៨យ៉ាងបញ្ជាក់ថា អ្នកជាមនុស្សឆ្លាតលើសពីអ្វីដែលបានគិតក្នុងចិត្តទៅទៀត

2020-11-04 02:24:00
ចំនួនមតិ 0 | ចំនួនចែករំលែក 0

មនុស្សឆ្លាតពិតប្រាកដ តែងដឹងច្បាស់ពីភាពវ័យឆ្លាតរបស់ខ្លួន គ្រាន់តែពេលខ្លះគេមិនចូលចិត្តភាពអំនួតក្អេងក្អាង មិនដូចអ្នកខ្លះចេះស្ទើរៗ ប៉ុន្តែខំប្រឹងសំញែងហួសសមត្ថភាព ចាត់ទុកអ្នកប្រាជ្ញប្រៀបមិនស្មើខ្លួន។ ការវាស់ស្ទង់ភាពឆ្លាតវ័យមានច្រើនរបៀបខុសៗគ្នា។ យោងតាមលោក Howard Gardner ជាគ្រូបង្រៀនផ្នែកចំណេះដឹងនិងការអប់រំ នៅសកលវិទ្យាល័យ Harvard បានបញ្ជាក់ថា អ្នកជាមនុស្សវ័យឆ្លាតលើសពីអ្វីដែលបានគិតទៅទៀត បើមានចំណុចដូចខាងក្រោមនេះ។

១. ពូកែភាសា

នេះជាប្រភេទទូទៅមួយនៃភាពវ័យឆ្លាត។ ប្រសិនបើអ្នក ពូកែទាំងនិយាយភាសា អាន និងសរសេរបានល្អ អាចបញ្ជាក់ថា អ្នកជាមនុស្សម្នាក់ក្នុងចំណោមអ្នកឆ្លាតប្រភេទទី១នេះ។

២. ពូកែវិភាគ និងគិតលេខ

បើអ្នកពូកែវិភាគ អាចអនុវត្តជាក់ស្តែង និងចូលចិត្តរៀនគណិតវិទ្យា ឬមុខវិជ្ជាទាក់ទងនឹងវិទ្យាសាស្រ្ត បង្ហាញថាអ្នកពិតជាមនុស្សឆ្លាត ធ្វើអ្វីផ្អែកលើហេតុផលនិងមានភស្តុតាងត្រឹមត្រូវ ថែមទាំងអាចដោះស្រាយបញ្ហាបានល្អទៀតផង។

៣. ប្រើកម្លាំងកាយនិងខួរក្បាលក្នុងពេលតែមួយ មិនថាជាអ្នកកាយសម្ព័ន្ធ អ្នករាំ និងពេទ្យវះកាត់ សុទ្ធតែត្រូវការប្រើប្រាស់កម្លាំងកាយនិងខួរក្បាលក្នុងពេលតែមួយដើម្បីដោះស្រាយបញ្ហា ហើយមិនមែនមនុស្សគ្រប់គ្នាអាចធ្វើបានឡើយ។

៤. អ្នកពូកែមើលចិត្តមនុស្ស

សម្រាប់ភាពវ័យឆ្លាតមួយនេះ ភាគច្រើនមានចំពោះ ទស្សនវិទូ អ្នកចិត្តសាស្រ្ត គ្រូផ្នែកចិត្តវិទ្យា។ ពួកគេជាមនុស្សពូកែវិភាគស្ទាបស្ទង់ ស្គាល់ខ្លួនឯងច្បាស់ ទើបអាចស្វែងយល់មើលចិត្តអ្នកដទៃបានច្បាស់ដូចគ្នា។

៥. មនុស្សពូកែទំនាក់ទំនង

មានចំណេះក្នុងខ្លួនតែខ្វះការទាក់ទង មិនទាន់អាចចាត់ទុកជាមនុស្សឆ្លាតទេ ព្រោះមនុស្សឆ្លាតមានជំនាញខាងទំនាក់ទំនងទាំងក្នុងគ្រួសារនិងក្នុងសង្គម។ ហេតុនេះហើយ បានជាពួកគេមានភាពជាអ្នកដឹកនាំ និងមានភាគរយខ្ពស់ក្នុងការទទួលបានជោគជ័យ។

៦. អ្នកច្នៃរបស់ចេញពីធម្មជាតិ

មនុស្សប្រភេទនេះស្រលាញ់ធម្មជាតិគ្រប់បែបយ៉ាងដែលនៅជុំវិញខ្លួន។ ពួកតែងចាប់អារម្មណ៍ទៅលើ រុក្ខជាតិ សត្វ និងចូលចិត្តចំណាយពេលនៅជាមួយធម្មជាតិ។ ភាគច្រើនពួកគេ ជាអ្នកជំនាញផ្នែកជីវវិទ្យា កសិករដែលពោរពេញដោយគំនិតច្នៃប្រឌិត និងអ្នកកែច្នៃផលិតផលឬរបស់របរប្រើប្រាស់ចេញពីធម្មជាតិជាដើម។

៧. អ្នកពូកែឆ្ងល់

អ្នកពូកែឆ្ងល់មិនមែនមានន័យថាល្ងង់ ប៉ុន្តែជាមនុស្សវ័យឆ្លាតទៅវិញ ព្រោះពួកគេតែងចង់ចេះចង់ដឹងបន្ថែម និងតែងមានសំណួរឆ្ងល់ពីនេះពីនោះ។ ឆ្ងល់ច្រើនចេះច្រើន គ្រាន់បើជាងអ្នកមិនចេះឆ្ងល់ ឬឆ្ងល់ដែរតែមិនហ៊ានសួរ។

៨. សិល្បករ

មនុស្សដែលមានសិល្បៈនៅក្នុងខ្លួន សុទ្ធសឹងតែជាអ្នកដែលមានសមត្ថភាពនិងទេពកោសល្យខ្ពស់ ដូចជាតន្ត្រីករ អ្នកចម្រៀង អ្នកតែងនិពន្ធ ជាងគំនូរ...។ បូកផ្សំជាមួយនឹងដុងតាំងពីកំណើត ធ្វើឲ្យពួកគេរហ័សរហួន ឆាប់ចាប់បាន ពាក់ព័ន្ធនឹងការងារសិល្បៈ។

ចុចអានបន្ត៖ មុនពេលស្លាប់ មនុស្សស្រីគ្រប់រូបគួរតែធ្វើរឿងសំខាន់ ១០ យ៉ាងនេះ