តើការលាបឡេការពារកម្តៅថ្ងៃបែបណាត្រូវក្បូនល្អសម្រាប់ស្បែកមុខ?

2023-09-27 11:40:00
ចំនួនមតិ 0 | ចំនួនចែករំលែក 0

ឡេការពារកម្តៅថ្ងៃ ជាផ្នែកមួយនៃការថែទាំស្បែកមុខប្រចាំថ្ងៃដ៏សំខាន់មិនអាចអត់បានសម្រាប់មនុស្សគ្រប់វ័យ ព្រោះវាមានសមត្ថភាពក្នុងការទប់ស្កាត់ការបំផ្លាញកោសិកាស្បែករបស់យើងពីពន្លឺថ្ងៃ។

យ៉ាងណាមិញ តើយើងគួរប្រើឡេការពារកម្តៅថ្ងៃក្នុងកម្រិតណាដើម្បីអាចការពារស្បែកពីកាំរស្មីព្រះអាទិត្យបាន? ហើយតើការលើកឡើងអំពីការប្រើឡេការពារកម្តៅថ្ងៃដោយប្រើក្បួនម្រាមពីរពិតជាល្អមែនទេ?

ថ្ងៃនេះកញ្ញា នឹងបកស្រាយចម្ងល់នេះជូនអ្នកទាំងអស់គ្នា។

ជាការពិតណាស់ ការលាបឡេការពារកម្តៅថ្ងៃដោយប្រើម្រាម២ គឺជារឿងល្អ ព្រោះវាជាបរិមាណគ្រប់គ្រាន់មួយសម្រាប់ការពារស្បែកពីកាំរស្មីព្រះអាទិត្យ UVA និង UVB យ៉ាងមានប្រសិទ្ធភាព។

ជាទូទៅ បរិមាណឡេការពារកម្ដៅថ្ងៃដែលសមរម្យសម្រាប់លាបលើមុខ គឺត្រូវច្របាច់ឡេឱ្យវែងប្រហែល ២ថ្នាំងដៃ។

តើអ្នកដឹងទេ? ការលាបឡេការពារកម្តៅថ្ងៃតិចពេក នឹងមិនអាចការពារស្បែករបស់យើងពីកាំរស្មីយូវីបានយ៉ាងមានប្រសិទ្ធភាពនោះទេ ដែលវាជាហេតុធ្វើឲ្យ ស្បែកមានបញ្ហាជាច្រើនដូចជាការលាកកម្ដៅថ្ងៃ ស្នាមជាំ ស្នាមអុជខ្មៅ និងមហារីកស្បែកជាដើម។

លើសពីនេះ ការលាបឡេការពារកម្ដៅថ្ងៃក្នុងបរិមាណតិចពេក អាចធ្វើឲ្យក្រែមការពារកម្ដៅថ្ងៃមិនឲ្យជាប់នឹងស្បែក ដែលវាក៏បណ្តាលឱ្យថយចុះប្រសិទ្ធភាពក្នុងការការពារស្បែកផងដែរ។

ដូច្នេះហើយ ការលាបឡេការពារកម្តៅថ្ងៃម្រាមពីរពិតជាវិធីងាយស្រួល និងជាបរិមាណដ៏សមស្របបំផុតសម្រាប់ការការពារស្បែកពីកាំរស្មី UV យ៉ាងមានប្រសិទ្ធភាព។

គន្លឹះពីរយ៉ាងសម្រាប់ការលាបឡេការពារកម្តៅថ្ងៃ

ច្របាច់ឡេការពារកម្តៅថ្ងៃក្នុងបរិមាណពីរថ្នាំងដៃ និងលាបឡេការពារកម្តៅថ្ងៃលើមុខ និងករបស់អ្នក
លាបឡេការពារកម្តៅថ្ងៃឡើងវិញជារៀងរាល់ ២ម៉ោងម្តង ឬញឹកញាប់ជាងនេះ ប្រសិនបើអ្នកបែកញើស ឬហែលទឹក។