តម្លៃខ្លួនរបស់ Kim Soo Hyun ហក់ពី ១០ម៉ឺនដុល្លារជាង ឡើងដល់ ៤៥ម៉ឺនដុល្លារក្នុង១ភាគ

2021-03-31 03:00:00
ចំនួនមតិ 0 | ចំនួនចែករំលែក 0

មនុស្សជាច្រើនបានលើកឡើងថា ការដែលកំពូលតារាសម្ដែងប្រុសកូរ៉េ Kim Soo Hyun យកតម្លៃខ្លួនខ្ពស់ពេក នឹងធ្វើឲ្យជះឥទ្ធិពលដល់តារាដទៃ ឲ្យពួកគេធ្វើតាម។

មុននេះបន្តិច បណ្ដាញព័ត៌មាន OSEN បានរាយការណ៍ថា តារាសម្ដែងប្រុសលំដាប់ជួរមុខកូរ៉េ Kim Soo Hyun បានក្លាយជាតារាដែលមានតម្លៃខ្លួនខ្ពស់បំផុតនៅប្រទេសនេះ។ ជាក់ស្ដែង ប្រភពខាងលើបានឲ្យដឹងថា នៅក្នុងរឿងថ្មីដែលមានចំណងជើងថា That Night ប្រុសស្អាតវ័យ ៣៣ឆ្នាំ ស៊ីថ្លៃ ៤៤៣០០០ដុល្លារសម្រាប់តម្លៃខ្លួនមួយភាគ។

ដូចនេះហើយ សម្រាប់ប្រវែងរឿង ២០ភាគ តារារូបនេះ នឹងមានតម្លៃខ្លួនសរុប ៨លាន ៨សែន ៦ម៉ឺនដុល្លារ។ គួរបញ្ជាក់ផងដែរថា នៅក្នុងរឿងចុងក្រោយបំផុតរបស់ខ្លួន ដែលមានចំណងជើងថា It’s Okay to Not Be Okay ប្រុសស្អាតរូបនេះទទួលបានតម្លៃខ្លួន ១៧៧១៥៥ ដុល្លារសម្រាប់រឿងមួយភាគ មានន័យថា លោកបានឡើងតម្លៃខ្លួនដល់ទៅ ២៦៥៨៤៥ដុល្លារ បើធៀបនឹងរឿងចុងក្រោយរបស់ខ្លួន។

នៅពេលព័ត៌មាននេះត្រូវបានចុះផ្សាយ ទស្សនិកជនបានបង្ហាញការមិនពេញចិត្តជាខ្លាំង ដោយពួកគេបានយកមកប្រៀបធៀបថា សូម្បីតែតារាហូលីវូដដូចជា Emma Stone ក៏ទទួលបានតម្លៃខ្លួន៣៥ម៉ឺនដុល្លារប៉ុណ្ណោះ សម្រាប់រឿងមួយភាគ។ មតិមួយចំនួនទៀតលើកឡើងថា នៅពេលឲ្យតម្លៃខ្លួនតារាខ្ពស់បែបនេះ ផលិតករនឹងត្រូវយកពាណិជ្ជកម្មពីចិន ដែលប្រជាជនកូរ៉េកំពុងរិះគន់ជាខ្លាំង។ បន្ថែមពីនេះ មនុស្សជាច្រើនបានប្រាប់ថា ការយកតម្លៃខ្លួនបែបនេះ នឹងធ្វើឲ្យតារាដទៃរៀនតាមផងដែរ៕

ប្រភព៖ zapzee ប្រែសម្រួល៖ Caramel