប្រិយមិត្តនឹងលែងឆ្ងល់!

រូបតំណាង

សូនីតា៖ ខ្ញុំរៀបការបាន៣ឆ្នាំហើយ មុនពេលការ ខ្ញុំស្រលាញ់រូបរាងណាស់ ខ្លាចធាត់ ខ្លាចខ្មៅ ។ តែដល់ពេលមានប្ដី បែរជាលែងខ្វល់ពីរឿងអស់ហ្នឹងទៅវិញ។

ពិសី៖ ចង់នៅតែចង់ស្អាតហ្នឹង តែប្ដីខ្ញុំប៉ិនប្រច័ណ្ឌណាស់ ហ៊ានតែតែងខ្លួនខុសធម្មតា មុខតែនិយាយផ្លែផ្កា ឌឺដង។ អញ្ចឹងខ្ជិលហ្មងទៅ កុំឲ្យមានរឿងវែងឆ្ងាយ បើប្ដីគេមិនចូលចិត្តហើយ។

ពេជ្រ៖ មិនដឹងជាត្រូវតែងខ្លួនឲ្យអ្នកណាមើលផង បើមានប្ដីហើយ ។ ណាមួយកូន២-៣ រវល់តែនៅមុខកញ្ចក់ កូនចៅគិតម៉េច? រាល់ថ្ងៃសឹងតែគ្មានពេលហូបបាយផងហ្នឹង។

សុបញ្ញា៖ មិនអត់សោះទេ ទៅណាមកណាត្រូវមានក្រែម មានម្សៅខ្លះដែរ។ ព្រោះខ្លាចប្ដីខ្មាសគេបើមានប្រពន្ធ មើលមិនយល់ អញ្ចឹងហើយ ចេះតែងធ្វើល្មមៗទៅ។

រដ្ឋា៖ ការ បួនដប់ ឆ្នាំហើយ រឿងតែងខ្លួនមិនឲ្យចាញ់អ្នកនៅលីវទេ និយាយត្រង់ហ្មង។ ចង់អ្នកណាគិតអីគិតទៅ ព្រោះពេលស្អាត គឺស្អាតខ្លួនយើងទេ បើមិនតែងខ្លួនសោះ ពេលប្ដីមានក្រៅ កុំបន្ទោសគេមកពីយើងមិនចេះស្រលាញ់ខ្លួន អញ្ចឹងម៉េចគេស្រលាញ់យើង?

ចុះ មិត្តនារីដទៃទៀតគិតម៉េចវិញ? បើមានប្ដី នៅតែងខ្លួនដូចនៅក្រមុំអត់?

អត្ថបទៈ តាំង ដាលីន