ផលវិបាកភ្នែកឡើងបាយ អាចធ្វើឲ្យមើលលែងឃើញ

2024-03-10 02:11:44
ចំនួនមតិ 0 | ចំនួនចែករំលែក 0

ភ្នែកឡើងបាយជាជំងឺមួយដែលអាចព្យាបាលជាសះស្បើយ និងអាចជួយឲ្យអ្នកជំងឺអាចមើលឃើញច្បាស់ឡើងវិញតាមរយៈការវះកាត់ដោយគ្រូពេទ្យឯកទេស។ ប៉ុន្តែបើសិនជាទុកមិនព្យាបាល ឬព្យាបាលមិនបានត្រឹមត្រូវអាចធ្វើឲ្យអ្នកជំងឺងងឹតភ្នែកទាំងស្រុងបាន។

អ្វីជាជំងឺភ្នែកឡើងបាយ?

បើតាមសំណេររបស់មន្ទីរពេទ្យកាល់ម៉ែត ភ្នែកឡើងបាយជាជំងឺមួយដែលកើតលើកែវភ្នែកស្ថិតនៅពីក្រោយកូនក្រមុំ ដោយកែវភ្នែកដែលមានសភាពថ្លាច្បាស់បែរជាមានភាពស្រអាប់ ឬឡើងពណ៌ស។ ការឡើងបែបនេះធ្វើឲ្យពន្លឺ និងរូបភាពមិនអាចឆ្លងកាត់ទៅចំកន្លែងចាប់រូបភាពនៅបាតភ្នែកបាន ទើបធ្វើឲ្យគំហើញមានការថយចុះ។

រោគសញ្ញាភ្នែកឡើងបាយ

បើតាមមន្ទីរពេទ្យកាល់ម៉ែតដែល អាការៈ និងរោគសញ្ញាភ្នែកឡើងបាយចម្បងគេគឺធ្វើឲ្យគំហើញមានការថយចុះបន្តិចម្ដងៗ។ ក្រៅពីនេះនៅមានអាការៈផ្សេងទៀតដូចជា៖

មើលឃើញបានច្បាស់បន្តិចតែពេលនៅក្នុងម្លប់ ឬពេលរសៀល
មើលឃើញបែកផ្សែង និងស្រវាំងភ្នែកជាងធម្មតាពេលត្រូវពន្លឺថ្ងៃខ្លាំង ឬមានពន្លឺចាំងចំភ្នែកនៅពេលយប់
កូនក្រមុំមានពណ៌ស និងអាចមើលឃើញដោយភ្នែកទទេ
ករណីស្រាលអ្នកជំងឺមើលឆ្ងាយមិនច្បាស់ ដោយអាចត្រូវផ្លាស់ប្ដូរវ៉ែនតាញឹកញាប់
ករណីធ្ងន់កម្រិតបាយឡើងស្រអាប់ខ្លាំង អ្នកជំងឺមិនអាចមើលឃើញច្បាស់ទាំងឆ្ងាយ និងជិត

មូលហេតុបង្ក

មូលហេតុបង្កឲ្យភ្នែកឡើងបាយមានច្រើនយ៉ាង ដូចជាកត្តាវ័យ អ្នកមានជំងឺទឹកនោមផ្អែម ជំងឺរលាកប្រស្រីភ្នែក ការប៉ះទង្គិច ឬរបួសលើគ្រាប់ភ្នែកជាដើម។ ក្រៅពីនេះការធ្វើការក្រោមកម្ដៅថ្ងៃខ្លាំងញឹកញាប់ ក៏ជាកត្តាប្រឈមដែរ។ បន្ថែមពីនេះ ការប្រើប្រាស់ថ្នាំបន្តក់ភ្នែកហួសកម្រិត ចំពោះអ្នកជំងឺរលាកភ្នែក ឬភ្នែកក្រហម ក៏អាចបណ្ដាលឲ្យឡើងបាយនេះដែរ។ នេះបើតាមប្រភពពីមន្ទីរពេទ្យកាល់ម៉ែតដែលបានសរសេរលើហ្វេកប៊ុកផេករបស់ខ្លួនដដែល។

សម្រាប់អ្នកមានរោគសញ្ញាគួរឲ្យសង្ស័យថាកើតជំងឺនេះ គួរស្វែងរកការពិគ្រោះ និងព្យាបាលឲ្យបានត្រឹមត្រូវនៅតាមមន្ទីរពេទ្យដែលមានគ្រូពេទ្យឯកទេសច្បាស់លាស់។ ការទុកមិនព្យាបាល ឬព្យាបាលមិនបានត្រូវអាចធ្វើឲ្យងងឹតភ្នែកទាំងស្រុង រលាកឈឺចុកចាប់ក្នុងភ្នែក និងឈឺក្បាលខ្លាំង ឬអាចឈានដល់រលាកបាតភ្នែក ឬរបើកបាតភ្នែក។

ប្រភព៖ ប្រភព ប្រែសម្រួល៖ សុខា