គន្លឹះបីសំខាន់ៗ ជួយបង្ការបញ្ហាគ្រោះថ្នាក់សរសៃឈាមខួរក្បាល

2024-03-30 03:55:00
ចំនួនមតិ 0 | ចំនួនចែករំលែក 0

មិនទាន់យឺតពេលទេក្នុងការយកចិត្តទុកដាក់លើការបង្ការបញ្ហា ឬជំងឺគ្រោះថ្នាក់សរសៃឈាមខួរក្បាល មិនថាយើងស្ថិតក្នុងវ័យណាក៏ដោយ។ ជាការពិតវ័យកាន់តែច្រើនក៏នឹងធ្វើឲ្យយើងកាន់តែប្រឈមនឹងគ្រោះថ្នាក់មួយនេះដែរ។ ការយល់ដឹងពីវិធីបង្ការគឺជារឿងចាំបាច់ ហើយវិធីបង្ការខ្លះមិនជាលំបាកណាស់ណាទេ ហើយយើងទាំងអស់គ្នាពិតជាអាចធ្វើបាន។

ញ៉ាំអាហារមានជាតិប្រៃតិច

អ្នកខ្លះងាយប្រតិកម្មទៅនឹងជាតិប្រៃណាស់ ដែលងាយនឹងធ្វើឲ្យអ្នកទាំងនោះឡើងសម្ពាធឈាម។ ការណ៍នេះមានន័យថាកាលណាញ៉ាំអាហារមានជាតិប្រៃច្រើន អ្នកនោះនឹងកើនឡើងសម្ពាធឈាម ដែលនឹងបង្កើនហានិភ័យនៃការកើតជំងឺបេះដូង និងជំងឺគ្រោះថ្នាក់សរសៃឈាមខួរក្បាល។

បើសិនជាយើងកាត់បន្ថយទម្លាប់ញ៉ាំអាហារប្រៃ ឬកាត់បន្ថយបរិមាណអំបិលបានកាន់តែតិច នោះយើងក៏បានកាត់បន្ថយបញ្ហាប្រឈមនឹងការឡើងសម្ពាធឈាម ហើយនាំឲ្យយើងអាចកាត់បន្ថយហានិភ័យគ្រោះថ្នាក់សរសៃឈាមខួរក្បាលដូចគ្នា។ អាហារសម្បូរអំបិលមានដូចជាអាហារកំប៉ុង អាហារ Fast Food នំកញ្ចប់ និងអាហារជ្រក់ជាដើម។

ញ៉ាំបន្លែ និងផ្លែឈើឲ្យបានច្រើនមុខ

ផ្លែឈើជាច្រើនប្រភេទមានផ្ទុកជាតិសរសៃ សារធាតុប្រឆាំងអុកស៊ីតកម្ម និងទំនងជាអាចកាត់បន្ថយការរលាក ព្រមទាំងអាចការពារបញ្ហាដុំកំណកឈាម និងជួយដល់សុខភាពបេះដូងផងដែរ។ ការសិក្សារកឃើញថាញ៉ាំផ្លែឈើ និងបន្លែដែលមានវីតាមីន C អាចជួយកាត់បន្ថយហានិភ័យកើតបញ្ហាគ្រោះថ្នាក់សរសៃឈាមខួរក្បាល។

ដូចគ្នាដែរ បន្លែក៏មានផ្ទុកទៅដោយវីតាមីនជាច្រើនមុខ រ៉ែច្រើនប្រភេទ និងជាតិសរសៃទៀតផង។ ការសិក្សាកន្លងមករកឃើញថា ជាតិសរសៃអាចជួយបញ្ចុះសម្ពាធឈាម និងបញ្ចុះកម្រិតកូលេស ដែលបញ្ហាទាំងនេះអាចបង្កហានិភ័យឲ្យមានគ្រោះថ្នាក់សរសៃឈាមខួរក្បាល។

លំហាត់ប្រាណ

ការធ្វើលំហាត់ប្រាណមិនត្រឹមតែជួយដល់សុខភាពទូទៅប៉ុណ្ណោះទេ តែក៏ជួយឲ្យស្រកទម្ងន់ បញ្ចុះសម្ពាធឈាម និងកាត់បន្ថយហានិភ័យជំងឺគ្រោះថ្នាក់សរសៃឈាមខួរក្បាលដែរ។ បើយើងមិនអាចទៅក្លឹបហាត់ប្រាណ យើងអាចហាត់ប្រាណក្នុងទម្រង់ដូចជាដើរ រត់ត្រឹកៗ ឬជិះកង់ ឲ្យបានបួនទៅប្រាំដងក្នុងមួយសប្ដាហ៍ និងម្ដងៗបានយ៉ាងតិច៣០នាទី។

ក្រៅពីអ្វីទាំងនេះ ការកម្រិតការផឹកគ្រឿងស្រវឹង ការគ្រប់គ្រងជំងឺទឹកនោមផ្អែមបានល្អ ក៏ដូចជាការឈប់ជក់បារី គឺសុទ្ធតែរួមចំណែកក្នុងការបង្ការបញ្ហាគ្រោះថ្នាក់សរសៃឈាមខួរក្បាល។

ប្រភព៖ Harvard ប្រែសម្រួល៖ សុខា