មុនបោះជើងចូលរោងការ សូមចងចាំរឿងទាំង ៤ប្រការនេះឲ្យច្បាស់

2021-04-09 01:40:00
ចំនួនមតិ 0 | ចំនួនចែករំលែក 0

គេថាមនុស្សស្រីយកប្ដី ដូចយកទាំងគ្រួសាររបស់ប្ដី។ ជីវិតក្រោយរៀបការ លែងជារបស់២នាក់ហើយ តែជារបស់មនុស្សមួយផ្លូននាក់ទៀត។ ចង់មានសុភមង្គល មនុស្សស្រីត្រូវយល់ពីរឿងទាំងនេះឲ្យច្បាស់សិន មុនសម្រេចចិត្តចូលរោងការ។

១. បើចង់បានសុខ ត្រូវនៅបែកគ្នា

មនុស្សកាន់តែច្រើន រឿងកាន់តែច្រើន កាន់តែងាយកើតជាជម្លោះ។ តាមការពិត ប្ដីប្រពន្ធមួយចំនួន បែកគ្នាមិនមែនមកពីពួកគេឡើយ ប៉ុន្តែដោយសារសម្ពាធមកពីគ្រួសារច្រើនជាង។ ដូចនេះហើយ ប្រសិនជាអាច ឬបើមានលទ្ធភាព គួររើចេញនៅតែ២នាក់ប្ដីប្រពន្ធ ដោយមិននៅខាងប្ដី ឬប្រពន្ធអ្វីទាំងអស់។ លទ្ធភាពមិនទាន់មាន អាចនៅផ្ទះជួលតូចល្មម ឬសន្សំលុយបង់រំលោះផ្ទះក៏បាន។

២. កើតកូន កុំឲ្យតាយាយមើល

ប្រសិនបើ តាយាយ មានលទ្ធភាពមើលចៅ នោះគឺជាសំណាងរបស់អ្នកមួយ។ តែបើគាត់គ្មានទេ សូមកុំបន្ទោសគាត់ឲ្យសោះ ព្រោះកូនជាយើងអ្នកកើតមក យើងជាម្ដាយឪពុក ត្រូវមានទំនួលខុសត្រូវចំពោះកូនជាមុនសិន។ បើគិតថាមិនទាន់មានលទ្ធភាពមើលថែទាំកូនទេ សូមពន្យារពេលសិន ហើយកុំផ្ញើឲ្យតាយាយឲ្យសោះ។

៣. មិនបំបែកប្ដី នឹងគ្រួសារគេ

គេថា ទោះយកប្រពន្ធហើយមែនពិត ប្ដីនៅតែកូនប្រុសរបស់ម្ដាយឪពុកគេ ដូចនេះហើយ អ្នកមិនគួរណាដោយវិធីណាមួយ ចង់បំបែកបំបាក់គេពីគ្រួសារ ហើយយកប្ដីទុកតែម្នាក់ឯងនោះឡើយ។ ពីមុនគេស្រលាញ់គ្រួសារគេយ៉ាងម៉េច ក៏ទុកឲ្យដូចដើមទៅ ឲ្យតែគេមានពេលវេលាគ្រប់គ្រាន់ដើម្បីយើងគឺបានហើយ កុំហាមគេមិនឲ្យយកចិត្តទុកដាក់នឹងឪពុកម្ដាយគេឲ្យសោះ។

៤. កុំមើលឃើញទ្រព្យរបស់គ្រួសារប្ដីឲ្យសោះ

បើយកគ្នាហើយ ត្រូវចេះគួចដៃគ្នា រកទទួលទានដើរទៅមុខ កុំនៅចាំសម្ងំតែទទួលទ្រព្យពីគ្រួសារគេឲ្យសោះ។ ព្រោះអ្នកដឹងថា ក្រៅពីយើង ខាងគេនៅមានម៉ែឪ បងប្អូន ពូមីងជាច្រើនទៀត។ ដូចនេះហើយ អាចថាគ្រួសារគេមានទ្រព្យក៏ពិតមែន ក៏មិនដល់ចំណែកយើងដែរ។ ម្លោះហើយ ប្រឹងរកដោយខ្លួនឯងនៅតែជាមធ្យោបាយដែលល្អបំផុត៕

ប្រភព៖ Phunutoday ប្រែសម្រួល៖ Caramel