ចូលឆ្នាំនៅផ្ទះអផ្សុក មកថែសម្រស់ដោយខ្លួនឯងងាយៗតាមប្រភេទស្បែកមុខ

2021-04-12 03:00:00
ចំនួនមតិ 0 | ចំនួនចែករំលែក 0

សម្រស់ជាផ្នែកមួយមិនអាចខ្វះបានសម្រាប់មនុស្សស្រី។ ដោយសារតែបុណ្យចូលឆ្នាំកាន់តែកៀក ហើយបើអ្នកទំនេរ អាចមកថែសម្រស់ដោយខ្លួនឯងបាននៅផ្ទះ ដោយវិធីទាំងនេះ។

១. ប្រើប្រទាលកន្ទុយក្រពើ (សម្រាប់ស្បែកស្ងួត)

ដោយសារប្រទាលកន្ទុយក្រពើផ្ទុកនូវជាតិទឹកច្រើន ធ្វើឲ្យនេះជាហេតុផលការយកប្រទាលកន្ទុយក្រពើធ្វើជាម៉ាសបិទមុខ ពិតជាជួយផ្តល់សំណើមដល់ផ្ទៃមុខយ៉ាងច្រើន ព្រមទាំងជួយលុបបំបាត់ស្នាមអុជខ្មៅ និងជ្រួញបានផងដែរ។ បន្ថែមពីនេះ សាច់ប្រទាលកន្ទុយក្រពើក៏ជួយរំញោចខូឡាជែននិងសសៃ Elastin ដែលការពារមិនឲ្យឡើងមុនបានផងដែរ។

វិធីងាយៗ អ្នកអាចយកប្រទាលកន្ទុយក្រពើលាយជាមួយទឹកដោះគោស្រស់ មកលាបលើមុខទុកប្រមាណ៣០នាទី រួចសម្អាតមុខជាមួយទឹកត្រជាក់។

២. ប្រើស៊ុតផ្នែកស (សម្រាប់ស្បែកខ្លាញ់)

សម្រាប់អ្នកមានបញ្ហាស្បែកខ្លាញ់ ប្រហែលជាត្រូវពិបាកបន្តិចដោយសាររន្ធរោមរីកធំជាងធម្មតា ធ្វើឲ្យឆាប់មានធូលី និងធាតុកខ្វក់ពិបាកលាងសម្អាត។ ហេតុនេះ ដំណោះស្រាយល្អជាងគេ អ្នកគួរប្រើផ្នែកសរបស់ស៊ុត លាយជាមួយទឹកឃ្មុំមួយស្លាបព្រា និងទឹកក្រូចឆ្មាកន្លះស្លាបព្រា លាបលើមុខប្រមាណ ២០នាទី បន្ទាប់មកលុបមុខនឹងទឹកក្តៅឧណ្ឌៗ។ អ្នកគួរអនុវត្តវិធីនេះ ចំនួន ២ -៣ ដងក្នុងមួយសប្តាហ៍។

៣. ផ្លែចេកលាយជាមួយទឹកដោះគោ (សម្រាប់ស្បែកឆាប់ប្រតិកម្ម)

អ្នកមានស្បែកឆាប់ប្រតិកម្ម ក៏ជួបរឿងពិបាកមិនធម្មតាដែរ ព្រោះត្រូវប្រុងប្រយ័ត្នបំផុតលើការថែទាំ និងប្រើប្រាស់គ្រឿងសម្អាង។ ដូច្នេះ អ្នកអាចប្រើដំណោះស្រាយបែបធម្មជាតិនេះ ដោយគ្រាន់តែចិតចេកណាំវ៉ា៤កង់ លាយទឹកដោះគោមួយស្លាបព្រា ថែមទឹកឃ្មុំមួយស្លាបព្រា រួចយកមកម៉ាស្សាលើផ្ទៃមុខ និងក ប្រហែល ១០ -១៥ នាទី រួចលាងទឹកចេញជាមួយទឹកក្តៅឧណ្ឌៗ៕