បញ្ហាលើសសម្ពាធឈាម ទាំងនេះជាអ្វីគួរដឹង

2023-09-11 07:03:15
ចំនួនមតិ 0 | ចំនួនចែករំលែក 0

សម្ពាធឈាមខ្ពស់ ឬលើសសម្ពាធឈាម គឺជាបញ្ហាសុខភាពមួយដែលប៉ះពាល់ទៅដល់សរសៃឈាមក្នុងរាងកាយ។ សម្ពាធឈាមខ្ពស់កើតឡើងនៅពេលកម្លាំងនៃការរុញច្រានឈាមទៅនឹងជញ្ជាំងសរសៃឈាមមានការកើនឡើង។

ពេលវាស់សម្ពាធឈាមឃើញលទ្ធផល 130/80mm បារត (mm Hg) ឬលើសនេះ គឺមានន័យថាយើងកំពុងមានសម្ពាធឈាមខ្ពស់។ បញ្ហាលើសសម្ពាធឈាមត្រូវបានគេចាត់ទុកថាជាឃាតករលាក់មុខមួយដែរ ពីព្រោះថាបញ្ហានេះច្រើនកើនឡើងដោយមិនមានសញ្ញាព្រមាន ឬរោគសញ្ញា ហើយមនុស្សជាច្រើនមិនបានដឹងថាខ្លួនកំពុងមានបញ្ហានេះទេ។

បើយើងមានបញ្ហាសម្ពាធឈាមខ្ពស់ ហើយមិនទទួលបានការព្យាបាលត្រឹមត្រូវទេ វានឹងអាចនាំឲ្យមានហានិភ័យគ្រោះថ្នាក់សរសៃឈាមខួរក្បាល ឬគាំងបេះដូង ព្រមទាំងបញ្ហាសុខភាពមួយចំនួនទៀត។

ខាងក្រោមនេះជាអ្វីដែលយើងគួរដឹងពីបញ្ហាសម្ពាធឈាមខ្ពស់៖

តើបានពិនិត្យសម្ពាធឈាមទៀងទាត់ទេ? សម្រាប់អ្នកមានបញ្ហាសម្ពាធឈាមខ្ពស់ ជាការចាំបាច់ណាស់ក្នុងការតាមដានសម្ពាធឈាមរបស់ខ្លួនឲ្យបានទៀងទាត់តាមការណែនាំរបស់គ្រូពេទ្យ។ សម្រាប់អ្នកមានសុខភាពធម្មតាក៏គួរពិនិត្យសម្ពាធឈាមរបស់ខ្លួនដែរ អាចថាយ៉ាងតិចបានពីរដងក្នងុមួយឆ្នាំ ឬអាចច្រើនជាងនេះ។
ទម្លាប់ល្អក្នុងការរស់នៅជួយការពារ និងគ្រប់គ្រងបញ្ហាលើសសម្ពាធឈាម។ បញ្ឈប់ការជក់បារី ធ្វើលំហាត់ប្រាណជាប្រចាំ ញ៉ាំអាហារល្អចំពោះសុខភាព ជាអ្វីដែលអ្នកមានបញ្ហាលើសសម្ពាធឈាមត្រូវធ្វើដើម្បីគ្រប់គ្រងបញ្ហានេះឲ្យបានល្អ ហើយក៏អាចជួយការពារបញ្ហាលើសសម្ពាធឈាមបានដែរ សម្រាប់អ្នកមិនទាន់មានបញ្ហានេះ។
កត្តាហានិភ័យដែលអាចនាំឲ្យមានបញ្ហាលើសសម្ពាធឈាម។ កត្តាហានិភ័យទាំងនោះមានដូចជាញ៉ាំអាហារកែច្នៃច្រើន ធាត់លើសទម្ងន់ មានបញ្ហាផ្លូវចិត្តរ៉ាំរ៉ៃ និងមានប្រវត្តិសមាជិកគ្រួសារលើសសម្ពាធឈាម។
អ្នកមានបញ្ហាលើសសម្ពាធឈាមខ្លះត្រូវប្រើថ្នាំដើម្បីជួយគ្រប់គ្រងស្ថានភាពសុខភាព។ ក្រៅពីការគ្រប់គ្រងរបបអាហារ និងធ្វើលំហាត់ប្រាណ អ្នកមានបញ្ហាលើសសម្ពាធឈាមមួយចំនួនអាចនឹងត្រូវគ្រូពេទ្យចេញវេជ្ជបញ្ជាឲ្យប្រើថ្នាំផងដែរ ហើយអ្នកជំងឺត្រូវញ៉ាំថ្នាំទាំងនោះឲ្យបានត្រឹមត្រូវតាមការណែនាំ។
លើសសម្ពាធឈាមជាបញ្ហាសុខភាពធ្ងន់ធ្ងរមួយ តែមិនស្ដែងចេញរោគសញ្ញា។ បញ្ហាលើសសម្ពាធឈាមជាទូទៅអាចនឹងមិនបង្ហាញសញ្ញា ឬរោគសញ្ញាអ្វីទេ។ ហេតុនេះហើយបានជាគ្រូពេទ្យចាត់ទុកបញ្ហានេះថាជាឃាតករលាក់មុខ។ គ្រប់គ្នាអាចនឹងមានបញ្ហានេះជាច្រើនឆ្នាំទាំងដែលមិនបានដឹងខ្លួនសោះក៏មាន។