តិចនិកសំខាន់ៗជួយស្រ្តីវ័យអស់រដូវការពារសុខភាពបេះដូង

2023-12-24 00:11:00
ចំនួនមតិ 0 | ចំនួនចែករំលែក 0

ស្រ្តីក្នុងវ័យអស់រដូវអាចមានហានិភ័យខ្ពស់ក្នុងការកើតជំងឺបេះដូងជាងកាលនៅវ័យបន្តពូជ។ អ័រម៉ូនអឺស្រ្តូហ្សែនជួយការពារសុខភាពបេះដូង ប៉ុន្តែនៅពេលអស់រដូវអ័រម៉ូនមួយប្រភេទនេះក៏ធ្លាក់ចុះដែរ។ ការណ៍នេះអាចធ្វើឲ្យស្រ្តីក្រោយអស់រដូវមានហានិភ័យកើតជំងឺបេះដូងកើនឡើង។ ដើម្បីការពារសុខភាពបេះដូង ស្រ្តីក្រោយអស់រដូវគួរអនុវត្តគន្លឹះសំខាន់ៗមួយចំនួននេះ។

ហាត់ប្រាណជាប្រចាំ៖ ការហាត់ប្រាណដូចជាជិះកង់ ដើរ រត់ត្រឹកៗ ឬហែលទឹក សុទ្ធតែមានប្រយោជន៍ចំពោះសុខភាព ក្រៅពីជួយដល់សុខភាពបេះដូង ក៏អាចជួយពង្រឹងសាច់ដុំ និងសុខភាពឆ្អឹង។ ការហាត់ប្រាណគួរធ្វើឲ្យបានយ៉ាងតិច៣០នាទីក្នុងមួយថ្ងៃ។

ញ៉ាំអាហារល្អចំពោះសុខភាព៖ អាហារដែលល្អចំពោះសុខភាពបេះដូងមានដូចជាបន្លែ ផ្លែឈើ គ្រាប់ផ្លែឈើ សាច់គ្មានខ្លាញ់ និងខ្លាញ់ល្អ។ ដូចគ្នាដែរ ស្រ្តីស្ថិតក្នុងវ័យនេះក៏គួរកាត់បន្ថយញ៉ាំអាហារប្រៃ ឬអាហារមានខ្លាញ់ចម្រាញ់ច្រើន។

រក្សាទម្ងន់ខ្លួនឲ្យបានល្អ៖ ក្នុងវ័យនេះស្រ្តីត្រូវយកចិត្តទុកដាក់រក្សាទម្ងន់ខ្លួនឲ្យនៅល្អមិនឲ្យធាត់លើសទម្ងន់។ ការរក្សាទម្ងន់ឲ្យនៅល្អបានគឺត្រូវយកចិត្តទុកដាក់លើរបបអាហារ និងការហាត់ប្រាណ។ ការឡើងគីឡូខ្លាំង និងមានខ្លាញ់នៅក្បាលពោះច្រើនអាចធ្វើឲ្យមានហានិភ័យជំងឺបេះដូងកាន់តែខ្ពស់ដែរ។

ឈប់ជក់បារី និងកម្រិតការផឹកគ្រឿងស្រវឹង៖ ការជក់បារី គឺជាកត្តាធំមួយដែលនាំឲ្យមានជំងឺបេះដូង។ ដូចគ្នាដែរ ការផឹកគ្រឿងស្រវឹងច្រើនអាចនាំឲ្យសម្ពាធឈាមឡើងខ្ពស់ និងបង្កជំងឺដល់បេះដូង។ ឈប់ជក់បារី និងកម្រិតការផឹកគ្រឿងស្រវឹងជាជម្រើសល្អសម្រាប់សុខភាព។

ឆែកសុខភាពជាប្រចាំ៖ ការពិនិត្យសុខភាពបានទៀងទាត់ អាចជួយឲ្យយើងដឹងពីស្ថានភាពទូទៅនៃរាងកាយ។ គ្រូពេទ្យអាចតាមដានលើសម្ពាធឈាម ជាតិខ្លាញ់ និងកត្តាហានិភ័យនៃជំងឺបេះដូងជាដើម។ ក្រៅពីនេះ បើមានសញ្ញាណាមួយគួរឲ្យសង្ស័យ យើងអាចឲ្យគ្រូពេទ្យដឹងបានទាន់ពេលវេលា។

ប្រភព៖ ប្រភព ប្រែសម្រួល៖ សុខា