សម្រាប់យើងទាំងអស់គ្នាសក់គឺមានសារៈសំខាន់ណាស់ក្នុងការលើកកម្ពស់សម្រស់ឲ្យកាន់តែមានភាពទាក់ទាញថែមមួយកម្រិតទៀត។ ដូចច្នេះហើយបានជាយើងខ្វល់ខ្វាយការលេងម៉ូដ ពណ៌ និងយកចិត្តទុកដាក់ក្នុងការថែទាំសក់របស់យើង។ ប្រសិនបើសក់ជ្រុះតិចតួចនោះវាគឺជារឿងធម្មតាទៅហើយ ប៉ុន្តែប្រសិនបើវាជ្រុះច្រើនខុសប្រក្រតីនោះ អ្នកត្រូវរកវិធីព្យាបាលភ្លាម។ ទាំងនេះគឺជាមូលហេតុដែលធ្វើឲ្យសក់ខូចនឹងជ្រុះ៖

• កម្តៅមកពីឧបករណ៍ ការងូតទឹកក្តៅ ឬក៏កម្តៅថ្ងៃខាងក្រៅ ជាពិសេសគឺការលេងពណ៌សក់ញឹកញាប់ពេកបណ្តាលឲ្យសក់ខូច និងជ្រុះ។
• ការប្តូរផលិតផលសក់ជាប្រចាំ និងការចងសក់តឹងពេកធ្វើឲ្យបែកញើសក្បាល មានឃ្លិន បញ្ចេញជាតិប្រេងច្រើនដែលបណ្តាលឲ្យសក់ខូចនឹងជ្រុះ។
• របបអាហារគ្មានតុល្យភាព គ្មានជាតិរ៉ែ កាល់ស្យូម ឬវីតាមីនគ្រប់គ្រាន់ក៏ជាមូលហេតុដែរ។
• ស្រ្តេស និងការផ្លាស់ប្តូរអ័រម៉ូន ភាពតានតឹង ការគិតច្រើនជាមូលហេតុដែលបណ្តាលឲ្យសក់ស្គូវ និងជ្រុះ។

បន្ទាប់ពីបានស្វែងយល់ពីមូលហេតុមួយចំនួនដែលអាចបណ្តាលឲ្យមានការជ្រុះសក់ យើងក៏មានវិធីព្យាបាលសក់ដែលស្តើង សក់ជ្រុះ ឬសក់ខូចឲ្យបានប្រសើរឡើងវិញតាមវិធីធម្មជាតិដែលមានប្រយោជន៍ និងប្រសិទ្ធភាពខ្ពស់៖

• បរិភោគអាហារដែលសំបូរទៅដោយជាតិដែក ជាតិរ៉ែ កាល់ស្យូម វីតាមីននឹងជួយដល់ការលូតលាស់សក់ឲ្យមានសុខភាពល្អ។
• ការម៉ាស្សាក្បាល មុនឬក្រោយ និងពេលកំពុងកក់សក់ ជួយបង្កើនលំហូរឈាមដែលជួយក្នុងការបង្កើតសក់ថ្មីឲ្យដុះមកវិញ។
• ប្រទាលកន្ទុយក្រពើដែលជាគ្រឿងផ្សំដ៏មានប្រសិទ្ធិភាពខ្ពស់ (ជាប្រទាលស្រស់ ឬក៏ជែលដែលមានលក់ស្រាប់) ប្រើពីរទៅបីដងក្នុងមួយសប្តាហ៍នៅលើស្បែកក្បាលអាចកាត់បន្ថយអង្គែ ជួយព្យាបាលស្បែកក្បាល និងជំនួយដល់ការលូតលាស់សក់ផងដែរ។

ទាំងនេះជាវិធីធម្មជាតិងាយៗមួយចំនួនតូចដែលពិតជាអាចជួយកាត់បន្ថយការជ្រុះសក់ និងជួយឲ្យសក់មានសុខភាពល្អ។ ឆាប់ដឹង ឆាប់ព្យាបាល និងឆាប់ជាសៈស្បើយដោយវិធីធម្មជាតិទាំងនេះ។

រូបភាព៖ Pexels, Cosmo, Pinterest

អានបន្ត៖

• ស្ទាយសក់ ៣ ម៉ូដនេះធានាថាសមសម្រាប់នារីៗដែលមានសក់ស្តើង
• មូលហេតុទាំង ៥ នេះហើយដែលធ្វើឲ្យស្បែកអ្នកនូវតែស្ងួតខ្លាំង