គួរធ្វើយ៉ាងណាចំពោះស្នេហា ដែលយើងគ្មានឋានៈអ្វីច្បាស់លាស់ទាំងអស់?

2021-03-06 01:28:00
ចំនួនមតិ 0 | ចំនួនចែករំលែក 0

ជាមួយមនោសញ្ចេតនាដែលគ្មានឈ្មោះច្បាស់លាស់បែបនេះ អាចធ្វើឲ្យយើងមានអារម្មណ៍មិនជាប់ចំណង តែពេលខ្លះមានអារម្មណ៍អន់ចិត្តខ្លាំង។ ដោយសារតែមិនច្បាស់លាស់ ទើបមិនអាចខឹង មិនមានសិទ្ធិប្រចណ្ឌ គ្មានសិទ្ធិទាមទារ ហើយក៏មិនអាចធ្វើទន់ខ្សោយដើម្បីឲ្យគេមកលួងបាន។

ធ្លាប់មានមនុស្សនិយាយថា៖ ទទួលយកស្នេហាដែលអត់ច្បាស់លាស់មួយ ប្រៀបដូចជាកាន់ធ្យូងមួយដុំ។ ពេលទុកទៅវាក្ដៅ តែបើបោះទៅគ្មានអ្វីប្រើ។ ពេលហៅថា ស្នេហាមិនច្បាស់លាស់ហើយ គឺស្ថិតនៅកម្រិតខ្ពស់ជាងមិត្តភ័ក្ដិជិតស្និទ្ធបន្តិច តែបើឲ្យនិយាយថាសង្សារ គឺមិនទាន់ដល់។ អ្វីគ្រប់គឺដូចទឹកកន្លះក្អម មិនដល់ណាទាំងអស់ ហើយក៏គ្មានឈ្មោះហៅដូចគ្នា។ អ្នកខ្លះគិតថា មនោសញ្ចេតនានេះធ្វើឲ្យគេមានអារម្មណ៍សុវត្ថិភាព។ បើឈានទៅមុខបានក៏បានទៅ គ្មានអីចងជើងគ្នា បើនឹកក៏ជួប អត់នឹកក៏ហី។ យ៉ាងណាក្ដី ដល់ពេលណាមួយ អ្នកនឹងមានអារម្មណ៍ថាគ្មានសេរីភាពក្នុងមនោសញ្ចេតនាបែបនេះ វានឹងធ្វើឲ្យអ្នកធុញថប់ និងស្អុះស្អាប់។

ប្រសិនបើអ្នកធ្លាក់ចូលក្នុងកាលៈទេសៈដូចនេះ គួរធ្វើតាមវិធីទាំងនេះ៖

១. យើងជាអ្វីនឹងគ្នា?

សម្រាប់មនុស្សជាច្រើន សំណួរមួយនេះ អាចនឹងបញ្ចប់មនោសញ្ចេតនាដែលមិនច្បាស់លាស់មួយ ព្រោះចំពោះអ្នកដែលចង់បានស្នេហាមិនច្បាស់លាស់ គេនឹងគេចវេះសំណួរមួយនេះ។ ហើយសំណួរដែលភាគីម្ខាងទៀតឆ្លើយមកវិញ មួយគឺអ្នកទាំង២អាចឈានដល់សង្សារនឹងគ្នាតែម្ដង និងមួយទៀតគឺអាចដាច់គ្នាផឹងដូចគ្នា។ កុំភ័យខ្លាចនៅពេលសួរសំណួរមួយនេះ ព្រោះប្រសិនបើគេស្រលាញ់យើងមែន គេនឹងមិនភ័យខ្លាចនឹងឆ្លើយឡើយ តែបើគេបដិសេធ អ្នកនឹងចំណេញ ព្រោះតាមការពិត គេគ្រាន់តែចង់លេងសើចនឹងយើងតែប៉ុណ្ណោះ។

២. អ្នករារែកឬអត់ ពេលផ្ញើសារឲ្យគេ

ពេលស្រលាញ់គ្នា យើងអាចបង្ហាញចរិតខ្លួនឯងតាមរយៈការផ្ញើសារ។ យ៉ាងណាមិញ ប្រសិនបើអ្នកមានអារម្មណ៍ថាមានសម្ពាធ ពេលចែករំលែករឿងអ្វីមួយនឹងគេ មានន័យថាអ្នកកំពុងមានអារម្មណ៍មនោសញ្ចេតនាមួយនេះ មានភាពអវិជ្ជមានច្រើនជាងវិជ្ជមាន។ អ្នកគួរតែចាំថា នៅក្នុងស្នេហាមួយក៏ដោយ ប្រសិនបើយើងមិនមែនជាមនុស្សពិតរបស់ខ្លួនឯង ហើយខំធ្វើខ្លួនជាមនុស្សផ្សេងដើម្បីផ្គាប់ចិត្តគេនោះ ស្នេហានោះ នឹងមិនស្ថិតស្ថេរឡើយ ត្បិតអ្នកនឹងមិនអាចសម្ដែងបានរហូតនោះទេ។

៣. គ្មានគោលបំណងច្បាស់លាស់

គោលបំណងច្បាស់លាស់គឺជាវិធីតែមួយគត់ ប្រែស្នេហាគ្មានឈ្មោះ មកជាស្នេហាមានឈ្មោះច្បាស់លាស់។ ករណីនេះកើតឡើងលុះត្រាតែភាគីទាំងសងខាងមានទំនួលខុសត្រូវនឹងគ្នា និងចង់បន្តទៅមុខនឹងគ្នា។ យ៉ាងណាក្ដី បើមនោសញ្ចេតនានេះធ្វើឲ្យអ្នកមិនចង់មានទំនួលខុសត្រូវអ្វីទាំងអស់ មានន័យថាអ្នកមិនទាន់ត្រៀមខ្លួនរួចរាល់សម្រាប់ស្នេហាដែលច្បាស់លាស់នោះទេ ហើយអ្នកទាំងពីរក៏មិនអាចដើរដល់ត្រើយជាមួយគ្នាបានដែរ៕

ចុចអានបន្ត៖

ប្រភព៖ Guu ប្រែសម្រួល៖ Caramel