ត្រចៀកកាំត្រូវគេរិះគន់ពេលស្លៀករ៉ូបដូច Song Hye Kyo ក្នុងពេលឈរជាតំណាងប្រេនខោអាវមួយ

2021-03-29 02:10:00
ចំនួនមតិ 0 | ចំនួនចែករំលែក 0

ជាថ្មីម្ដងទៀត តំណាងមកពីប្រទេសចិន តារាសម្ដែងស្រីជួរមុខ Zhao Wei ត្រូវគេវាយតម្លៃថាស្អាតមិនដល់ មិត្តរួមអាជីពមកពីប្រទេសកូរ៉េដែលជាកំពូលតារាសម្ដែងស្រី Song Hye Kyo។

ប្រសិនជាអ្នក ជាមនុស្សចាប់អារម្មណ៍ដល់ Fashion នោះ អ្នកនឹងដឹងថា កំពូលតារាសម្ដែងស្រីមកពី២ប្រទេសផ្សេងគ្នា គឺ Zhao Wei និង Song Hye Kyo សុទ្ធតែជាអ្នកតំណាងឲ្យប្រេនខោអាវលំដាប់ខ្ពស់ Fendi ទាំងអស់។ ដោយតួរឿងព្រះនាងយេយេគឺជាតំណាងរបស់ប្រទេសចិន រីឯតួរឿងបំណុលផ្ទះជំពាក់ស្នេហ៍ គឺជាតំណាងមកពីប្រទេសកូរ៉េ។

មុននេះបន្តិច ស្រីស្អាត៤៥ឆ្នាំ បានចូលរួមក្នុងកម្មវិធីបង្ហាញម៉ូដរបស់ប្រេនដែលខ្លួនតំណាងនៅទីក្រុងសៀងហៃ ដោយនាងស្លៀករ៉ូបវែង និងស្បែកជើងប៊ូកវែងដូចគ្នា។ អ្វីដែលគួរឲ្យនិយាយនោះគឺ ម៉ូដមួយឈុតនេះ មុននោះត្រូវបានស្រីស្អាត ៣៩ឆ្នាំ ស្លៀករួចទៅហើយ នៅពេលថតរូបឲ្យទស្សនាវដ្ដីមួយ។

ក្រោយពេលរូបភាពរបស់ Zhao Wei ត្រូវបានចុះផ្សាយ មនុស្សជាច្រើនបានលាន់មាត់បង្អាប់អ្នកម្ដាយកូន១ថា ស្លៀកឈុតនេះមិនស្អាតឡើយ គឺចាញ់មិត្តរួមអាជីពមកពីប្រទេសជិតខាងដាច់។ មនុស្សជាច្រើនលើកឡើងថា ត្រចៀកកាំនៅពេលនេះវ័យជ្រេហើយ ដូចនេះមិនសមនឹងម៉ូដទាំងនេះទៀតទេ។ ដោយសារតែ Song Hye Kyo នៅមានសម្រស់ផូរផង់នៅឡើយ ដូចនេះឈុតនេះស្អាតឥតខ្ចោះសម្រាប់នាង។ យ៉ាងណាក្ដី អ្នកគាំទ្ររបស់ តារាចាស់វស្សាជាងបានតបទល់វិញថា ទោះបីជាយ៉ាងណា ក៏ Zhao Wei អាយុបង Song Hye Kyo ៦ឆ្នាំដែរ ដូចនេះបើទោះស្អាតចាញ់ក៏គ្មានអ្វីប្លែកដែរ៕