អ្នកវិទ្យាសាស្រ្ដអបអរក្រោយតម្រងនោមជ្រូកនៅបន្តដំណើរការក្នុងខ្លួនមនុស្ស

2023-08-17 02:50:21
ចំនួនមតិ 0 | ចំនួនចែករំលែក 0

គ្រូពេទ្យវះកាត់នៅសហរដ្ឋអាមេរិកបានប្រកាសថាតម្រងនោមជ្រូកដែលពួកគេបានវះកាត់ដាក់ចូលក្នុងខ្លួនអ្នកជំងឺដែលជាមនុស្សរុក្ខជាតិនៅបន្តដំណើរការជាធ្មតាក្នុងរយៈពេលជាងមួយខែមកនេះ ដែលនេះជាសញ្ញាវិជ្ជមានមួយសម្រាប់តម្រូវការប្ដូរសរីរាង្គដែលមនុស្សលើពិភពលោកជាច្រើនត្រូវការ។ នេះបើតាមការចុះផ្សាយរបស់សារព័ត៌មានAljazeera ថ្ងៃទី១៦ ខែសីហា ឆ្នាំ២០២៣។

ក្រុមគ្រូពេទ្យវះកាត់នៅNew York University Langone Transplant Instituteមានប្រសាសន៍ថានេះជាជោគជ័យមួយដែលតម្រងនោមជ្រូកបានបន្តដំណើរការនៅក្នុងរាងកាយមនុស្ស បើទោះបីជាអ្នកនោះជាមនុស្សរុក្ខជាតិហើយក្ដី។

ប្រធានវិទ្យាស្ថាននេះមានប្រសាសន៍ថាលទ្ធផលនេះនឹងផ្ដល់ការធានាបន្ថែមទៀតសម្រាប់ការសិក្សាបន្តលើមនុស្សរស់។

តាមរយៈការសិក្សានេះ ក្រុមអ្នកវិទ្យាសាស្រ្តសង្ឃឹមថាការប្ដូរតម្រងនោមពីជ្រូកមកមនុស្សនេះនឹងជួយដល់មនុស្សជាច្រើនដែលកំពុងរង់ចាំការប្ដូរសរីរាង្គនេះដើម្បីបន្តជីវិត។

នៅសហរដ្ឋអាមេរិកមានមនុស្សជាង១០៣ ០០០នាក់កំពុងរង់ចាំការប្ដូរសរីរាង្គ ក្នុងនោះមាន៨៨ ០០០នាក់ត្រូវការប្ដូរតម្រងនោម ខណៈមានមនុស្សរាប់ពាន់នាក់បានស្លាប់ពេលកំពុងរង់ចាំនេះ។

ប្រភព៖ Aljazeera អត្ថបទ៖ ទូច សុខា