គន្លឹះជួយឲ្យកូនចូលចិត្តការអានតាំងពីតូច

2023-09-26 11:26:00
ចំនួនមតិ 0 | ចំនួនចែករំលែក 0

ការជួយឲ្យកូនមានជំនាញក្នុងការអានគឺជាគន្លឹះសំខាន់ក្នុងការឆ្ពោះទៅរកភាពជោគជ័យក្នុងការសិក្សា និងការស្រឡាញ់ការអានពេញមួយជីវិត។ ដើម្បីឲ្យកូនក្លាយជាមនុស្សចូលចិត្តការអាន ប៉ាម៉ាក់គួរដឹង និងអនុវត្តគន្លឹះមួយចំនួននេះ។

បង្កើតទម្លាប់អានឲ្យកូន៖ ការបង្កើតទម្លាប់នេះអាចធ្វើទៅបានលុះត្រាតែមានការលះបង់របស់ប៉ាម៉ាក់ គឺមានន័យថាប៉ាម៉ាក់ត្រូវចំណាយពេលអានជាមួយកូន។ ការធ្វើដូចនេះកូននឹងបានអានពាក្យថ្មីៗ ជួយឲ្យកូនចាំពាក្យបានច្រើន និងបានរំឭកពាក្យចាស់ៗដែលបានរៀនកន្លងមកផងដែរ។

ឲ្យកូនអានសៀវភៅដែលពួកគេចូលចិត្ត៖ ការឲ្យកូនជ្រើសរើសសៀវភៅដែលគេចូលចិត្តយកមកអាននឹងធ្វើឲ្យកូនជក់ចិត្តក្នុងការអាន និងបង្កើតទម្លាប់ក្នុងការអានដែរ។ ដូចគ្នាដែរ ប៉ាម៉ាក់ក៏ត្រូវរៀបចំទុកដាក់សៀវភៅនៅកន្លែងដែលកូនងាយនឹងយកអានបាន ដែលការណ៍នេះក៏ជាផ្នែកមួយជួយឲ្យកូនងាយនឹងចង់អានសៀវភៅដែរ។

ជួយកូនស្វែងរកសៀវភៅប្រភេទផ្សេងៗ៖ ដូចគ្នាដែរ ប៉ាម៉ាក់គួរនាំកូនទៅបណ្ណាគារឲ្យបានញឹកញាប់ដើម្បីឲ្យកូនអាចស្វែងរកសៀវភៅដែលគេចូលចិត្ត និងចង់អាន។ ប៉ាម៉ាក់គួរអនុញ្ញាតឲ្យកូនជ្រើសរើសសៀវភៅដែលគេចូលចិត្ត សៀវភៅដែលមានអ្នកនិពន្ធផ្សេងៗគ្នា និងប្រភេទផ្សេងៗគ្នាផងដែរ។ ពេលកូនមានសៀវភៅដែលខ្លួនចូលចិត្ត នោះកូននឹងចំណាយពេលអានមិនខាន។

ជួយពន្យល់កូនពីពាក្យពិបាកៗ៖ បន្ថែមពីនេះ ប៉ាម៉ាក់ក៏នៅតែត្រូវចំណាយពេលជួយកូនអានដែរ ដើម្បីជួយប្រាប់ពាក្យណាដែលកូនពិបាកអាន ឬមិនយល់ន័យ។ ការជួយពន្យល់ពាក្យពិបាកៗទាំងនេះដល់កូនមិនត្រឹមតែជួយកូនបានយល់សាច់រឿងក្នុងសៀវភៅបានកាន់តែលម្អិតទេ តែក៏ធ្វើឲ្យកូនចេះពាក្យថ្មីៗបន្ថែមទៀតដែរ។

ដើម្បីឲ្យកូនចេះអាន ពូកែអាន មិនអាចខ្វះបានទេពីការចូលរួមរបស់ឪពុកម្ដាយ និងកូនផ្ទាល់។ នៅសាលាមានគ្រូជួយបង្ហាត់បង្ហាញ ចំណែកនៅផ្ទះគឺជាភារៈរបស់ម៉ាក់ប៉ាក្នុងការជួយកូនបន្ថែមទៀត។

ប្រភព៖ ប្រភព ប្រែសម្រួល៖ ទូច សុខា