Zhang Zhe Han គ្រោងថតស្ប៉តស្រាបៀរ ក្រោយល្បីឈ្មោះ
- 2021-03-29 09:30:00
- ចំនួនមតិ 0 | ចំនួនចែករំលែក 0
Zhang Zhe Han គ្រោងថតស្ប៉តស្រាបៀរ ក្រោយល្បីឈ្មោះ
ក្រោយរយៈពេលខិតខំនៅក្នុងពិភពសិល្បៈអស់រយៈពេល ១១ឆ្នាំ នៅទីបំផុត តារាសម្ដែងប្រុសចិន Zhang Zhe Han ក៏រកឃើញភាពល្បីឈ្មោះរបស់ខ្លួន ក្រោយពេលសម្ដែងរឿងបែប BL Words of Honor។ ទន្ទឹមនឹងភាពល្បីឈ្មោះនេះ លោកក៏ត្រូវបានប្រេនជាច្រើនចាប់អារម្មណ៍ផងដែរ។
ថ្មីៗនេះបំផុត បណ្ដាញព័ត៌មាន QQ បានឲ្យដឹងថា យីហោស្រាបៀរយូរឆ្នាំ Yan Jing នឹងអញ្ជើញប្រុសស្អាត២៩ឆ្នាំ ធ្វើជាអ្នកតំណាងថ្មីរបស់ខ្លួន។ នេះបង្ហាញឲ្យឃើញថា ប្រុសស្អាតរូបនេះ នឹងច្រានទម្លាក់ តារាសម្ដែងប្រុសលំដាប់ A ចេញពីតំណែងនេះ ត្បិតនៅពេលបច្ចុប្បន្ន តួរឿង The Untamed គឺជាអ្នកតំណាងរបស់ Yan Jing។
ប្រភពដដែលបានបន្ថែមថា ក្រោយពេលចប់កុងត្រាជាមួយ Wang Yi Bo បៀរ Yan Jing នឹងមិនបន្តកុងត្រាឡើយ ដោយនឹងចុះជាមួយ Zhang Zhe Han វិញ។ យ៉ាងណាក្ដី ប្រភពខាងលើក៏បានបង្ហើបដែរថា ប្រុសស្អាត ២៤ឆ្នាំក៏មិនណយដែរ ដែលក្រោយពេលបញ្ចប់កុងត្រានេះ លោកនឹងមានអ្នកទទួលដៃដប់១ទៀតនោះគឺ ស្រាបៀរ Snow។
បើគិតនៅក្នុងទីផ្សារចិន ស្រាបៀរ Snow គឺជាក្រុមហ៊ុនដែលធំជាង និងមានឈ្មោះល្បីជាង Yan Jing ទៅទៀត ដែលធ្វើឲ្យអ្នកគាំទ្ររបស់ Wang Yi Bo ត្រេកអរថា តារាដែលខ្លួនស្រលាញ់គឺមិនអន់ឡើយ ព្រោះចប់កុងត្រាមួយ មានកុងត្រាមួយទៀតថ្មីភ្លាម។ ទន្ទឹមនឹងនេះ ប្រុសស្អាតទាំង២ក៏កំពុងថតរឿងថ្មីរួមគ្នាដែរ តែគេមិនទាន់ដឹងនៅឡើយទេថា ជាប្រភេទរឿង BL ឬអត់៕