បើអ្នកកំពុងតែធ្វើរឿងទាំងនេះ ១០ ឆ្នាំទៅមុខនឹងស្តាយក្រោយជារៀងរហូត

2020-11-19 02:25:00
ចំនួនមតិ 0 | ចំនួនចែករំលែក 0

ពីមួយថ្ងៃទៅមួយថ្ងៃ ឈានចូលដល់មួយឆ្នាំៗ ពេលវេលាហាក់បីដូចជាដើរលឿនហួសស្មាន។ ពេលខ្លះអាចនាំឲ្យអ្នកពុំបានធ្វើរឿងដែលសំខាន់ចាំបាច់ ឬបណ្តោយឲ្យឱកាសមានតម្លៃកន្លងផុតទៅទទេៗ។ ខាងក្រោមនេះ គឺជាសារសម្រាប់រំលឹកខ្លួនឯង ដើម្បីជៀសវាងនូវទង្វើមិនគប្បីមួយចំនួន និងការពារកុំឲ្យស្តាយក្រោយកែប្រែអ្វីមិនកើត នៅពេល ១០ឆ្នាំខាងមុខទៀត។

១. មានចំណងស្នេហាជាមួយមនុស្សដែលខ្វះការលើកទឹកចិត្ត

អ្នកខ្លះខ្លាចភាពឯកា រហូតដល់ជ្រើសរើសស្នេហាមួយខុសទំនងនិងខ្វះការលើកទឹកចិត្ត។ ប៉ុន្តែបើងាកទៅមើលពីលទ្ធផលនាពេលច្រើនឆ្នាំខាងមុខទៀត ទើបពួកគេភ្ញាក់ខ្លួនថា រស់នៅជាមួយមនុស្សប្រភេទនេះ មានតែក្តីក្រៀមក្រំអស់សង្ឃឹម ឈឺចាប់ ឯកាជាងកាលដែលនៅម្នាក់ឯងទៅទៀត។

២. ចំណាយពេលតិចបំផុតជាមួយមនុស្សជាទីស្រលាញ់

ដោយសារតែជាប់រវល់ជាមួយភារកិច្ចរៀងៗខ្លួន ធ្វើឲ្យអ្នកខ្វះការយកចិត្តទុកដាក់ជាមួយនឹងមនុស្សជាទីស្រលាញ់។ ដល់គ្រាមួយ ពេលគាត់មិនអាចហូបអាហារបានដូចមុន គ្មានកម្លាំងកំហែង មិនអាចនិយាយ ឬមិនចាំសូម្បីតែឈ្មោះរបស់អ្នក ទោះចង់ស្តាយក្រោយក៏ហួសពេលដែរ។

៣. ខ្ជះខ្ជាយពេលច្រើនពេក

មើលទូរទស្សន៍ តាមដានតែព័ត៌មានតារា សកម្មជាមួយបណ្តាញសង្គមខ្លាំងពេក លេងហ្គេមងើបមុខមិនរួច ទង្វើទាំងនេះហើយ ដែលធ្វើឲ្យអ្នកខ្ជះខ្ជាយពេលវេលាដោយមិនដឹងខ្លួន។ ទាន់ខ្លួននៅក្មេង គួរចំណាយពេលធ្វើរឿងណាដែលមានប្រយោជន៍ ទើបអាចទទួលបានផ្លែផ្កាទៅថ្ងៃមុខ និងជួយឲ្យជីវិតរីកចម្រើនរុងរឿងបាន។

៤. មិនគិតពីសុខភាពទាល់តែសោះ

ទម្លាប់អាក្រក់ប្រចាំថ្ងៃ ដែលអ្នកមិនបានចាប់អារម្មណ៍ខ្វល់ខ្វាយទាល់តែសោះនោះ វាមិនអាចបង្កគ្រោះថ្នាក់ធ្ងន់ធ្ងរចំពោះសុខភាពទេ សម្រាប់ពេលបច្ចុប្បន្ន ប៉ុន្តែនាពេលអនាគត ប្រសិនបើអ្នកឧស្សាហ៍ឈឺថ្កាត់ ចូលពេទ្យញឹកជាងគេជាងឯង កុំឆ្ងល់ថាមកពីហេតុអ្វី គឺព្រោះតែអ្នកមិនបានស្រលាញ់សុខភាពពីមុនមក។

៥. មិនសូវបានដើរលេង

ធ្វើការរកស៊ីហត់ គួរជូនកាដូឲ្យខ្លួនឯង ដោយការចេញទៅដើរលេងលំហែអារម្មណ៍ខ្លះ។ បើចេះតែចាំនេះចាំនោះ ចាំមានលុយច្រើនសិនចាំដើរលេង អ្នកអាចនឹងខកខានជារៀងរហូតក៏ថាបាន។

៦. ធ្វើការហួសព្រំដែន

ភាគច្រើន មានមនុស្សដែលងប់ងុលជាមួយការងារហួសព្រំដែន។ ពូកគេមិនត្រឹមតែ ភ្លេចខ្វល់ពីខ្លួនឯងនោះទេ ថែមទាំងមិនបានឲ្យតម្លៃថែរក្សាទំនាក់ទំនងជាមួយមនុស្សជុំវិញខ្លួនទៀតផង។ យូរៗទៅគ្មាននរណានឹកនាដល់អ្នកទៀតទេ ព្រោះអ្នកបានទុកពួកគេចោលមុន។

៧. មិនចង់រៀនអ្វីថ្មីៗ

មានមនុស្សជាច្រើនជឿជាក់ថា ត្រឹមបរិញ្ញាបត្រមួយគ្រប់គ្រាន់ណាស់ទៅហើយ។ យ៉ាងណាក៏ដោយ ចេះច្រើនមិនខាតអីទេ មានតែអាចទទួលបានឱកាសល្អៗសម្រាប់ខ្លួនឯង បង្កើនទំនុកចិត្ត និងក្លាយជាមនុស្សដែលគួរឲ្យចាប់អារម្មណ៍ទៀតផង។

៨. ធ្វើការងារដែលអ្នកស្អប់

ថ្ងៃនេះអ្នកអាចនឹងគិតថាការងារដែលកំពុងធ្វើសព្វថ្ងៃ អាចរកចំណូលចិញ្ចឹមជីវិតបានស្រួលល្មម ប៉ុន្តែខ្វះភាពបានក្លាហានមិនហ៊ានសាកល្បងរកការងារថ្មី ដែលជាក្តីស្រមៃពិតប្រាកដ។ កាលណាគ្មានការផ្លាស់ប្តូរទេ អ្នកនឹងរស់នៅវិលវល់ជាមួយនឹងការងារធ្វើដោយបង្ខំចិត្ត។

៩. ស្រមៃធំតែធ្វើតិច

បើដេកតែស្រមៃធំ ហើយធ្វើតិចតួចបំផុត មិនព្រមបោះជំហានទៅមុខនោះ ចាំដល់ស្លាប់ក៏មិនអាចសម្រេចកិច្ចការអ្វីជាដុំកំភួនទេ។ នេះគេហៅថា មនុស្សបានតែនិយាយ សម្តីធំជាងមាឌ។ រស់នៅក្នុងពិភពស្រមៃមិនព្រមអនុវត្ត ថ្ងៃមុខដេកចាំតែស្តាយក្រោយខកចិត្ត៕