៨ចំណុចពីមិត្តភក្កិបែបតុកសិក បើអ្នកកំពុងជួប គួរតែរកផ្លូវបញ្ចប់ឲ្យហើយ
- 2020-11-24 03:26:00
- ចំនួនមតិ 0 | ចំនួនចែករំលែក 0
៨ចំណុចពីមិត្តភក្កិបែបតុកសិក បើអ្នកកំពុងជួប គួរតែរកផ្លូវបញ្ចប់ឲ្យហើយ
មិត្តភាព ពេលខ្លះប្រៀបដូចពន្លឺព្រះអាទិត្យចាំងចូលក្នុងជីវិត តែបើអ្នកបានជួបតុកសិកមិត្តភក្កិប្រភេទទាំង៧នេះវិញ អ្នកគួរតែបញ្ចប់ភាពជាមិត្តភក្កិនេះទៅ។
១. មើលងាយអ្នក
នៅពេលដែលអ្នកកំពុងសប្បាយចិត្តនឹងរឿងជោគជ័យអ្វីមួយ ពួកគេបែរជាមិនសរសើរអ្នក ហើយថែមទាំងធ្វើឲ្យអ្នកយល់ថាខ្លួនឯងជាមនុស្សល្ងង់ទៅវិញ។ មិត្តភក្កិរបៀបនេះ មិនដែលរីករាយចេញពីចិត្តពិតប្រាកដ នៅពេលឃើញអ្នកទទួលលទ្ធផលល្អទេ តែបែរជាធ្វើឲ្យអ្នកយល់ថាខ្លួនឯងគ្មានបានការសម្រាប់ពួកគេទៅវិញ។
២. និយាយតែពីរឿងខ្លួនឯង
ពួកគេមិនដែលចង់ស្តាប់នូវអ្វីដែលអ្នកចង់ចែករំលែក តែផ្ទុយទៅវិញ ពួកគេបែរជាលើករឿងតែរបស់ខ្លួនឯងមកនិយាយ ប្រៀបដូចជារឿងពិសេសនឹកស្មានមិនដល់។ នៅពេលដល់វេនអ្នកនិយាយម្តង គេបែរជាបង្ហាញថា ជារឿងរំខាន និងមិនសូវចាប់អារម្មណ៍ទៅវិញ។ ម្តងៗ អ្នកមានអារម្មណ៍ថាចង់ឆ្កួតចិត្ត ដោយសារគេមិនស្តាប់រឿងរបស់អ្នក។
៣. បំពានព្រំដែន
គេតែងតែធ្វើឲ្យអ្នកមានអារម្មណ៍មិនស្រណុកចិត្ត មិនផ្តល់សូម្បីទំនុកចិត្ត និងថែមទាំងនិយាយពាក្យឈឺចាប់ដល់អ្នក បើទោះអ្នកធ្លាប់ប្រាប់គេពីរឿងទាំងនោះមកពីមុនក៏ដោយ។ ទន្ទឹមនឹងនេះ អ្នកត្រូវបានគេចាត់ទុកថា ជាមនុស្សសាងកំហុស ពេលណាដែលឈ្លោះឬខឹងគ្នាម្តងៗ ។
៤. មិនចេះរក្សាអាថ៍កំបាំង
អ្នកខំទុកចិត្តគេ ហើយប្រាប់រឿងក្នុងចិត្តដល់គេ តែបែរជាស្អែកឡើង យករឿងទាំងនោះ ទៅនិយាយខ្ទរខ្ទាយពេញក្រុមមិត្តភក្កិ រហូតនរណាៗក៏គេដឹងគ្រប់គ្នាទៅវិញ។
៥. មិនដែលសុំទោស
ពួកគេមិនដែលសុំទោស បើទោះគេខ្លួនឯងដឹងច្បាស់ថា រឿងទាំងនោះគេខុសក៏ដោយ។ ហើយគេក៏មិនដែលបង្ហាញពីភាពស្មោះត្រង់ ហើយបើនិយាយពាក្យសុំទោសវិញ ក៏បែបលក្ខណៈថាអ្នកជាមនុស្សពូកែត្រួតត្រា ពូកែចាប់កំហុសទៅវិញ។
៦. មិនដែលបង្ហាញស្រមោល ពេលអ្នកជួបបញ្ហា
ពេលគេជួបបញ្ហា អ្នកតែងបង្ហាញខ្លួនជានិច្ច តែដល់អ្នកជួបទុក្ខវិញ កុំថាឡើយស្រមោលគេក៏មិនឃើញផង។ គេចាត់ទុកបញ្ហារបស់អ្នកដូចសំរាមនៅក្រោមគ្រែ ដោយគ្មានចេះសួរនាំ ឬនៅក្បែរផ្តល់កម្លាំងចិត្តសូម្បីបន្តិច។
៧. ក្រោយដើរលេងជាមួយគ្នា អ្នកតែងមានអារម្មណ៍មិនសប្បាយចិត្ត
អ្នកតែងយល់ថា ខ្លួនឯងពិបាកចូលចំណោមពួកគេ បើទោះអ្នកព្យាយាមសម្របខ្លាំងក៏ដោយ។ ពេលដើរលេង គួរតែសប្បាយចិត្ត តែពេលមកផ្ទះវិញ អ្នកបែរជាយល់ថា ខ្លួនឯងមិនល្អគ្រប់គ្រាន់។
៨. អ្នកតែងសួរខ្លួនឯងថា តើរវាងអ្នកនិងគេពិតជាមិត្តភក្កិជិតស្និទ្ធនឹងគ្នាមែនអី?
ជាញឹកញាប់ អ្នកត្រូវសួរខ្លួនឯងជារឿយៗ ថាហេតុអ្វីអ្នកគឺជាមិត្តនឹងគេ? ហើយពេលគិតដល់ចំណុចនេះ អ្នកតែងមានអារម្មណ៍អត់សប្បាយចិត្ត និងឈឺក្បាលកាន់តែខ្លាំង។
គ្រប់យ៉ាង បើអ្នកតែងតែជាអ្នកដោះស្រាយ ចេញមុខតែឯកឯង ច្រើនតែផ្តល់ឲ្យគេ តែមិនដែលទទួលបានអ្វីត្រលប់មកវិញទេ គួរតែបញ្ចប់ទំនាក់ទំនងមិត្តភាពបែបតុកសិកបែបនេះចោលទៅ៕