បញ្ហាលើសសម្ពាធឈាមអាចបង្កើនហានិភ័យជំងឺបេះដូង

2024-03-08 00:21:00
ចំនួនមតិ 0 | ចំនួនចែករំលែក 0

ការសិក្សាមួយធ្វើឡើងនៅប្រទេសអូស្រា្តលីបានលើកឡើងថាបញ្ហាលើសសម្ពាធឈាមជាកត្តាចម្បងមួយបណ្ដាលឲ្យមានអ្នកស្លាប់ក្នុងចំណោមប្រជាជនអូស្រ្តាលីសម្រាប់រយៈពេលជាង៣០ឆ្នាំកន្លងមកនេះ។ បន្ថែមពីនេះបញ្ហាលើសសម្ពាធឈាមជាដើមចមមួយនាំឲ្យមានជំងឺបេះដូង និងបង្កឲ្យអ្នកជំងឺបាត់បង់ជីវិត។

ដូចគ្នាដែរ CDC អាមេរិកបញ្ជាក់ថាបញ្ហាលើសសម្ពាធឈាមជាកត្តាហានិភ័យធំមួយនាំឲ្យមានជំងឺបេះដូង។ បញ្ហាលើសសម្ពាធឈាមដែលមិនបានទទួលការព្យាបាលត្រឹមត្រូវអាចធ្វើឲ្យមានការខូចខាតសរសៃឈាមបេះដូង។ ការខូចខាតសរសៃឈាមបេះដូង បានធ្វើឲ្យកាត់បន្ថយលំហូររបស់ឈាម និងអុកស៊ីសែនទៅកាន់បេះដូង។ វាក៏អាចបង្កឲ្យសរសៃឈាមទៅកាន់ខួរក្បាលបែក ឬស្ទះផងដែរ។

បញ្ហាលើសសម្ពាធឈាម និងជំងឺបេះដូង

ការសិក្សាធ្វើឡើងពីឆ្នាំ១៩៩០ដល់ឆ្នាំ២០១៩ ដោយកំណត់ការសិក្សាសំខាន់លើកត្តានាំឲ្យមនុស្សបាត់បង់ជីវិត រួមទាំងកត្តាជំងឺបេះដូងផងដែរ។ ពេលវិភាគទិន្នន័យដែលប្រមូលបាន អ្នកស្រាវជ្រាវបានរកឃើញថាបញ្ហាលើសសម្ពាធឈាមបានរួមចំណែកធ្វើឲ្យមនុស្សបាត់បង់ជីវិត៤៤ភាគរយ។ បញ្ហាលើសសម្ពាធឈាមក៏ជាប់ជាកត្តានាំឲ្យមនុស្សស្លាប់ច្រើន បន្ទាប់ពីឆ្នាំជក់ និងបង្កឲ្យមានជំងឺបេះដូងដែរ។

គន្លឹះគ្រប់គ្រងសម្ពាធឈាមឲ្យបានល្អ

ក្រោយគ្រូពេទ្យវិនិច្ឆ័យឃើញថាយើងមានបញ្ហាលើសសម្ពាធឈាម ការអនុវត្តតាមការណែនាំរបស់គ្រូពេទ្យជារឿងចាំបាច់។ គ្រូពេទ្យអាចណែនាំឲ្យមានរបបអាហារល្អចំពោះសុខភាព និងហាត់ប្រាណជាប្រចាំជាដើម។ ដូចគ្នាការកម្រិតការផឹកគ្រឿងស្រវឹង និងការឈប់ជក់បារី ក៏រួមចំណែកជួយដល់ការគ្រប់គ្រងសម្ពាធឈាមផងដែរ។

ក្រៅពីនេះ ការគេងឲ្យបានគ្រប់គ្រាន់ និងចៀសវាងអាហារប្រៃ ក៏ជារឿងសំខាន់មួយដែរសម្រាប់អ្នកមានបញ្ហាលើសសម្ពាធឈាម។ ការសិក្សាបានបញ្ជាក់ដែរថា កាលណាយើងគ្រប់គ្រងបញ្ហាលើសសម្ពាធឈាមបានល្អ ក៏បានកាត់បន្ថយហានិភ័យកើតជំងឺបេះដូងដូចគ្នា។

ប្រភព៖ healthline ប្រែសម្រួល៖ សុខា