នេះជាហេតុផលដែលម្ដាយគួរឲ្យកូនតូចមានសត្វចិញ្ចឹម

2017-02-03 09:53:04
ចំនួនមតិ 0 | ចំនួនចែករំលែក 0

មានហេតុផលវិជ្ជមានជាច្រើនដែលបង្ហាញថាយើងគួរឲ្យកូនមានសត្វចិញ្ចឹមដែលគេស្រឡាញ់។ សត្វទាំងនោះមិនត្រឹមតែបង្រៀនកូនពីរឿងជាច្រើនប៉ុណ្ណោះទេ តែក៏ជាមិត្តសំឡាញ់ដ៏ជិតស្និទ្ធម្នាក់ផងដែរ។

១. មានទំនួលខុសត្រូវ៖ ក្មេងអាចមានចំណុចទាំងនេះបានដោយសារតែគេមានសត្វដែលត្រូវយកចិត្តទុកដាក់ ថែរក្សាឲ្យមានសុខភាពល្អ។ ធ្វើបែបនេះជាប្រចាំនឹងបង្កើតឲ្យមានក្ដីស្រឡាញ់, អាណិត និងមេត្តា រវាងកូនៗ និងសត្វចិញ្ចឹម។

២. មានទំនុកចិត្តលើខ្លួនឯង៖ ដរាបណាគេមានទំនួលខុសត្រូវ គេក៏មានទំនុកចិត្តដែរ។ ក្មេងដែលចេះមើលថែសត្វសំណព្វរបស់ខ្លួនបានហើយ ពួកគេនឹងមានមោទនភាពលើខ្លួនឯង។

៣.ជួយដល់ការលូតលាស់ក្មេង៖ សត្វចិញ្ចឹម ជាពិសេសសត្វឆ្កែត្រូវការលេង ដែលធ្វើឲ្យក្មេងៗបានសប្បាយផង និងហាត់ប្រាណផងក្នុងពេលតែមួយ។ ពួកគេអាចរត់លេងជាមួយសត្វចិញ្ចឹមរបស់គេជាជាងចំណាយពេលនៅតែជាមួយ Smartphones ។

៤. ចេះគ្រប់គ្រងអារម្មណ៍៖ មិនថាពិបាកចិត្ត ឬសប្បាយចិត្ត ក្មេងៗអាចចែករំលែកអារម្មណ៍របស់គេជាមួយនឹងសត្វជាទីស្រឡាញ់។ រោមដ៏ទន់ៗរបស់វាអាចឲ្យម្ចាស់មានអារម្មណ៍ល្អឡើងបាន។

៥. បង្កើតទម្លាប់៖ សត្វចិញ្ចឹមមិនដូចជារបស់របរដែលអាចដាក់ចោលបានទេ។ ពួកវាត្រូវការចំណី, ទឹក, ការសម្អាត ឬរត់លេង ដែលទាំងអស់នេះធ្វើឲ្យកូនៗបង្កើតទម្លាប់ល្អរាល់ថ្ងៃ។

៦. មានវិន័យ៖ គេត្រូវបង្រៀនឆ្កែឲ្យចេះស្ដាប់ ចេះស្គាល់កាយវិការម្ចាស់ដែលអ្នកវិទ្យាសាស្ត្របានអះអាងថាអាចជួយឲ្យកូនៗខ្លួនឯងមានវិន័យផ្ទាល់ខ្លួនដែរ។

៧. ការផ្លាស់ប្ដូរក្នុងជីវិត៖ ក្ដីស្រឡាញ់ និងចេះទទួលខុសត្រូវទាំងប៉ុន្មានដែលក្មេងៗមាននឹងក្លាយជាទម្លាប់របស់គេ ហើយវានឹងធ្វើឲ្យជីវិតគេផ្លាស់ប្ដូរទៅរកភាពប្រសើរឡើង៕