ហេតុអ្វី Zhao Li Ying និង Yang Mi មិនថតរឿងជាមួយគ្នា?

2021-02-18 07:18:53
ចំនួនមតិ 0 | ចំនួនចែករំលែក 0

ជាតារាជួរមុខដូចគ្នាក្នុងវិស័យសិល្បៈចិន តែតារាសម្ដែងស្រី២ដួង Yang Mi និង Zhao Li Ying មិនដែលមានស្នាដៃរួមគ្នាឡើយ។

ចាប់តាំងពីពេលចូលសិល្បៈមកដល់សព្វថ្ងៃ តារាសម្ដែងលំដាប់ A ចិន Yang Mi និង Zhao Li Ying បានសម្ដែងមិនក្រោម១០០រឿងឡើយ។ ដោយសារតែអាយុស្របាលៗគ្នា ព្រមទាំងមានកេរ្តិ៍ឈ្មោះប្រហាក់ប្រហែលគ្នាទៀតនោះ បានធ្វើឲ្យស្រីស្អាតទាំង២តែងត្រូវបានគេប្រៀបធៀបជានិច្ច។

យ៉ាងណាក្ដី វណ្ណកម្មតែ១គត់ដែលស្រីស្អាតនេះធ្លាប់សម្ដែងជាមួយគ្នាគឺរឿង The Dream of Red Mansion នៅឆ្នាំ២០០៨ ដែលកាលនោះពួកគេសម្ដែងជាតួអង្គបន្ទាប់បន្សំ និងគ្មានឈុតឆាកជាមួយគ្នាទាល់តែសោះ។ ចាប់ពីពេលនោះមក គេមិនដែលឃើញ កំពូលតារាទាំង២សហការគ្នាទៀតឡើយ។

មហាជនធ្លាប់បានដឹងហើយថា Zhao Li Ying ធ្លាប់ជេរអ្នកគាំទ្ររបស់ Yang Mi ជាសាធារណៈ ដោយសារពួកគេថានាងមានមុខដូចតួរឿង Legend of Fuyao។

បណ្ដាញព័ត៌មាន Sohu បានរៀបរាប់ពីមូលហេតុដែលធ្វើឲ្យស្រីស្អាតទាំង២នេះមិនសម្ដែងរួមគ្នា។ តាមនោះដែរ Yang Mi ធ្លាប់ឈ្នះពានតារាស្រីឆ្នើមអន្តរជាតិ ទោះបីជាសមត្ថភាពសម្ដែងនៅមានកម្រិតនៅឡើយ។ ចំណែកឯប្រពន្ធរបស់ Feng Shaofeng វិញក៏ធ្លាប់ទទួលបានពានតារាស្រីឆ្នើមក្នុងប្រទេសដែរ ទាំងសមត្ថភាពមិនទាន់នៅថេរនៅឡើយ។

ប្រភពដដែលបានឲ្យដឹងថា ទោះបីជានៅពេលនេះសុទ្ធតែល្បីឈ្មោះរៀងខ្លួនហើយក្ដី តែ Yang Mi ល្បីឈ្មោះមុន Zhao Li Ying ឆ្ងាយណាស់ ដោយស្រីស្អាតនេះបានសម្ដែងរឿងជាមួយស្ដេចកំប្លែងទិនហ្វីតាំងពីអាយុ ៧ឆ្នាំ។ បន្ថែមពីនេះ ដោយសាររឿងស្នេហា អ្នកទាំង២ក៏ពិបាកសម្ដែងនឹងគ្នាដែរ ដោយកាលពីសម្ដែងរឿង Palace តារាសម្ដែង Feng Shaofeng ប្ដីរបស់ Zhao Li Ying ធ្លាប់ទទួលស្គាល់ថា ខ្លួនពិតជាលង់នឹងនាងពិតមែន។

មូលហេតុចុងក្រោយនោះគឺ នៅពេលនេះ ស្រីស្អាតទាំង២សុទ្ធតែឈរនៅលើកំពូលគេទាំងអស់ ដូចនេះបើសម្ដែងរឿងរួមគ្នា នឹងពិបាករកតួឯកខ្លាំងណាស់ ដែលធ្វើឲ្យតារាទាំង២គ្មានឱកាសសម្ដែងរួមគ្នា៕