មនុស្សស្រីគ្រប់គ្នាអើយ ក្នុងរឿងស្នេហាជួបបែកជារឿងធម្មតា កុំឈឺចាប់យូរពេក
- 2019-09-21 02:00:00
- ចំនួនមតិ 0 | ចំនួនចែករំលែក 0
មនុស្សស្រីគ្រប់គ្នាអើយ ក្នុងរឿងស្នេហាជួបបែកជារឿងធម្មតា កុំឈឺចាប់យូរពេក
មានរឿងមួយដែលអ្នកគួរតែចាំទុក នោះគឺគេអាចស្រលាញ់អ្នកក៏ពិតមែន ប៉ុន្តែនៅពេលមានជម្លោះនៃផលប្រយោជន៍កើតមានឡើង តម្រូវឲ្យពួកគេត្រូវជ្រើសរើសនោះ គេប្រហែលជាមិនមើលឃើញអ្នកឡើយ។
មួយរយៈនេះ អានបានរឿងជាច្រើននៃស្នេហាស្រលាញ់គ្នាជិត១០ឆ្នាំនៅតែបែកគ្នា ក៏សម្រេចចិត្តចង់ចែករំលែករឿងរបស់ខ្លួន ដើម្បីអ្នកដែលនៅឈឺចិត្តរឿងស្នេហាខ្លាំងពេក បានស្បើយអារម្មណ៍ខ្លះ ព្រោះការពិតទៅបែកគ្នាក៏ជារឿងធម្មតាដែរ ។ នៅលើលោកនេះមានអ្វីដែលហៅថាគង់វង្សរហូតនោះ?
ខ្ញុំស្រលាញ់គាត់តាំងពីឆ្នាំទី១ គាត់មានរូបសង្ហា ឆ្លាត គ្រួសារអ្នករាជការហើយរួសរាយទៀត។ ខ្ញុំជាមនុស្សស្រីធម្មតា មិនស្អាត គ្មានទេពកោសល្យអ្វីពិសេស រឹតតែគ្មានគ្រួសារជាអ្នកមានទៀត។ តែមិនយល់ដោយសារហេតុផលអ្វី ពួកខ្ញុំនៅតែក្លាយជាគូស្នេហ៍នឹងគ្នា។
ពួកខ្ញុំនៅក្បែរគ្នាបាន៤ឆ្នាំ មិនយូរដល់១ទសវត្សដូចគេ តែ៤ឆ្នាំនោះ គឺជា៤ឆ្នាំនៃយុវភាពរបស់ខ្ញុំទាំងស្រុង ៤ឆ្នាំដែលខ្ញុំមានតែរូបគាត់។
ឆ្នាំទី១គឺសុភមង្គលហូរហៀរ ខ្ញុំស្មានតែខ្ញុំជានារីដែលមានសុភមង្គលបំផុតលើលោក។ ឆ្នាំទី២ ពួកខ្ញុំជ្រុលជ្រួសដោយខ្ញុំគិតថា បើស្រលាញ់គ្នាហើយ នេះគ្រាន់តែជារឿងមុន និងក្រោយប៉ុណ្ណោះ។ ក្នុងឆ្នាំទី២នេះដែរ ខ្ញុំមានគភ៌។ ភ័យខ្លាចខ្លាំងពេក ខ្ញុំប្រាប់ទៅគាត់ ហើយគ្មានជម្រើសអ្វីក្រៅពីចោលកូនមួយនោះ ព្រោះទាំង២នាក់នៅក្មេងពេក។
គ្រប់យ៉ាងនៅតែល្អរហូតដល់ដើមឆ្នាំទី៤ នៅពេលដែលគាត់ប្រាប់ថាគាត់ត្រូវទៅរៀនបន្តនៅក្រៅ។ ក្រោយពេលគាត់មកវិញ ពួកខ្ញុំនៅតែដូចដើម ហើយខ្ញុំមានកូនម្ដងទៀត។ នៅពេលនេះ ខ្ញុំបានរៀនចប់ហើយ ហើយកំពុងធ្វើការនៅធនាគារមួយ។ នៅពេលទៅពិនិត្យនៅពេទ្យ ពេទ្យប្រាប់ថាកូននេះអាចកើតមុនខែ តែសុខភាពល្អធម្មតា។ ខ្ញុំប្រាប់រឿងនេះទៅគាត់ តែស្លុតចិត្តស្លុង នៅពេលគាត់ប្រាប់ថា ទុកពេលឲ្យគាត់សិន។ ១សប្ដាហ៍ដែលរង់ចាំចម្លើយនោះ ប្រៀបដូចមួយឆ្នាំ។
១សប្ដាហ៍នោះក៏ប្រែទៅជាអស់ន័យនៅពេលគាត់បាត់ស្រមោលសូន្យឈឹង។ ខ្ញុំបានត្រឹមលេបទឹកភ្នែកចូលក្នុងពោះចោលកូនរបស់ខ្លួនជាលើកទី២។ ពីពេលនោះមក ក៏មិនដែលឮដំណឹងពីគាត់សូម្បីមួយម៉ាត់។ ខ្ញុំឈឺចាប់ស្ទើរឆ្កួតខ្លួន តែអ្វីៗក៏ហួសទៅ។ ខ្ញុំមិនខឹង ហើយក៏មិនបន្ទោស ព្រោះជីវិតនៅតែរំកិលទៅមុខ។ គិតឡើងវិញនៅតែគិតថាខ្លួនសំណាងល្អនៅពេលដែលខ្ញុំនៅមានលទ្ធភាពចិញ្ចឹមខ្លួនឯង ពេលគ្មានរូបគេ ហើយភាពឈឺចាប់នៅពេលគ្មានរូបគេក៏ស្បើយទៅតាមពេលវេលាកន្លងផុតទៅ៕
ចុចអាន៖ ប្រាក់ខែ១៥០០ដុល្លារ ពេលបង្ហាញមុខនៅតែត្រូវម៉ែឪក្មេកតិះដៀលព្រោះមានម្តាយឪពុកលែងលះ