មិនមែនបែកបាក់សុទ្ធតែពិបាកវិលរកគ្នា! ចង់ចាប់ផ្តើមស្នេហ៍ថ្មីជាមួយអ្នកចាស់ កុំឲ្យឈឺត្រូវដឹងរឿង៦យ៉ាងនេះ
- 2021-05-13 01:55:00
- ចំនួនមតិ 0 | ចំនួនចែករំលែក 0
មិនមែនបែកបាក់សុទ្ធតែពិបាកវិលរកគ្នា! ចង់ចាប់ផ្តើមស្នេហ៍ថ្មីជាមួយអ្នកចាស់ កុំឲ្យឈឺត្រូវដឹងរឿង៦យ៉ាងនេះ
ការបាក់បែក ពេលខ្លះមកពីពួកគេឈ្លោះគ្នា ការមិនសូវចេះយល់ពីគ្នា ដែលធ្វើឲ្យទំនាក់ទំនងលែងដើរទៅមុខ។ អ្នកខ្លះបែកគ្នា ទាំងម្ខាងទៀតមិនដឹងហេតុផល ហើយពួកគេត្រូវជាប់ឈ្មោះជាមនុស្សអាក្រក់ ទាំងដែលគ្មានឱកាសដើម្បីដឹងមូលហេតុច្បាស់ ឬការពន្យល់ជាដើម។
យ៉ាងណាក៏ដោយ បើចង់ឲ្យស្នេហារបស់អ្នកអាចចាប់ផ្តើមឡើងវិញ អ្នកគួររៀបចំចិត្តគំនិតតាមតិចនិកខាងក្រោម។
១. កុំប្រញាប់វិលមកត្រូវគ្នាភ្លាមៗ
បន្ទាប់ពីបែកគ្នា គឺជាពេលដែលអ្នកក្រៀមក្រំខ្លាំងបំផុត ដូច្នេះហើយមុនពេលវិលមកផ្សះផ្សាគ្នាវិញ អ្នកគួរដោះស្រាយផ្លូវចិត្តរបស់ខ្លួនឯងជាមុនសិន។ គួរតែអង្គុយចុះហើយរកមើលថាតើអ្នកបានធ្វើអ្វីខុស ហើយរកវិធីផ្លាស់ប្តូរខ្លួនឯងឲ្យល្អប្រសើរជាងមុន រហូតដល់គាត់ជឿជាក់ថា អ្នកជាមនុស្សថ្មី។ នៅពេលនោះ ទើបស្នេហារបស់អ្នកនឹងប្រែជាស្រស់ស្អាត ហើយនៅពេលអ្នកត្រៀមរួចរាល់ទាំងស្មារតីចិត្តកាយរួចហើយ ទើបស្នេហាអាចដើរទៅមុខបាន។
២. ផ្តល់ពេលវេលាបន្តិចដល់គាត់ មុនពេលចាប់ផ្តើមជាថ្មី
វាមិនត្រឹមតែអ្នកទេដែលត្រូវចំណាយពេលស្ងប់ស្ងាត់ គាត់ក៏ប្រហែលជាត្រូវការពេលវេលាដូចគ្នាដើម្បីសម្រេចចិត្តថា គួរបន្តឬបញ្ចប់។ ម្យ៉ាងទៀត គាត់ក៏មានការងាររបស់គាត់ដូចគ្នា ដូច្នេះត្រូវផ្តល់ពេលវេលាឲ្យគាត់ធ្វើជាខ្លួនឯង ព្រមទាំងគោរពការសម្រេចចិត្តរបស់គាត់។ កុំយករឿងផ្ទាល់ខ្លួនមកជ្រៀតជ្រែក រហូតធ្វើឲ្យគាត់កាន់តែស្មុគស្មាញ។ រឿងសំខាន់បំផុតដែលអ្នកត្រូវចាំ គឺឋានៈ របស់អ្នកនៅពេលនេះ នៅត្រឹមជា Ex នៅឡើយ។
៣. ត្រលប់មកនិយាយតទល់ ដើម្បីស្វែងយល់ពីគ្នាឲ្យច្បាស់
ការវិលត្រលប់មកម្តងនេះ យ៉ាងណាក៏ដោយកុំបណ្តោយឲ្យរឿងដដែរៗកើតឡើង។ អ្នកត្រូវធ្វើជាមនុស្សចិត្តត្រជាក់ ហើយស្នើឲ្យគាត់មកជួប ដើម្បីនិយាយគ្នាអំពីបញ្ហា។ ប្រាប់ពីចំណុចរួមនៃបញ្ហា ដើម្បីទាំងពីរនាក់អាចដើរផ្លូវរួមជាមួយគ្នា និងយល់ពីគ្នាបានកាន់តែច្រើន។
៤. កុំរំលឹករឿងចាស់
ត្រូវចៀសវាងដាច់ខាតការរំលឹករឿងអាក្រក់របស់អ្នកទាំងពីរកាលពីមុន ព្រោះវានឹងធ្វើឲ្យឈ្លោះគ្នា ហើយនឹងបែកគ្នាម្តងទៀត។ ត្រូវចាំថា No one is perfect បូករួមទាំងខ្លួនអ្នកផ្ទាល់ ព្រោះនរណាក៏មានគុណវិបត្តិដែរ។ ប្រសិនបើអ្នកចង់ឲ្យស្នេហាពោរពេញដោយភាពសប្បាយរីករាយ អ្នកត្រូវត្រសងយឺតៗជាមួយគ្នា។ រឿងសំខាន់បំផុត មិនត្រូវបណ្តោយឲ្យអារម្មណ៍យកឈ្នះលើហេតុផលនោះទេ។
៥. កុំយកស្នេហ៍ធ្វើជាល្បែង
អ្នកមិនចង់ធ្វើជាសត្រូវជាមួយសង្សាររបស់ខ្លួនទេ មែនអត់? ដូច្នេះ ត្រូវឈប់ ឈ្លោះយកឈ្នះគ្នាទៀតទៅ ព្រោះនៅទីបញ្ចប់មានតែធ្វើឲ្យម្ខាងៗឈឺចាប់ប៉ុណ្ណោះ។ ដំណោះស្រាយល្អបំផុត ត្រូវវិលមកជជែកគ្នាស្វែងរកហេតុផល។ កុំប្រើអារម្មណ៍ធ្វើជាអាវុធ ប្រសិនបើអ្នកទាំងពីរពិតជាចង់ស្រលាញ់គ្នាម្តងទៀត។
៦. បង្កើតឲ្យស្នេហាកាន់តែផ្អែមល្ហែមជាងកាលពីមុន
នៅពេលគ្រប់យ៉ាងវិលមកធម្មតាវិញហើយ ការផ្តល់នូវពេលវេលាផ្អែមល្ហែមគួរតែមកដល់។ ដូច្នេះ ត្រូវដាំដើមឈើស្នេហ៍ជាមួយគ្នាម្តងទៀត ដោយគួរតែផ្តល់នូវរសជាតិស្នេហាផ្អែមត្រជាក់ចំពោះគ្នា ដូចជា ចេញក្រៅញ៉ាំអី ទៅមើលកុន ឬ Surprise ដល់គាត់នៅថ្ងៃពិសេសៗជាដើម។ ទាំងនេះ សុទ្ធតែជារឿងតូចៗដែលនឹងជួយឲ្យស្នេហារបស់អ្នកទាំងពីរវិលមកត្រូវគ្នាវិញ និងថែមទាំងផ្អែមល្ហែម គួរឲ្យច្រណែនទៀតផង។
ស្នេហា ប្រៀបដូចអណ្តាតនិងធ្មេញ គូខ្លះក៏ធម្មតា តែគូខ្លះក៏មានជម្លោះ។ តែបើអ្នកវិលមកជជែកគ្នារកហេតុផល ព្រមទាំងចេះលើកលែងទោសដល់គ្នា ជឿ កញ្ញា ចុះ ថ្ងៃណាមួយស្នេហារបស់អ្នកទាំងពីរនឹងផ្អែមល្ហែមគួរឲ្យច្រណែនមិនខាន៕