ឃ្លាជួយឲ្យអ្នកមានស្នាមញញឹមឡើងវិញបន្ទាប់ពីយំខ្សោះទឹកភ្នែក
- 2021-04-15 06:00:00
- ចំនួនមតិ 0 | ចំនួនចែករំលែក 0
ឃ្លាជួយឲ្យអ្នកមានស្នាមញញឹមឡើងវិញបន្ទាប់ពីយំខ្សោះទឹកភ្នែក
នៅក្នុងជីវិតរបស់មនុស្សម្នាក់ៗ ប្រៀបបានដូចជាទូកនៅកណ្តាលសមុទ្រ នឹងនរនៅពេលស្ងប់ខ្យល់ និងទន់ទេរពេលមានព្យុះភ្លៀង។ ដើម្បីការពារខ្លួនឯង មិនឲ្យដួលរលំ លេចចូលទៅក្នុងទឹកជ្រៅ មានតែទន្ទិញឃ្លាល្អៗ ទុកក្នុងខួរក្បាល ដើម្បីរំសាយកង្វល់ទាំងឡាយចេញឲ្យអស់។
មានមនុស្សជាង៧០០០លាននាក់លើពិភពលោក ថ្ងៃណាមួយអ្នកនឹងក្លាយជាមនុស្សសំខាន់ជាងគេក្នុងបេះដូងរបស់នរណាម្នាក់។
ភាពតតាំងជម្នះជាមួយឧបសគ្គ មិនមែនសម្រាប់បង្អួតអ្នកណា គឺដើម្បីខ្លួនឯង។
បើគិតថានៅជុំវិញខ្លួនសម្បូរមនុស្សស្អប់អ្នក វាជារឿងដែលអ្នកមិនគួរខ្វាយខ្វល់ ព្រោះពួកគេទាំងអស់នោះ កំពុងតែគ្មានក្តីសុខនិងមិនពេញចិត្តនឹងខ្លួនឯង។
ខំញញឹមឡើង នោះអ្នកនឹងអាចយកឈ្នះសត្រូវ និងមនុស្សដែលស្អប់អ្នកបានដោយពុំចាំបាច់ចំណាយកម្លាំងច្រើន។
ប្រសិនបើអ្នកបានប្រព្រឹត្តកំហុសធ្ងន់នៅក្នុងជីវិត ជឿទៅថារឿងល្អនឹងកើតឡើងបន្ទាប់ពីនេះ ព្រោះអ្វីៗទាំងអស់លើលោក សុទ្ធតែមានហេតុផលផ្សេងៗគ្នា មិនមែនកើតឡើងដោយវេទមន្តឬអាចបញ្ជាបាននោះទេ។
ញញឹមដាក់មនុស្សជុំវិញខ្លួនឲ្យបានច្រើន ព្រោះស្នាមញញឹមដ៏ស្រស់ស្អាតរបស់អ្នក អាចស្រោចស្រង់ខ្លួនឯង និងអ្នកដទៃ ឲ្យមានអារម្មណ៍ល្អ ស្រស់ស្រាយឡើងវិញ។
ពេលខ្លះអ្នករឹងមាំដូចថ្ម ហើយពេលខ្លះទៀតអ្នកទន់ជ្រាយមិនគួរឲ្យជឿ ដូច្នេះហើយមានតែអ្នកប៉ុណ្ណោះ ដែលមានសិទ្ធិសម្រេចចិត្ត ជ្រើសរើសចង់ក្លាយខ្លួនជាមនុស្សបែបណា។
ការដើរដួលនៅថ្ងៃនេះ គឺជំហានដ៏រឹងមាំសម្រាប់ថ្ងៃមុខ ដួលងើបៗទើបស្គាល់អ្វីហៅថាភាពជោគជ័យ។
ភាពបរាជ័យ ធ្វើឲ្យអ្នកខាតបង់ប្រយោជន៍ ប៉ុន្តែវាបានបង្កើនចំណេះដឹងនិងបទពិសោធន៍បន្ថែម។
បើអ្នកយំ ព្រោះតែគិតថាបន្តដំណើរទៅមុខលែងរួច សាកក្រឡេកទៅមើលជនពិការវិញម្តង ពួកគេលំបាកជាងអ្នក១០ដងទៅទៀត។
ពេលអ្នកជាប់គាំងគិតអីមិនចេញមិនមែនមានន័យថាអន់ តែជាសញ្ញាប្រុងប្រយ័ត្ន ការពារខ្លួនឯងមិនឲ្យដើរផ្លូវខុស។
កុំត្អូញត្អែរពីការងារ និងជីវិតដែលអ្នកកំពុងមានសព្វថ្ងៃ ត្រូវតស៊ូព្យាយាម រស់នៅដោយរីករាយ ទើបជីវិតគ្មានភាពស្មុគស្មាញច្រើន។
បេះដូងមានរបួស ទុកឲ្យពេលវេលាជាអ្នកព្យាបាល អ្នកមិនអាចបង្ខំបានទេ។
ត្រូវចាំថា អ្វីៗប្រែប្រួលមិនទៀង ត្រៀមទឹកចិត្តរួចរាល់ជាមុន អ្នកនឹងមិនរងរបួសធ្ងន់។
ឈោងចាប់ក្តីស្រមៃឲ្យបាន កុំបណ្តោយអ្នកផ្សេងមកបញ្ឈប់អ្នកឲ្យសោះ ប្រឹងអស់ពីលទ្ធភាព មិនត្រូវចុះចាញ់ដោយងាយៗ ដើម្បីបង្ហាញថាសមត្ថភាពអ្នកពិតជាមានមែន៕
ចុចអានបន្ត៖