បញ្ហាជំងឺរាតត្បាតបានបង្កឲ្យមានភាពតានតឹង និងផលលំបាកជាច្រើននៅក្នុងជីវិតរស់នៅ ហើយវាធ្វើឲ្យមនុស្សភាគច្រើនសព្វថ្ងៃនេះទទួលរងភាពឯកោយ៉ាងខ្លាំង។ ការដែលមិនបានជួបជុំមិត្តភក្តិនឹងមនុស្សជាទីស្រឡាញ់ជាយូរមកហើយ ការខកខានមិនបានប្រកបមុខរបររកស៊ី ទំនាក់ទំនងការងារក៏មិនមាន ការជួបប្រាស្រ័យទាក់ទងគ្នាប្រចាំថ្ងៃនៅក្នុងសង្គមក៏ត្រូវបានកាត់ផ្ដាច់ចេញទៀតដែលវាជាមូលហេតុធ្វើឲ្យអ្នកមានភាពតានតឹង និងភាពឯកោ។

នៅពេលដែលអ្នកទទួលរងភាពឯកោកាន់តែយូរ វានឹងវិវត្តទៅជាជំងឺស្ត្រេស និងធ្លាក់ទឹកចិត្តដ៏ធ្ងន់ធ្ងរ ហើយអ្នកនឹងមានអារម្មណ៍ថាជីវិតហាក់ដូចជាគ្មានន័យអ្វីសោះសម្រាប់អ្នក។ ប្រសិនបើអ្នកមានអារម្មណ៍ថា មានភាពឯកោជាញឹកញាប់នោះសូមកុំបណ្ដោយវាឲ្យសោះ មកធ្វើការអនុវត្តតាមវិធីទាំង ៩ យ៉ាងនេះដើម្បីចៀសផុតពីអារម្មណ៍ឯកកោ និងទទួលបានភាពសប្បាយចិត្តសម្រាប់ខ្លួនឯង៖

• ពិនិត្យមើលវាឡើងវិញថាតើអ្នកពិបាកចិត្តដោយសាររឿងអ្វី
• បើកចម្រៀងដែលអ្នកចូលចិត្តនៅក្នុងផ្ទះ ឬបន្ទប់ឲ្យលឺៗ
• កុំភ្លេចឲ្យសោះការរក្សាទំនាក់ទំនងជាមួយមនុស្សជាទីស្រឡាញ់ ឬមិត្តភក្តិនឹងក្រុមគ្រួសារ
• ការដើរចេញទៅខាងក្រៅផ្ទះ ១៥ ទៅ ៣០ នាទីក្នុងមួយថ្ងៃ (បើអ្នកកំពុងនៅក្នុងតំបន់លឿង)
• និយាយអំពីអារម្មណ៍របស់អ្នកចេញប្រាប់ទៅកាន់នរណាម្នាក់ដែលអ្នកទុកចិត្ត
• ការចំណាយពេលថែទាំសត្វចិញ្ចឹម (ប្រសិនបើអ្នកមាន)
• គួរធ្វើការសម្រាកពីបណ្តាញសង្គមមួយរយៈ
• ធ្វើអ្វីមួយដែលអ្នកចូលចិត្ត
• ត្រូវធ្វើការរំលឹកខ្លួនឯងថាវាមិនមែនជាភាពអចិន្ត្រៃយ៍ឡើយ

ប្រសិនបើភាពឯកោហាក់ដូចជាមិនបានប្រសើរឡើងទេ ហើយអ្នកនៅតែមានអារម្មណ៍ថាតានតឹងនឹងពិបាកចិត្តខ្លាំងនោះ អ្នកគួរតែធ្វើការស្វែងយល់អំពីមូលហេតុចម្បងដែលកំពុងជះឥទ្ធិពលដល់អ្នក រៀនគ្រប់គ្រងភាពតានតឹងទាំងនោះជាមួយវិធីខាងលើ ឬការស្វែងរកជំនួយបន្ថែមនឹងយុទ្ធសាស្ត្រល្អៗដើម្បីព្យាបាល និងការពារភាពឯកោដែលនឹងអាចកើតឡើង៕

ប្រភពរូបភាព៖ Pinterest

ចុចអានបន្ត៖

• ធាតុផ្សំ ៥ យ៉ាងដើម្បីធ្វើឲ្យខ្លួនឯងសប្បាយចិត្ត
• ១០ សញ្ញាបញ្ជាក់ថាមនុស្សពិសេសកំពុងគិតដល់អ្នក