បើអាណិតចិត្តស្វាមី ភរិយាដាច់ខាតកុំសួរសំនួរ៣យ៉ាងនេះឲ្យសោះ
- 2021-05-11 23:00:00
- ចំនួនមតិ 0 | ចំនួនចែករំលែក 0
បើអាណិតចិត្តស្វាមី ភរិយាដាច់ខាតកុំសួរសំនួរ៣យ៉ាងនេះឲ្យសោះ
សំនួរខ្លះ មានតែបណ្តាលឲ្យបុរសឈឺក្បាល ហើយបើទោះចម្លើយឆ្លើយយ៉ាងណាក៏ដោយ សុទ្ធតែជាចម្លើយដែលគាត់មិនចង់។ ប្រសិនបើរស់នៅជាមួយគ្នាជាប្តីប្រពន្ធទៅហើយ មិនគួរដាក់សម្ពាធឲ្យម្ខាងទៀតមិនសប្បាយចិត្តនោះទេ។ រឿងកាលពីមុន គឺជាអតីតឲ្យវារសាត់ឆ្ងាយទៅចុះ ព្រោះវាលែងមានអ្វីសំខាន់ទៀតហើយ កុំបណ្តោយឲ្យរឿងអតីតមកជះឥទ្ធិពលដល់ជីវិតបច្ចុប្បន្នរបស់អ្នក។ ដូច្នេះ មានសំនួរ៣ដែលភរិយាល្អមិនគួរសួរទៅប្តី។
. បើសិនម្តាយបង និងអូនធ្លាក់ទឹក តើបងនឹងជួយនរណាមុនគេ?
ថ្វីដ្បិតនេះជាសំនួរតាំងពីបុរាណមកក៏ដោយ តែវាក៏អាចធ្វើឲ្យគូស្នេហ៍ជាច្រើនបែកគ្នាដោយគ្មានអាល័យបានដែរ។ អ្នកម្តាយ និងប្រពន្ធ គឺសុទ្ធតែសំខាន់សម្រាប់ស្វាមី ហើយបុរសវិញតែងតែដាក់ទំនួលខុសត្រូវខ្ពស់ និងស្វែងរកវិធីឲ្យតុល្យភាពរវាងអ្នកម្តាយ និងប្រពន្ធផងដែរ។ ហេតុនេះ ភរិយាឆ្លាតមិនគួរសួរសំនួរបែបនេះទេ។ ស្វាមីដែលស្រលាញ់ប្រពន្ធតែងតែព្យាយាមមិនចង់ឃើញប្រពន្ធធ្លាក់ទឹកនោះដែរ ហេតុនេះអ្នកមិនគួរសួរសំនួរប្រភេទតេស្តបេះដូង និងភាពអំណត់របស់គាត់ឡើយ។
២. ហេតុអ្វីក៏បងមិនល្អដូចបុរសដទៃអ៊ីចឹង?
មនុស្សស្រីតែងតែឈរនៅពីក្រោយដើម្បីជម្រុញស្វាមីឲ្យជោគជ័យ។ ប៉ុន្តែបើស្វាមីកំពុងបរាជ័យហើយ ប្រពន្ធមិនត្រូវឆ្លៀតឱកាសនេះដើម្បីស្តីបន្ទោសប្តីនោះទេ ។ ផ្ទុយមកវិញ គួរតែលើកទឹកចិត្ត ព្រមទាំងផ្តល់ភាពកក់ក្តៅដល់ប្តីជាថ្មីម្តងទៀត ដើម្បីឲ្យគាត់មានកម្លាំងចិត្តតតាំងនឹងឧបសគ្គ ព្រមទាំងមានជំនឿចិត្តឡើងវិញ។ បើសិនជាអ្នកបែរជាខកចិត្ត នៅពេលឃើញប្តីបរាជ័យហើយគិតថាគាត់មិនល្អដូចប្តីដទៃ នោះអ្នកមិនខុសពីកំពុងបំផ្លាញទឹកចិត្តគាត់ទាំងរស់នោះទេ ហើយថ្ងៃណាមួយអ្នកទាំងពីរនឹងអស់ចិត្តស្រលាញ់ចំពោះគ្នាមិនខាន។
៣. រវាងសង្សារចាស់ និងអូន តើបងស្រលាញ់នរណាជាង?
ប្រសិនបើអ្នកសួរគាត់នូវសំនួរនេះ មិនខុសពីអ្នកកំពុងរំលឹកឲ្យគាត់នឹកឃើញអតីតមិត្តស្រី ដែលគាត់បានបំភ្លេចយូរណាស់មកហើយ។ ម្យ៉ាងទៀត ក៏ធ្វើឲ្យគាត់មិនសប្បាយចិត្តចង់ឆ្លើយផងដែរ។ អ្នកត្រូវចាំថា អតីតសង្សារគឺជារឿងកាលពីមុន ដូច្នេះមិនបាច់ត្រូវរំលឹកឈ្មោះទៀតនោះទេ។ សំនួរនេះនឹងធ្វើឲ្យស្វាមីរបស់អ្នកគិតថា ហេតុអ្វីក៏អ្នកឆោតម្ល៉េះមកយកខ្លួនឯងទៅប្រៀបធៀបជាមួយគេ ដែលជាមនុស្សលែងមានក្នុងជីវិតរបស់គាត់ទៀតទៅហើយ? ហើយបើអ្នកប្រៀបធៀបអ៊ីចឹង វាមានតែធ្វើឲ្យស្វាមីប្រែជាខឹងហើយធុញទ្រាន់ប៉ុណ្ណោះ៕