ទុកប្រើរាប់ខែ! ម៉ាសបិទក្រោមភ្នែកតាមរូបមន្ត ៣មុខងាយធ្វើខ្លួនឯង

2020-04-23 01:00:00
ចំនួនមតិ 0 | ចំនួនចែករំលែក 0

អ្នកទាំងអស់គ្នា ថ្ងៃនេះកញ្ញា សូមណែនាំពីរបៀបធ្វើម៉ាសបិទក្រោមភ្នែកនៅផ្ទះដោយខ្លួនឯង សម្រាប់ទុកប្រើពេលណាក៏បាន ដើម្បីថែរក្សាសម្រស់ផ្ទៃក្រោមភ្នែកឲ្យស្រស់ស្អាត។ ប៉ុន្តែមុននឹងចាប់បិទម៉ាស អ្នកត្រូវលាងសម្អាតមុខឲ្យស្អាតផងដែរ។ តោះ! ឥឡួវយើងទៅដឹងរបស់ងាយៗ ដែលគួរមានដូចជា៖

ចង់បានអង្ករផ្កាម្លិះប្រណីតដាំដុះដោយធម្មជាតិគុណភាពល្អឥតខ្ចោះដឹកដល់ផ្ទះរបស់លោកអ្នកចុចត្រង់នេះ!

១. ម៉ាសទឹកអង្ករ

ត្រងយកទឹកអង្ករ (យកទឹកទី២) ដាក់ដប រក្សាទុកក្នុងទូទឹកកក។ ពេលទឹកអង្ករត្រជាក់ហើយ យកសំឡី ឬក្រណាត់ស្ដើងជ្រលក់ទឹកអង្ករ ហើយបិទក្រោមភ្នែក និងទុករយៈពេលប្រមាណ ១៥ ទៅ ២០នាទី។ អនុវត្តបែបនេះនៅពេលព្រឹក និងយប់ រៀងរាល់ថ្ងៃ រយៈពេល ២ខែទៅ ៣ខែ អ្នកនឹងឃើញលទ្ធផលយ៉ាងពេញចិត្ត។ វិធីនេះ ងាយស្រួលជាងគេ មិនចាំបាច់ពេលធ្វើយូរ។

២. ម៉ាសត្រសក់

យកត្រសក់មួយផ្លែចិតជាចំណិតៗ ហើយដាក់ក្នុងម៉ាស៊ីនក្រឡុក ជាមួយទឹកបន្តិច រួចក្រឡុកឲ្យម៉ត់។ ដួសដាក់ចានតូចមួយហើយយកទៅក្លាសេទូទឹកកកឲ្យបាន ៣០នាទី។ បន្ទាប់មកអាចយកសំឡី ឬក្រណាត់ស្ដើងមកជ្រលក់ រួចយកមកបិទក្រោមភ្នែកថ្នមៗ និងទុកពី ១៥ទៅ ២០នាទី សឹមលាងសម្អាត។ អ្នកអាចធ្វើវាបានជារៀងរាល់ថ្ងៃ ឬ៣ដងក្នុងមួយអាទិត្យ។

៣. ម៉ាសប្រទាលកន្ទុយក្រពើ ជាមួយស៊ុតផ្នែកពណ៌ស

យកស៊ុតផ្នែកពណ៌សមួយស្លាបព្រា និងប្រទាល កន្ទុយក្រពើមួយស្លាបព្រា កូរឲ្យចូលគ្នាសព្វល្អ រួចយកមកម៉ាស្សាក្រោមភ្នែកថ្នមៗ។ ទុកពី១០ ទៅ ១៥នាទី សឹមលាងចេញ។ វិធីនេះអាចធ្វើបាន ៣ដងក្នុងមួយសប្ដាហ៍។

អត្ថបទ៖ ស៊ិន សាវ៉េត