អាហារគួរចៀសវាង ឬកាត់បន្ថយពេលអាកាសធាតុក្ដៅ

2024-03-11 13:15:57
ចំនួនមតិ 0 | ចំនួនចែករំលែក 0

ការរក្សាជាតិទឹកក្នុងរាងកាយឲ្យបានល្អគឺជារឿងចាំបាច់មួយក្នុងពេលដែលអាកាសធាតុកំពុងឡើងកម្ដៅ។ ក្រៅពីការញ៉ាំទឹកឲ្យបានគ្រប់គ្រាន់ យើងក៏គួរយកចិត្តទុកដាក់លើអាហារមួយចំនួនដែរ។ អាហារខ្លះជួយបន្ថែមជាតិទឹកដល់រាងកាយ ខណៈអាហារខ្លះទៀតធ្វើឲ្យរាងកាយឡើងកម្ដៅ និងងាយបាត់បង់ជាតិទឹកទៅវិញ។ អីចឹងតើអាហារណាខ្លះគួរចៀសវាង ឬកាត់បន្ថយការញ៉ាំ?

អាហារប្រៃ

ញ៉ាំអាហារមានជាតិប្រៃខ្ពស់ អាចនាំឲ្យមានផលមិនល្អលើសុខភាព រួមមានដូចជាហើមពោះ ឡើងសម្ពាធឈាម និងជំងឺបេះដូងជាដើម។ បន្ថែមពីនេះការញ៉ាំអាហារប្រៃ ឬមានសូដ្យូមខ្ពស់ក៏អាចធ្វើឲ្យតម្រងនោមដំណើរការមិនបានល្អ និងធ្វើឲ្យរាងកាយបាត់បង់ជាតិទឹក។ ការណ៍នេះមានន័យថារាងកាយនឹងរុញច្រានទឹកចេញពីកោសិកា។ ដូចនេះ គួរកាត់បន្ថយអំបិលក្នុងរបបអាហារ។

កាហ្វេ និងតែ

បើចង់រក្សាជាតិទឹកក្នុងរាងកាយបានល្អ គួរកាត់បន្ថយការញ៉ាំកាហ្វេក្ដៅ ឬតែក្ដៅក្នុងពេលអាកាសធាតុកំពុងតែឡើងកម្ដៅ។ ការញ៉ាំតែក្ដៅ និងកាហ្វេក្ដៅអាចធ្វើឲ្យរាងកាយយើងឡើងកម្ដៅ និងរំខានដល់ការរំលាយអាហារ។

អាហារហឹរ

ជាធម្មតាក្នុងរដូវក្ដៅ គឺមានការណែនាំឲ្យកាត់បន្ថយការញ៉ាំអាហារមានជាតិហឹរ។ អាហារហឹរអាចជំរុញឲ្យរាងកាយបញ្ចេញកម្ដៅ ដែលជាលទ្ធផលធ្វើឲ្យរាងកាយបញ្ចេញញើសច្រើន បាត់បង់ជាតិទឹក និងអាចធ្លាក់ខ្លួនឈឺក៏មាន។

ពពួកអាហារចៀន និង Fast Food

ពពួកអាហារទាំងនេះ គឺមិនសូវល្អចំពោះសុខភាពស្រេចទៅហើយបើយើងញ៉ាំច្រើន ឬ ញឹកញាប់ មិនថាពេលណានោះទេ។ ប៉ុន្តែសម្រាប់ពេលមានអាកាសធាតុក្ដៅ អាហារទាំងនេះក៏មិនគួរញ៉ាំ ឬគួរកាត់បន្ថយការញ៉ាំទើបជារឿងល្អ ព្រោះថាអាហារទាំងនេះអាចធ្វើឲ្យរាងកាយបាត់បង់ជាតិទឹក ព្រមទាំងពិបាករំលាយអាហារទៀតផង។

ប្រភព៖ ប្រភព ប្រែសម្រួល៖ សុខា