តើវិធីសាស្រ្តចាក់ទឹកក្រៅពាងសុវត្ថិភាពការពារមិនឲ្យមានផ្ទៃពោះ?

2023-10-24 00:13:00
ចំនួនមតិ 0 | ចំនួនចែករំលែក 0

វិធីចាក់ទឹកក្រៅពាង ឬការដកលិង្គចេញពីទ្វារមាសមុនចេញទឹកកាមជាវិធីសាស្រ្តមួយដែលគេជឿថាអាចជួយការពារមិនឲ្យមានផ្ទៃពោះ។ ការមិនឲ្យមានផ្ទៃពោះនេះ គឺដោយសារតែភាគីខាងប្រុសបានដកលិង្គចេញ និងបញ្ចេញទឹកកាមនៅខាងក្រៅ ក្នុងគោលបំណងមិនឲ្យមេជីវិតឈ្មោលចូលទៅក្នុងទ្វារមាសដៃគូ។

យ៉ាងណាវិធីសាស្រ្តនេះទាមទារឲ្យមានការគ្រប់គ្រងអារម្មណ៍ឲ្យបានល្អ ហើយវិធីសាស្រ្តនេះក៏មិនមានសុវត្ថិភាពក្នុងការការពារមិនឲ្យមានផ្ទៃពោះទាំងស្រុងដែរ។ មេជីវិតឈ្មោលអាចចូលទៅក្នុងទ្វារមាសដៃគូបើសិនជាភាគីខាងប្រុសដកលិង្គមិនបានត្រឹមត្រូវ ឬមិនទាន់ពេល ឬក៏មានការបញ្ចេញទឹករម្អិលដែលមានផ្ទុកមេជីវិតឈ្មោលមុនចេញទឹកកាម។ មួយវិញទៀតវិធីសាស្រ្តមួយនេះមិនអាចការពារខ្លួននិងដៃគូពីជំងឺកាមរោគបានទេ។

ហេតុអ្វីមានអ្នកជ្រើសរើសវិធីនេះ?

គូស្នេហ៍មួយចំនួនជ្រើសរើសវិធីចាក់ទឹកក្រៅពាងដើម្បីការពារការមានផ្ទៃពោះដោយចៃដន្យ។ វិធីនេះមានអត្ថប្រយោជន៍មួយចំនួនដូចជាមិនអស់ប្រាក់ មិនមានផលរំខាន និងមិនត្រូវការប្រើប្រាស់ថ្នាំជាដើម។ អ្នកដែលជ្រើសរើសវិធីសាស្រ្តមួយនេះទំនងជាមិនចង់ប្រើប្រាស់វិធីពន្យារកំណើតផ្សេងទៀត។

ចុះអ្វីជាហានិភ័យ?

ការជ្រើសរើសវិធីចាក់ទឹកក្រៅពាងមិនមានហានិភ័យចំពោះសុខភាពអ្វីនោះទេ ប៉ុន្តែវាមានហានិភ័យក្នុងការឆ្លងជំងឺកាមរោគ និងមិនមានប្រសិទ្ធិភាពពេញលេញក្នុងការពារការមានផ្ទៃពោះនោះដែរ។ គូស្នេហ៍មួយចំនួនក៏បានលើកឡើងដែរថា ការចាក់ទឹកក្រៅពាងនេះបានរំខានដល់អារម្មណ៍ត្រេកត្រអាលរបស់ខ្លួនផងដែរ។ តាមការប៉ាន់ប្រមាណមានគូស្នេហ៍មួយគូក្នុងចំណោមប្រាំគូដែលជ្រើសរើសវិធីចាក់ទឹកក្រៅពាងដើម្បីបង្ការការមានផ្ទៃពោះ បែរជាភ្លាត់មានផ្ទៃពោះទៅវិញ។

គន្លឹះគួរអនុវត្តបើប្រើវិធីសាស្រ្តចាក់ទឹកក្រៅពាង

បើសម្រេចចិត្តប្រើវិធីមួយនេះដើម្បីការពារការមានផ្ទៃពោះ គ្នាយើងត្រូវ៖

ដកឲ្យទាន់ពេល៖ ពេលមានអារម្មណ៍ថាជិតចេញទឹកកាម គឺត្រូវប្រញាប់ដកលិង្គចេញភ្លាម និងត្រូវប្រាកដថាទឹកកាមត្រូវបាញ់ចេញពីទ្វារមាស។

ប្រយ័ត្នពេលរួមភេទម្ដងទៀត៖ បើសិនជាគ្នាយើងទើបរួមភេទរួច និងបន្តិចក្រោយមកចង់រួមភេទម្ដងទៀត ត្រូវប្រាកដថាចុងលិង្គមិនមានជាប់ទឹកកាម ឬគួរលាងសម្អាតលិង្គឲ្យបានស្អាតជាមុនសិន ចាំរួមភេទជាថ្មី។ ការធ្វើបែបនេះដើម្បីការពារកុំឲ្យទឹកកាមជាប់ចុងលិង្គ និងមានមេជីវិតចូលទៅក្នុងទ្វារមាស។

បើសិនជាគ្នាយើងមិនអាចដកលិង្គបានត្រឹមត្រូវ និងបារម្ភថាអាចមានផ្ទៃពោះ គួរស្វែងរកការប្រឹក្សាជាមួយគ្រូពេទ្យនៅពេលបន្ទាប់អំពីការប្រើប្រាស់ថ្នាំពន្យារកំណើតបន្ទាន់។ មួយវិញទៀតបើចង់ការពារខ្លួនពីជំងឺកាមរោគ ការប្រើប្រាស់ស្រោមអនាម័យពេលរួមភេទជាជម្រើសល្អបំផុត។

ប្រភព៖ mayoclinic ប្រែសម្រួល៖ សុខា