មនុស្សស្រីត្រូវចេះឲ្យតម្លៃនូវរឿងទាំងនេះ បើចង់បានសេចក្តីសុខទៅថ្ងៃអនាគតពិតប្រាកដ

2021-03-18 02:40:00
ចំនួនមតិ 0 | ចំនួនចែករំលែក 0

១០ឆ្នាំ សម្រាប់មនុស្សមានមិនច្រើនទេ ហេតុនេះកុំរស់តែមួយថ្ងៃដើម្បីមួយថ្ងៃ។ បើសិនជាអ្នកចង់បានអនាគតមួយដ៏ល្អត្រចះត្រចង់ពិតប្រាកដមែន គួរតែចេះឲ្យតម្លៃទៅលើរឿងខាងក្រោម៖

១. ចៀសវាងជម្លោះ

មនុស្សជាច្រើនតែងតែចង់បានជីវិតសាមញ្ញមួយ ប៉ុន្តែទន្ទឹមនឹងនោះពួកគេបែរជាត្រូវឆ្លងកាត់នូវរឿងរ៉ាវផ្ទាល់ខ្លួនជាច្រើនរហូតបង្កើតទៅជាស្រ្តេស ជម្លោះ ច្រណែន ឈ្នានីសគ្នាទៅវិញ។ ដូច្នេះហើយ វិធីល្អបំផុតក្នុងការឲ្យជីវិតចៀសឆ្ងាយពីមនុស្សឈ្លានពាន គួរតែកុំបង្កើតទំនាក់ទំនងណាដែលស្មុគស្មាញ។ រឿងនឹងកាន់តែពិបាកទៅៗ នៅពេលយើងដឹងថាទឹកចិត្តរបស់បុគ្គលនោះគ្រាន់តែសម្តែង។ ហេតុនេះ ជីវិតដែលរីករាយ គឺការមានសុភមង្គល សាមញ្ញ និងសន្តិភាពផ្លូវចិត្តលើផ្នែកទំនាក់ទំនង។

២. ចូលរួមនឹងសកម្មភាពដែលមានប្រយោជន៍

នៅក្នុងសង្គមនេះ មនុស្សជាច្រើនបានឲ្យតម្លៃគ្នាទៅលើមាសប្រាក់ សម្ភារៈនិយម ការងារ ឬ របៀបតុបតែងខ្លួនជាដើម។ ពួកគេយល់ថា របស់ទាំងនេះនឹងជួយលើកតម្កើងកិត្តិយស ទំនុកចិត្ត និងសុវត្ថិភាពសម្រាប់ពួកគេ។ យ៉ាងណាក៏ដោយ ភាពរីករាយដែលលាយបញ្ចូលជាមួយសារៈសំខាន់មិនងាយសាបសូន្យ គឺ សកម្មភាពមានប្រយោជន៍ដូចជា ការលេងកីឡា អានសៀវភៅ លេងតន្រ្តីឬសិល្បៈ ដំណើរកម្សាន្ត បរិច្ចាគ ស្ម័គ្រចិត្ត … ជាដើម។ កីឡាជួយឲ្យរាងកាយរឹងមាំ អានសៀវភៅជួយបង្កើនចំណេះដឹង សិល្បៈបង្កើនការអភិវឌ្ឍផ្នែកទេពកោសល្យ ដើរលេងកម្សាន្តជួយឲ្យមានសេរីភាព ពង្រីកទស្សនៈវិស័យ ការស្ម័គ្រចិត្តនិងធ្វើការងារសប្បុរសធម៌ជួយយើងឲ្យដឹង ចែករំលែក ផ្តល់ក្តីស្រលាញ់ និងចេះយកចិត្តទុកដាក់ពីគ្នាទៅវិញទៅមក។ សុភមង្គលសាមញ្ញៗទាំងនេះ គឺជាការចាប់ផ្តើមនៃជីវិតពោរពេញដោយថាមពលវិជ្ជមាន ជាមួយសកម្មភាពវិជ្ជមានប្រចាំថ្ងៃ។

៣. កំណត់តម្លៃសម្រាប់មូលដ្ឋានជីវិត

ជីវិតមានន័យអាស្រ័យលើអ្នកចេះកំណត់តម្លៃចេះប្រើប្រាស់ពេលវេលាក្នុងមួយថ្ងៃៗមានប្រយោជន៍ប៉ុណ្ណា។ លើលោកនេះ នរណាក៏គេមាន២៤ម៉ោងដូចគ្នាដែរ តែមានអ្នកខ្លះក្រ អ្នកខ្លះមាន អ្នកខ្លះឆាប់ជោគជ័យ ខ្លះទៀតចំណាយពេលយូរ។ ចេះបែងចែកអ្វីដែលហៅថាអាទិភាព មិនប្រព្រឹត្តិអ្វីដោយមានៈ ចេះស្តាប់គេ មើលគេមើលឯង និងរៀនមើលពីអតីតកាលរបស់ខ្លួន។

៤. រៀនមានក្តីស្រមៃ ហើយបង្កើតក្តីស្រមៃនោះឲ្យក្លាយជាការពិត

អ្នកត្រូវចេះស្រមៃពីអនាគតរបស់ខ្លួនថា តើ៥ឆ្នាំទៀតអ្នកត្រូវមានអ្វីក្នុងដៃ? ៥ឆ្នាំទៀត អ្នកនឹងឡើងតំណែងអ្វី? មានផ្ទះ ឡាន គ្រួសារ ឬលុយកាក់កម្រិតណាជាដើម។ កុំរស់តែមួយថ្ងៃ កុំរស់ថ្ងៃនេះដូចម្សិលមិញ តែត្រូវរស់ថ្ងៃនេះឲ្យល្អជាងម្សិលមិញ គ្រប់ពេល៕

ប្រភព៖ emdep ប្រែសម្រួល៖ លឹម សុនា