ចូលមើលខាងក្នុងផ្ទះតម្លៃ ៤.៣លានដុល្លាររបស់ Hyun Bin
- 2021-02-15 08:00:00
- ចំនួនមតិ 0 | ចំនួនចែករំលែក 0
ចូលមើលខាងក្នុងផ្ទះតម្លៃ ៤.៣លានដុល្លាររបស់ Hyun Bin
ផ្ទះដែលទើបតែទិញថ្មីរបស់កំពូលតារាសម្ដែងប្រុស Hyun Bin ធ្លាប់ត្រូវបានគេសង្ស័យថា ទិញដើម្បីនៅជាមួយមិត្តស្រី Son Ye Jin តែអ្នកទាំង២បានចេញមុខបដិសេធ។
បណ្ដាញព័ត៌មាន On បានចុះផ្សាយពីគេហដ្ឋានថ្មីរបស់តារាសម្ដែងប្រុសជួរមុខកូរ៉េ Hyun Bin។ អចលនទ្រព្យថ្មីរបស់តួរឿង Crash Landing On You ស្ថិតនៅខេត្ត Gyeonggi ដែលមានទំហំ ២៤២ម៉ែត្រការ៉េ ក្នុងតម្លៃ ៤.៣លានដុល្លារ។
ផ្ទះនេះត្រូវបានសាងសង់ឡើងដោយយកស្ទីលទំនើប និងពណ៌ស្រាល ហើយប្រើពន្លឺធម្មជាតិច្រើន។ បន្ទប់ទទួលភ្ញៀវត្រូវបានម្ចាស់ផ្ទះផ្ដោតអារម្មណ៍ជាពិសេស។ ផ្ទះបាយត្រូវបានប្រុសស្អាត ៣៨ឆ្នាំប្រើពណ៌ខ្មៅដើម្បីច្នៃជាចម្បង។ បន្ទប់គេងត្រូវបានលាបពណ៌ផ្កាឈូកស្រាល និងពណ៌ឈើ។ មុននោះដែរ ប្រភពជាច្រើនបានឲ្យដឹងថា សិល្បកររូបនេះទិញផ្ទះថ្មីដើម្បីត្រៀមរៀបការរស់នៅជាមួយកំពូលតារាសម្ដែងស្រី Son Ye Jin តែអ្នកទាំង២បដិសេធ។
បន្ទប់ធំបន្ទាប់ទី២ គឺបន្ទប់ផ្លាស់ខោអាវរបស់ Hyun Bin។ បណ្ដាញព័ត៌មាន Naver បានឲ្យដឹងថា ម្ចាស់គម្រោងផ្ទះបានសម្រេចប្រគល់ឯកសាររួចរាល់ឲ្យតារារូបនេះកាលពីខែមករាមុននេះ។ បន្ទប់ទឹក និងការ៉ាស់ឡានក៏ជាចំណុចគួរឲ្យចាប់អារម្មណ៍របស់ផ្ទះនេះផងដែរ៕