គន្លឹះធ្វើឲ្យខ្លួនឯងកាន់តែរឹងមាំ ជួបបញ្ហាពិបាកខ្លាំងយ៉ាងណាក៏មិនរាថយ

2021-08-04 12:10:00
ចំនួនមតិ 0 | ចំនួនចែករំលែក 0

មិនតិចដងទេក្នុងជីវិត ដែលមនុស្សគ្រប់គ្នាបានឈរត្រង់ចំណុចមួយគ្មានភាពនឹងន រេចុះរេឡើងប្រៀបដូចជាទូកនៅកណ្តាលសមុទ្រធំល្វឹងល្វើយ។ ដើម្បីធ្វើដំណើរទៅមុខបន្តរហូតដល់គោលដៅ លុះត្រាតែអ្នកអាចពុះពារគ្រប់ឧបសគ្គ ហើយខិតខំរកវិធីពង្រឹងខ្លួនឯងឲ្យរឹងមាំ គ្មានថ្ងៃរាថយចំពោះបញ្ហាធំឬតូចក្តី។

គិតពីរឿងពិបាកៗ ដែលធ្លាប់ឆ្លងកាត់ពីមុនមក

ពេលខ្លះវិធីល្អបំផុតដែលអាចលើកទឹកចិត្តនិងលួងលោមខ្លួនឯងបាន គឺមានតែរូបអ្នកនេះហើយ។ អាចសាកក្រឡេកទៅមើលនិងនឹកគិតដល់បញ្ហាឬរឿងរ៉ាវលំបាកៗជាច្រើនដែលអ្នកធ្លាប់ជួបប្រទះក្នុងពេលអតីតកាល។ ប្រសិនបើអ្នកអាចឆ្លងផុតរហូតមកដល់សព្វថ្ងៃ គ្មានហេតុផលណាដែលត្រូវមកឈប់ត្រឹមហ្នឹងទេ ព្រោះបញ្ហាទាំងនោះហើយ ជាមេរៀនគ្មានក្នុងសៀវភៅ ថែមទាំងអាចយកមកប្រើប្រាស់ពេញមួយជីវិតទៀតផង។

បង្កើតស្ថិរភាពសម្រាប់ខ្លួនឯង

ប្រសិនបើអ្នកមិនចង់ក្លាយជាមនុស្សទន់ខ្សោយ ឬឆាប់បញ្ចេញអារម្មណ៍ប្រតិកម្មពេលជួបបញ្ហា គួរតែព្យាយាមបង្កើនទំនុកចិត្តបន្ថែម ហើយកុំភ្លេចផ្លាស់ប្តូរខ្លួនឯងទៅជាមនុស្សម្នាក់ ដែលមានចិត្តមោះមុត រឹងមាំ និងរួចរាល់ក្នុងការតតាំងគ្រប់ស្ថានការណ៍ ដោយគ្មានភាពភ័យខ្លាច។ លើសពីនេះទៅទៀត ត្រូវមានជំហរលើខ្លួនឯងខ្លាំងជាងការចាំរំពឹងលើអ្នកដទៃ។

នៅឲ្យឆ្ងាយពីមនុស្សអវិជ្ជមាន

ចូលចិត្តនៅក្បែរឬរាប់អានប៉ះចំមនុស្សអវិជ្ជមាន អ្នកនឹងទទួលបានមកវិញ នូវជាតិពុលមិនល្អជ្រាបចូលខ្លួន ព្រោះវត្តមានរបស់មនុស្សប្រភេទនេះ តែងមកកាត់បន្ថយកម្លាំងថាមពលនិងសុភមង្គលរបស់អ្នក។ បើអាចជៀសបាន គួរជៀសឲ្យផុតតែម្តងទៅ ដើម្បីការពារមិនឲ្យជីវិតពោរពេញដោយភាពស្មុគស្មាញ និងបាក់ស្មារតីដោយសារសម្តីឥតបានការ។

ឈប់ស្តាប់ពីគំនិតអ្នកដទៃ ហើយត្រូវធ្វើតាមបេះដូងខ្លួនឯងវិញ

ឈប់គិតឈប់ខ្វល់ថាអ្នកដទៃគិតអ្វីមកលើអ្នកតទៀត ព្រោះមនុស្សគ្រប់គ្នា គួរជ្រើសរើសផ្លូវដើររៀងៗខ្លួន និងជឿជាក់ ស្រលាញ់ គោរពអ្វីខ្លួនកំពុងមានសព្វថ្ងៃ។ បើរវល់តែស្តាប់ពីគំនិតអ្នកដទៃច្រើនពេក អ្នកនឹងមើលរំលងនូវអ្វីដែលបេះដូងខ្លួនឯងត្រូវការពិតប្រាកដ។ កាន់ក្តីសុខរបស់អ្នកឲ្យជាប់ក្នុងដៃ ដាច់ខាតមិនត្រូវផ្ញើលើនរណាទាំងអស់៕