អ្នកដឹកនាំរឿងបង្ករចម្រូងចម្រាស ព្រោះប្រៀបធៀបតួរឿង BL ថ្មី
- 2021-03-29 01:55:00
- ចំនួនមតិ 0 | ចំនួនចែករំលែក 0
អ្នកដឹកនាំរឿងបង្ករចម្រូងចម្រាស ព្រោះប្រៀបធៀបតួរឿង BL ថ្មី
ដោយសារតែ ភាពល្បីឈ្មោះនៃខ្សែភាពយន្តភាគបុរាណបែប BL តារាសម្ដែងប្រុសស្រស់សង្ហា Zhang Zhe Han កំពុងតែមានប្រជាប្រិយភាពជាខ្លាំង តែការប្រៀបធៀបលោក នឹងតារាប្រុសជួរមុខ Wang Yi Bo ទទួលបានការរិះគន់ជាខ្លាំង។
ដូចនឹងរដូវក្ដៅកាលពីឆ្នាំ ២០១៩ដែរ ខ្សែភាពយន្តភាគបុរាណចិនបែបមនោសញ្ចេតនាប្រុស នឹងប្រុស The Untamed ទាក់ទាញចំណាប់អារម្មណ៍ខ្លាំងនោះ នៅពេលនេះ រឿងបែបនេះមួយទៀត ដែលមានឈ្មោះថា Words of Honor កំពុងតែល្បីឈ្មោះភ្លូកទឹកភ្លូកដី មិនត្រឹមតែនៅក្នុងស្រុកនោះទេ ថែមទាំងល្បីរាលដាលដល់ប្រទេសជិតខាង និងក្នុងតំបន់ទៀត។
ភាពជោគជ័យនេះ បានធ្វើឲ្យតារាសម្ដែងប្រុសឯកក្នុងរឿងគឺ Zhang Zhe Han ល្បីឈ្មោះក្នុងរយៈពេលដ៏ខ្លីបំផុត។ នៅពេលនេះ ប្រុសស្អាតវ័យ ២៩ឆ្នាំកំពុងស្ថិតក្រោមការគ្រប់គ្រងរបស់កំពូលតារាសម្ដែងស្រី Zhao Wei ហើយស្រីស្អាតរូបនេះកំពុងតែវែកផ្លូវរកឱកាសថ្មីឲ្យលោកសព្វគ្រប់បែបយ៉ាង។
ថ្មីៗនេះ អ្នកដឹកនាំរឿងល្បីឈ្មោះ Liu Shu Da បានបង្ករចម្រូងចម្រាសជាខ្លាំងនៅពេលលោកប្រៀបធៀបរវាង Zhang Zhe Han និង Wang Yi Bo ដែលសុទ្ធតែជាតារាដែលល្បីឈ្មោះពីរឿងស្នេហាប្រុស និងប្រុសដូចគ្នា។ លោកបានឲ្យដឹងថា ត្រឹម Wang Yi Bo ដែលមិនបានរៀនសម្ដែងតាមក្បួនខ្នាតត្រឹមត្រូវនោះ ល្បីឈ្មោះប៉ុណ្ណឹងទៅហើយ ទម្រាំតែ Zhang Zhe Han បញ្ចប់ការសិក្សាពីសាលាវិចិត្រសិល្បៈទៀតនោះ ប្រាកដជាល្បីឈ្មោះជាងជាក់ជាមិនខាន។
ក្រោយពេលការប្រៀបធៀបនេះត្រូវបានបែកធ្លាយ មនុស្សជាច្រើនបានក្ដៅក្រហាយ ហើយលើកឡើងថា តាមការពិត អ្នកដឹកនាំរឿងនេះ កំពុងឃើញប្រុសស្អាត២ដួងកំពុងតែល្បីឈ្មោះ ទើបចង់តោងកេរ្តិ៍ឈ្មោះរបស់គេដែរ ព្រោះលោកគ្មានស្នាដៃថ្មីយូរមកហើយ។ មកទល់ពេលនេះ ភាគីរបស់ប្រុសស្អាតទាំង២មិនបានចេញមុខបកស្រាយនឹងការប្រៀបធៀបនេះឡើយ៕