អ្នកប្រាកដជាធ្លាប់ឮគេនិយាយអំពីការជម្រុះកោសិកាស្បែក ជាពិសេសកោសិកាស្បែកចាស់ៗនៅលើមុខ តែគ្នាយើងបានដឹងអ្វី​ខ្លះពីរឿងនេះ?

ថ្ងៃនេះកញ្ញា នឹងនិយាយពីការជម្រុះកោសិកាស្បែកចាស់ៗ ព្រមទាំងអត្ថប្រយោជន៍របស់វា។

ការជម្រុះកោសិកាស្បែកចាស់ៗ គឺជាដំណើរការនៃការជម្រះកោសិកាស្បែកដែលងាប់ចេញពីផ្ទៃខាងលើនៃស្បែករបស់យើងតាមរយៈការប្រើសារធាតុគីមី សារធាតុគ្រាប់ល្អិតៗ ឬឧបករណ៍ជម្រុះកោសិកាស្បែក។

ជាទូទៅ ស្បែករបស់មនុស្សជម្រុះកោសិកាស្បែកដែលងាប់ដោយខ្លួនឯង ដើម្បីបង្កើតកន្លែងសម្រាប់កោសិកាថ្មីជារៀងរាល់៣០ថ្ងៃ ឬច្រើនជាងនេះ។

ប៉ុន្តែពេលខ្លះកោសិកាងាប់មិនត្រូវបានជម្រុះទាំងស្រុងនោះទេ។ នេះអាចបណ្តាលឱ្យមានតំបន់ប្រេះ ស្ងួត និងការស្ទះរន្ធញើស។ មានតែការជម្រុះកោសិកាស្បែកប៉ុណ្ណោះដែលអាចជួយការពារបញ្ហានេះបាន។

តើការជម្រុះកោសិកាស្បែកមានប៉ុន្មានប្រភេទ? អ្វីខ្លះ?

ការជម្រុះកោសិកាស្បែកមានពីរប្រភេទ គឺ៖

១. Physical Exfoliation

Physical Exfoliation ជាការជម្រុះកោសិកាស្បែកដោយប្រើស្ក្រាប់ ច្រាស ស្បៃ និងសារធាតុដទៃទៀតដែលទាមទារការត្រដុស ឬស្រ្កាប់ដោយដៃ។

អត្ថប្រយោជន៍ដ៏ធំបំផុតចំពោះការជម្រុះកោសិកាស្បែកប្រភេទនេះគឺ ភាពងាយស្រួលនៃការប្រើប្រាស់។ យើងអាចធ្វើបែបនេះនៅផ្ទះដោយខ្លួនឯង ហើយក៏ផ្តល់លទ្ធផលភ្លាមៗផងដែរ។

២. ជម្រុះដោយប្រើសារធាតុគីមី

វិធីសាស្រ្តនេះប្រើសារធាតុគីមីផ្សេងៗគ្នាជាមួយនឹងអង់ស៊ីមដើម្បីបញ្ចេញស្បែកថ្មីរបស់យើង។ ខណៈពេលដែលការស្ក្រាប់ ធ្វើដោយខ្លួន​ឯង អាចជួយឲ្យស្បែករបស់យើងប្រសើរឡើងវិញ ការជម្រុះកោសិកាដោយសារធាតុគីមីសុវត្ថិភាព​អាចផ្តល់លទ្ធផលកាន់តែអស្ចារ្យ។

ដូចគ្នានឹងការជម្រុះកោសិកាស្បែកដោយផ្ទាល់ ការជម្រុះកោសិកាស្បែកដោយសារធាតុគីមីអាចធ្វើឱ្យស្បែកឆាប់រលាក ប្រសិនបើធ្វើមិនត្រឹមត្រូវ។

តើការជម្រុះកោសិកាស្បែកផ្តល់អត្ថប្រយោជន៍ដល់ស្បែករបស់អ្នកយ៉ាងដូចម្តេច?

ការជម្រុះកោសិកាស្បែកអាចធ្វើឲ្យស្បែករបស់យើង​ប្រសើរឡើងតាមវិធីជាច្រើន។ យោងតាម American Academy of Dermatology ការជម្រុះកោសិកាស្បែកអាចធ្វើឱ្យស្បែករបស់យើងមើលទៅភ្លឺថ្លា និងបង្កើនប្រសិទ្ធភាពនៃផលិតផលថែរក្សាស្បែក ដោយធ្វើឲ្យផលិតផលឆាប់ចូលស្បែក។ ការជម្រុះកោសិកាស្បែកជាប្រចាំក៏អាចជួយការពាររន្ធញើសពីការស្ទុះ ដែលធ្វើឲ្យឡើងមុនផង។

មិនត្រឹមតែប៉ុណ្ណោះ ការជម្រុះកោសិកាស្បែករយៈពេលវែងអាចបង្កើនការផលិតកូឡាជែននៃស្បែក។ ខូឡាជែន គឺជាគន្លឹះនៃស្បែកភ្លឺថ្លា និងរស់រវើក។ ប្រូតេអ៊ីនក៏ជួយបង្កើនភាពរលាស់របស់ស្បែកផងដែរ តាមរយៈការកាត់បន្ថយការលេចចេញនូវស្នាមជ្រួញ និងការយារធ្លាក់នៃស្បែក។