ផ្ទុះចចាមអារ៉ាម Zheng Shuang ជួលគេឲ្យបង្កើតកូន២នាក់នៅអាមេរិក ហើយបោះបង់ចោលធ្វើឲ្យផ្អើលមួយប្រទេស
- 2021-01-20 07:15:00
- ចំនួនមតិ 0 | ចំនួនចែករំលែក 0
ផ្ទុះចចាមអារ៉ាម Zheng Shuang ជួលគេឲ្យបង្កើតកូន២នាក់នៅអាមេរិក ហើយបោះបង់ចោលធ្វើឲ្យផ្អើលមួយប្រទេស
នៅព្រឹកថ្ងៃទី ១៩ ខែមករា ពិភពសិល្បៈទាំងមូលត្រូវផ្អើលកក្រើកដោយសារ លោក Zhang Heng អតីតមិត្តប្រុសរបស់តារាសម្ដែងស្រីចិន Zheng Shuang បានចេញមុខបកអាក្រាតអតីតមិត្តស្រីថា នាង និងលោកបានពឹងគេឲ្យពពោះជំនួសនាងនៅអាមេរិក តែក្រោយមកនាងក៏បោះបង់កូន២នាក់នេះចោល។
នៅលើបណ្ដាញសង្គមរបស់ខ្លួន អតីតមិត្តប្រុសរបស់តួរឿង LOVE C2O បានបង្ហោះរូបខ្លួនពរកូន ព្រមទាំងសំបុត្រកំណើតរបស់គេទាំង២ ដែលមានឈ្មោះថា Zheng Shuang។ លោកបន្ថែមផងដែរថា កូនភ្លោះរបស់លោកគឺមានអាយុ ១៣ខែហើយ។ បណ្ដាញព័ត៌មាន Sina បានឲ្យដឹងថា កាលពីឆ្នាំ ២០១៩ ពួកគេទាំង២បានទៅសហរដ្ឋអាមេរិកហើយប្រើសេវាកម្មឲ្យគេពពោះជំនួស ប្រុសមួយ ស្រីមួយ។ ប៉ុន្តែក្រោយមក ពួកគេបែកគ្នា ហើយ Zheng Shuang មិនត្រូវការកូននេះ Zhang Heng ត្រូវនៅអាមេរិកដើម្បីមើលថែកូន។
ក្រៅពីនេះ ក៏មានព័ត៌មានពួកគេបានរៀបការនៅអាមេរិក ហើយនៅខែមីនានេះនឹងលែងលះគ្នា។ មិត្តភ័ក្ដិរបស់ Zhang Heng បានឲ្យដឹងថា ដោយសារតែ Zheng Shuang មិនព្រមចុះហត្ថលេខាលើសំបុត្រកំណើតរបស់កូន ទើបពួកគេមិនអាចធ្វើលិខិតឆ្លងដែនមកប្រទេសវិញបាន។
នៅពេលរឿងកំពុងផ្ទុះឡើង ស្រាប់តែស្រីស្អាត ២៩ឆ្នាំចេញមុខបកស្រាយតែមិនសូវពាក់ព័ន្ធនឹងរឿងខាងលើថា៖ ក្រុមមេធាវីនៅអាមេរិក និងនៅចិនរបស់ខ្ញុំនៅតែព្យាយាមដោះស្រាយរឿងនេះ នេះគឺជាចម្លើយចេញពីចិត្តរបស់ខ្ញុំ។
ទាក់ទងនឹងរឿងខាងលើដែរ ភាគហ៊ុនរបស់ក្រុមហ៊ុនសម្លៀកបំពាក់ Prada ដែលមាន Zheng Shuang ក៏ត្រូវបានធ្លាក់ថ្លៃ ១.៧% ក្រោយពេលរឿងអាស្រូវរំជួលគេឯងនេះផ្ទុះឡើង។ គួរបញ្ជាក់ផងដែរថា Prada ទើបតែប្រកាសថា តារាកើតឆ្នាំ ១៩៩១ ជាអ្នកតំណាងរបស់ខ្លួនកាលពីថ្ងៃទី ១១ ខែមករាប៉ុណ្ណោះ ដោយនាងបានថតស្ប៉តចូលឆ្នាំឲ្យក្រុមហ៊ុនខាងលើរួចហើយ។ Sina បានឲ្យដឹងថា ជាមួយរឿងអាស្រូវដ៏ធំបែបនេះ Prada អាចនឹងឲ្យ Zheng Shuang ចេញសងកុងត្រារបស់ខ្លួន៕