តើធាត់លើសទម្ងន់ធ្វើឲ្យប្រុសៗប្រឈមបញ្ហាខ្សោយលិង្គ?

2023-11-11 00:08:00
ចំនួនមតិ 0 | ចំនួនចែករំលែក 0

ពេលនិយាយពីរឿងធាត់លើសទម្ងន់ ជាទូទៅគេអាចគិតដល់ជំងឺមួយចំនួនដែលអាចកើតចេញពីបញ្ហានេះ។ អ្នកដែលមានបញ្ហាធាត់លើសទម្ងន់អាចប្រឈមនឹងជំងឺទឹកនោមផ្អែម ជំងឺបេះដូង បញ្ហាលើសសម្ពាធឈាម លើសកូលេស្តេរ៉ូល និងជំងឺគេងបាត់ដង្ហើមជាដើម។ បញ្ហាធាត់លើសទម្ងន់ក៏អាចមានផលរំខានមួយទៀតដែរ គឺបញ្ហាលិង្គមិនឡើងរឹង ឬខ្សោយលិង្គ។ តើមានទំនាក់ទំនងគ្នាបែបណា?

បុរសជាច្រើនដែលមានបញ្ហាធាត់លើសទម្ងន់ ក៏អាចជួបបញ្ហាលិង្គមិនឡើងរឹង។ អ្នកជំនាញផ្នែកប្រព័ន្ធទឹកនោមបានឲ្យដឹងថាប្រហែលជា៥៣ភាគរយនៃបុរសមានវ័យចន្លោះពី៤០ទៅ៧០ឆ្នាំ ជួបផលរំខានបញ្ហាលិង្គមិនឡើងរឹងក្នុងកម្រិតណាមួយ។

ការសិក្សាជាច្រើនយល់ឃើញមិនដូចគ្នា ឬមិនច្បាស់លាស់ពីបញ្ហាធាត់លើសទម្ងន់និងបញ្ហាលិង្គមិនឡើងរឹង ឬខ្សោយលិង្គ ឬការសិក្សាខ្លះបានរកឃើញត្រឹមថាភាពធាត់មានទំនាក់ទំនងទៅនឹងកត្តាប្រឈម។ ប៉ុន្តែអ្វីដែលច្បាស់លាស់ គឺថាភាពធាត់រួមចំណែកទៅជំរុញឲ្យមានកត្តាប្រឈមផ្សេងៗដែលនាំឲ្យមានបញ្ហាខ្សោយលិង្គ។

កត្តាវ័យជាបញ្ហាប្រឈមមួយនាំឲ្យមានបញ្ហាខ្សោយលិង្គ។ កត្តាវ័យ បូករួមនឹងកត្តាមានជំងឺប្រចាំកាយទៀតនោះ គឺរឹតតែប្រឈមកាន់តែខ្លាំងចំពោះបញ្ហាខ្សោយលិង្គ។ ជំងឺទាំងនោះមានដូចជាបញ្ហាលើសសម្ពាធឈាម ជំងឺបេះដូង ជំងឺទឹកនោមផ្អែម និងលើសជាតិអាស៊ីដជាដើម ហើយបញ្ហាធាត់លើសទម្ងន់ជាដើមចមនៃជំងឺទាំងនេះដែរ។ កត្តាទាំងឡាយណាដែលធ្វើឲ្យខូចខាតដល់សរសៃឈាមនៅលិង្គ នឹងរំខានដល់ភាពឡើងរឹងរបស់លិង្គ។

កត្តាលើសទម្ងន់ ឬធាត់ខ្លាំងអាចបង្កឲ្យមានបញ្ហាលិង្គមិនឡើងរឹង ឬខ្សោយលិង្គ ដោយសារការបំផ្លាញសរសៃឈាមនៅលិង្គ ធ្វើឲ្យអ័រម៉ូនតេស្តូស្តេរ៉ូនថយចុះ និងបង្កឲ្យមានស្ថានភាពរលាកនៅក្នុងរាងកាយ។ បញ្ហាធាត់អាចបង្កឲ្យមានការបំផ្លាញលើសរសៃឈាមដោយសារតែបុគ្គលនោះអាចមានជំងឺទឹកនោមផ្អែម លើសសម្ពាធឈាម លើជាតិខ្លាញ់ លើសកូលេស្តេរ៉ូល ឬមានការរលាកក្នុងខ្លួន។ ការសិក្សាជាច្រើនបានរកឃើញ និងទទួលស្គាល់ថាបញ្ហាធាត់លើសទម្ងន់ច្រើននាំឲ្យមានជាជំងឺទឹកនោមផ្អែម ជំងឺបេះដូង ឬលើសសម្ពាធឈាម ដែលកត្តាទាំងនេះគឺជាដើមចមនាំឲ្យមានបញ្ហាខ្សោយលិង្គ។

ការកែប្រែបែបបទនៃការរស់នៅដូចជាហាត់ប្រាណជាប្រចាំ ញ៉ាំអាហារល្អៗចំពោះសុខភាព និងមិនជក់បារី គឺសុទ្ធតែជាកត្តារួមចំណែកជួយកែប្រែបញ្ហាលិង្គមិនឡើងរឹង។

ប្រភព៖ ប្រភព ប្រែសម្រួល៖ សុខា